Yesu moninga nayo
Nazali na moninga moko. Aleki baninga na ngai nyonso. Apesi bopolo mpe bosembo ; nde tina nalingi yo mpe oyeba ye. Ya kokamwa ezali ’te ye mpe alingi akoma moninga nayo.
Nalingi kosolola na yo na tina na ye. Lisolo na ye ezwami kati na Biblia. Biblia ezali solo liloba na Nzambe. Nzambe nde asalaki mokili na nyoso oyo ezali kati na yango. Azali Nkolo ya lola mpe mabele. Apesaka bomoi mpe pema na bikelamu binso.
Yesu azali mwana ya Nzambe. Nzambe atindaki ye na mokili mpo azala mobikisi na biso. Nzambe alingaki bato (yo na ngai) na bolingo koleka, nde tina atindaki mwana naye se moko kokufa mpona masumu na biso mpo ’te moto nyoso oyo akondimela ye akufa te, kasi azwa bomoi ya seko. Yoane 3.16
Ayaki na mokili lokola mwana oyo abotami. Baboti naye ya mokili ezalaki Yosefu na Malia. Abotamaki na ndako ya ba nyama mpe balalisaki ye esika banyama balielaka bilei.
Akolaki na maboko ya Yosefu mpe Malia, atosaki bango. Azalaki mpe na bandeko mibali mpe basi. Asalisaki Yosefu na esika ya mosala sharpatié.
Wana akolaki, ateyaki bato makambo ya Tata na ye ya lola. Alakisaki bango ’te Nzambe alingi bango. Abikisaki babeli, alendisaki bato na kati ya makama. Azalaki moninga na bana. Alingaki bazala pene naye, baumela naye. Bana mpe balingaki Yesu mpe balingaki kozala pene na ye.
Basusu balingaki ye te. Bazalaki na zuwa na ye, kino bayinaki ye na ndenge ya kosakana te, kino balukaki koboma ye. Mokolo moko ya somo babomaki ye, babakaki ye na ekulusu. Yesu asalaki mabe te. Esengelaki akufa na esika na biso mpo ’te yo na ngai tosali mabe.
Lisolo na ye esukaki kaka na liwa te. Nzambe asekwisaki ye kati na bakufi. Bayekoli na ye bamonaki ye. Na sima, azongaki na lola. Lelo, akoki komona yo mpe koyoka yo. Ayebi manso likolo na yo lobela ye mikakatano nayo. Azali ya kobongama mpona kosunga yo. Okoki kokitisa moto na yo mpe kosolola naye. Ntango nyonso, bipai nyonso. Akozonga mokolo moko. Akoya kozwa baye bazali kondimela ye mpe akomema bango na lola.
