“Ki nonm pami nou, si li gen san mouton, e si li pèdi youn ladan yo, p ap kite katrevendiznèf lòt yo nan dezè a pou ale dèyè sa ki pèdi a jouk tan li jwenn li? Lè l jwenn li, li mete l ak kontantman sou zepòl li, e lè l tounen lakay li, li rele zanmi li ak vwazen li yo, e li di: Fete ak mwen, paske mwen jwenn mouton m ki te pèdi a” (Lik 15:4-6).
Jezi, vre bon bèje a
Istwa sa montre amou epi swen Jezi pou tout moun. Yon bèje te gen san mouton. Li te renmen mouton yo epi li te pran swen yo nan yon bèl fon lwen nan mòn yo. Fon sa te gen sekirite, men mòn yo te danjere. “Letènèl se gadyen mwen, mwen p ap manke anyen. Li fè m repoze nan patiraj ki vèt, Li mennen m bò dlo ki trankil.” (Sòm 23:1-2)
Chai jou, bèje a te mennen mouton yo nan mòn pou yo jwenn patiraj. Bèje a te gade mouton yo, li pwoteje yo, e li mennen yo retounen nan sekirite fon an avan fenwa. Lè mouton yo te retounen nan pak la, bon bèje a te kontwole yo pandan yo t ap pase nan pòtay la. “Jezi di yo ankò: An verite, an verite, mwen di nou: Mwen se pòt mouton yo. Tout sa yo ki te vini avan mwen, yo se vòlè avèk brigan: men mouton yo pa koute yo. Mwen se pòt la. Si yon moun pase antre nan mwen, li va sove, l a antre sòti, e l a jwenn patiraj.” (Jan 10:7-9)
Yon mouton pèdi
Yon sware bèje a te kontwole sèlman katrevindiznèf mouton. Youn nan mouton yo te toujou deyò nan mòn nan! Akòz kiryozite li sou antouraj li, li te rete dèyè. Bel touf zèb tou vèt te lakòz li pèdi chemen an. Li te kanpe gade flè yo, pyebwa yo, ak touf raje yo ke li pa t janm konn wè. Li te atire ak sa li te wè yo, e sa fè li bliye swiv bèje a, e konsa li te rete dèyè. Lè aswè rive, mouton an reyalize li pou kont li epi lwen pak la. Kounyeya li pè e li kòmanse kouri. Nan konfisyon li, li pran move wout la. Li pa t ka jwènn ni bèje a ni lòt mouton yo, ni wout lakay li. “Nou te tankou mouton ki te pèdi bann, chak moun bò pa yo” (Izayi 53:6). Nwit la tonbe epi yon tanpèt vini. Mouton ki pèdi a te kache anba touf raje, li te mouye byen mouye, e li te santi mizerab. Finalman, loraj e lapli a te pase. Bri ak lonbraj nwit la fè li pè, e pran kouri ankò. Pikan yo blese li e li t ap vèse san. Chen mawon pran sant li e kouri dèyè li.
Bèje k ap chache a
Lè bèje a te reyalize mouton an pèdi, li fèmen pòt pak la, li pran baton li epi li retounen nan mòn nan. Bèje a te fè fas ak tanpèt e fènwa tou. Li te grangou, mouye, epi frèt. Bèje a te kanpe souvan pou li rele mouton an, men li pa t jwenn repons. Li te fatige, men li te kontinye chache. Le bèje a tande chèn mawon ap jape byen lwen, li konnen mouton li nan gwo danje. Li ale nan direksyon sa byen vit. Eske mouton an ka sove avan li two ta?
Mouton ki pèdi a te tande chen mawon ap jape tou. Li te kontinye kouri jiskaske li fèb e fatige. Li pa t konnen ke chen mawon yo t ap kouri dèyè l pou pran l nan pyèj. Se konsa fènwa vin tonbe sou sitiyasyon terib sa. Mouton an te kole nan pikan bò kote falèz la. Li t ap koule san, li te fatige, e chen mawon yo te anviwonen l. Li te goumen pou sòti, mèn li pa t ka sove tèt li. Te sanble lavi li va fini. Alò, sèl bagay li ka fè, se rele mande sekou.
Mouton an sove
Bèje a tande, li kouri vini byen vit. Li fè fas ak chen mawon yo san pè, li chase yo ale. Li rive bò kote ti mouton k ap rele a, li retire l nan pikan yo e fè l sòti bò falèz la. Li lave blesi yo e li mete medikaman sou yo. Li pote l nan bra li e mennen l lakay li. Mouton pèdi a te sove. “Alò, mwèn pral chache mouton mwèn, e delivre l” (Ezekiel 34:12).
Nou menm tou, nou tankou mouton pèdi a. Jezi, Bon Bèje a, renmen nou e li gen yon refij pou nou. Gen yon enmi tou ki vle detwi nanm nou. Satan toujou vle tante nou avèk bagay atiran yo, li pwomèt nou sekirite e plèzi. Alafen, pwomès li yo kite nou vid. Jwa e kontantman li ofri nou, yo fo e nou p ap rive jwenn yo. Nou vinn fristre epi nou pè; e nou blese. Nou tatonnen, men nou p ap chape.
Erezman, Jezi ban nou yon mwayèn pou nou chape. L ap toujou chache sa yo ke satan te sedui e pran nan pèlin li.”Paske Pitit lonm nan vin chache e sove sa ki te pèdi” (Lik 19:10).
Jezi di nan Matye 11:28, “Vin jwen mwen, nou tout ki fatige e ki chaje, e m a bay nou repo.” Nou dwe priye Jezi, konfese peche nou yo, epi mande padon. Apre sa nou pwomèt pou ba li tout lavi nou epi kite peche nou. Jezi te mouri pou nou, e li te peye pou peche nou ak san li, pou nou kapab pwòp e lib devan Bondye. Gen anpil rejwisans nan syèl la lè yon mouton pèdi sove e Bon Bèje a pote l nan pak mouton an. “E si l rive jwenn li, anverite mwen di nou, li rejwi pou li plis pase katrevendiznèf ki pa t anfouraye yo“ (Matye 18:13).
