Jesu wakaamba kuti, inzila yalo iikonzya ikufutula muntu ailike nku zyalululwa. Ino eeci caambaanzi? Atuzibe kuti ikuzyalululwa tacaambi ikunyikwa mumeenda, alimwi tacaambi ikulembesegwa mu Cikombelo, alimwi tacaambi ikulya Mulalilo mu Cikombelo, nikuba ikutalika kulilemeka kabotu, naa ikutalika ikupayila, naa ikuba aa micito mibotu. Ikuzyalululwa nkucinca moyo iwamuntu. Leza ulatupa ikuzyalululwa ikuti twalitola kuli nguwe mu kuusa kuzibi zyesu alimwi twasanduka. Leza ulabona eco ciindi ni tulibambilide ikuzyalululwa. Aswebo tulaziba eco ciindi nitwazyalululwa; kulikulimvwa ikwanguluka mumizeezo, alimwi ikuyandisisya kucita iciluleme coonse ciindi, akuziba kuti ndilaa muunzi wangu imupya ku Julu.
Jesu utwambila kuti imilyango iya ku Julu ilijalidwe kulindiswe cita kuti twa zyalululwa. Aboobo, tulabuzya, ‘Mukwesu, Wakazyalululwa kale na?’. Naa tona zyalululwa, ulisweekede, nkaambo Jesu uwamba kuti, “Cita kuti imuntu watuzyalulwa, takonzyi ikubona bwami bwa Leza.” (Johane 3:3)
Ulakonzya ikubuzya kuti, “Ino ikuzyalululwa caambaanzi?’, nkaambo kakuti imazuba aano ibantu balaimpana kuluzibo ilwa ncocaamba ikuzyalululwa. Tacaambi ikuniykwa mumeenda, nkaambo bamwi bakanyikwa mumeenda kabatana zyalululwa (Incito 8:18-25). Alimwi tacaambi ikunjila Cikombelo pe nkaambo bamwi ba kanjila mu Cikombelo kakunyina luzibo (Ba-Galatiya 2:4). Alimwi ta caambi ikulya mulalilo pe, nkaambo bamwi ibakaulya kabatalibambilide bakazulwa akuciswa (1 Ba-Korinto 11:29). Alimwi ikuzyalululwa tacaambi ikusola kulilemeka “Nkaambo ibanji, ndamwambila, bayakusola kunjila, pele tabakacikonzyi pe” (Luka 13:24). Alimwi tacaambi ikukomba, nkaambo Jesu uwamba kuti, “Aaba bantu balandilemeka a mulomo, pele imoyo wabo ulikule andime.” (Matayo 15:8)
Umwi muntu inga waamba kuti ikuti ndasola anguzu mbuuli, ikugwasya ibapengede, naa ikuswaya ibaciswa, naa ikulilemeka imazuba oonse caamba kuti ndakazyalululwa (Mateo 25:41-45). Tabulimbubo pe. Tatukonzyi ikuba mbuuli mbotutabede pe, nkaambo ikuyeeya ikwa munyama takweendelanyi a Leza alimwi takulemeki mulawu iwa Leza. (Ba-Roma 8:7). Tweelede ikuba a moyo uucincide nkaambo Leza mukwiinda mu mu Profita Ezekiele wakaamba kuti, “Ndakupa imoyo mupya.” (Ezekiele 36:26)
“Ikuzwa waawo ino inga twamba kuti ikuzyalululwa ncinzi?” Ikuzyalululwa cijatikizya ikucinca moyo ikuzwa kukuliyanda ikuunka kuku belekela Mwami Leza. Eeci cilaboola ikuti twausa kuzinyonyoono zyesu, mulushomo twalomba Jesu ikuti atulekelele zinyoonyoono eezi. Ooku nkukuzyalululwa mumuuya. Cili mbuuli Imwana aazyalwa, ibuumi bupya bulatalika. Ncimyinya biyo, nitwazyalululwa, ibuumi ibupya muli Jesu mumuuya bulatalika. Ooku nkotwiita kuti ikuzyalululwa – ibuumi bupya muli Jesu. “Mwami Leza tacededwe pe ikuzuzikizya icipangano ncaakasiya, pele ulindilla kuti basisibi basanduke ikucita kuti tabakanyonyooki amulilo.” (2 Petro 3:9)
“Ino ndiilili ni ndiyelede kuzyalululwa?” Ibbaibbele lyamba kuti, “Sunu ikuti wamvwa ijwi lya Jesu” (Ba-Hebbrayo 3:7). Ici caamba kuti, kufumbwa ciimo ca muntu, iciindi, nokuba busena, ikuti wamvwa ijwi alimwi wa shoma a kuzumina, inga wa zyalulululwa mumuya.
“Ino citola ciindi buti ikuti ndizyalululwe? Ino tandeelede ikukula na ilutaanzi oomu mukuzyalululwa?” Peepe. Tuzyalulwidwa mu bwaami bwa Leza, aboobo tuli bana iba Leza, ndiswe basikukona bwami oobu. “Naa tulibana ba Leza, caamba kuti ndendiswe nitukona bwami bwa Leza alimwi tukonena aamwi a Jesu ibwami oobu.” (Ba-Roma 8:17). Eeci cilakonzya ikutola busena mpamunya aawo iwaunka kuli Jesu ikuyolomba kulekelelwa zibi.
“Ino ikuzyalululwa kucitika buti, alimwi kucitika lili?” Leza uulanga moyo wako ulabona ikuyandisisya kwako. Ulaboola kumuntu mukwiinda mu nguzu zya Muuya Usalala alimwi ulapanga muuya uululeme mulinduwe (Intembauzyo 51:10). Awo wazyalululwa- imuntu mupya muli Jesu mukwiinda mulushomo mulinguwe (2 Ba-KKolinto 5:17).
Kumamanino, “Ino inga ndaziba buti kuti ndazyalululwa?” Paulo mu Ba-Roma 8:1-10 utuyisya kuti; “Na ikuti umwi muntu takwe Muuya iwa Kristo, talimuntu wakwe.” Ibbaibbele lyamba kuti ibasweekede balifwide muzibi, balinyoonyookede, alimwi balaamizeezo imibi. Balaamizeezo iyamunyama, kabatakwe a cilindililo mukutamulemeka Leza. Imuntu iwakazyalululwa mwana a Leza uwakafutulwa, upona muli Kristo kakutakwe a kwatulwa alimwi ula mizeezo imibotu. Alimwi ula muuya mubotu kazwide Muuya u Salala kajisi a lushomo mu buumi ibutamani. Izibi zyakwe zyakamwayigwa a bulowa bwa Jesu. Imoyo wakwe uzwide luyando a luumuno lwa Leza ilwiinda luzibo lwamuntu. Ooyu muntu ulayanda akulombozya ikucita zintu nzyayanda Mwami Leza. Luyando lula a cilindililo iciinda aacuumbwe nkaambo ka cishomezyo ca muunzi iwakuJulu. Sena kuli muntu iwakacinca munzila eeyi utakonzyi kuziba kuti wacinca na? Peepe nkaambo Muuya iwa Leza ulamupa bumboni mu muuya wakwe ikuti mwana a Leza. ( Ba-Roma 8:16)
Ikuti tuna jana luumuno a lukkomano mu moyo wako, utakali ansi pe. Uyeelede ikuzyalululwa.