Wakat a yemre, bũmb baafι ra pa be dũniyã zug ye.
Baa zĩunfu.
Baa ãdg sẽn be saasẽ.
Baa mogre wala tι-puugu.
Fãa ra yaa vιυυgo la lika.
La Wẽnnaam da beeme, Wẽnnaam ninga tõnd sẽn pυυsd rũndawã.
Wẽnnaam da tara mamsg kãsenga. B ra tagsda dũni neer yelle, la wakat ning B sẽn wa n tagsdẽwã la B sẽn naana-la-me. Wẽnnaam naana dũniyã ne bũmb niis sẽn ka be, B sẽn wa n na naan bãmba, Wẽnnaam yetame bala: Bι woto yi, la bũmb kãng sιd yιιme.
B naana vẽenem. B naana kυlse la ko-kãsemse; B naana tẽnga sẽn pid ne moodo la rumsi, la liuuli, la tιιse.
La baosgo, B naana raowa, la B naana paga n kõ raowa. La B pυda raowã yυυr ta Adama la pagã ta Hawa.
Wẽnnaam nong-b-la sõama. La b ra vιya zẽ-sõng pυga, la daar fãa zaabre Wẽnnaam kẽngda be n tι ges bãmba.
Zẽeda zĩigã ra yaa bãmb n so, la tιιg a yemre bal la Wẽnnaam gιdg bãmb tι b ra sιιs ye.
A Adama ne a Hawa ra tara sũnoogo, la daar a yemre Sυtãana, sẽ yaa Wẽnnaam bεwã, maka bãmba. La bãmb yãka yam n na di tιιg ninga biis sẽn gιdgã. La woto, bãmb maana yelwẽna. Yaa pipi bãmb sẽ n paam sũ-sãongo la yãnde.
La bãmb ye pa tõe n gom ne Wẽnnaam ye. La bãmb paama toogo, la sũ-saongo. Bãmb sεgd n kiime. Bãmb sũya sãamame.
Wẽnnaam kãaba bãmb tι B na sõng-b-lame. Wẽnnaam yeela bãmb, “la wakat ninga mam sẽn data, mam na n tυma mam biig a Zezi dũniyã zugu. B na yι saasẽ n wa. A Zezi na yiisa yãmb yelwẽna, la bãmb na n namsame la b na ki yãmb yĩnga.” La bãmb ra tara sũ-noog wusgo tι Wẽnnaam na n tυma Fãagda!
A Adama ne a Hawa da tara kamba la yagense. La wakat bilf bala dũniyã pidame.
Wẽnnaam datame tι b paam sũ-noog wusgo. La B yeela bãmb b sẽn sεgd n maane. Ad tõod piiga Wẽnnaam sẽn kõ bãmba:
1. Yãmb ka na paam wẽnnaam dãmb a taab mam taor ye.
2. Ra maan wẽnaandega wala bũmb tι yi yãmb Wẽnnaam ye.
3. Ra pudi Zusoab yυυr zaalem ye.
4. Tẽeg vυusga raar la f waog a.
5. Waog f ba la f ma.
6. Da kυ ye.
7. Da yo ye.
8. Da zu ye.
9. Da kιs kaset ziri ne f yak ye.
10. Da maan sũkiir ne f yak zak ye; da maan sũkiir ne f yak pag wala a tυmtυmda wala a yempoaka wala naafa wala bõanga wala bũmb ninga fãa sẽn yaa fo yak rẽnd ye.
B gυlsalame Wẽnnaam Sebr pυga, woto tõnd tõe karem ba. Tõnd sã n sake, tõnd na paama sũ-noogo.
Sυtãana ka rat tι tõnd sak ye. Wakat kẽere a yetame tι tõnd zu tι ned ka na yãa ye. La Wẽnnaam miime. Wẽnnaam nee fãa.
Wakat kẽere a sυtãan tusda tõnd tι d yagd zirẽ-beedo n tẽed tι ned ka na bãng ye. Wẽnnaam miime. B wυmda fãa.
Tõnd sã n tõdge, tõnd neeme tι tõnd sũya puse pa zems ye. Wẽnnaam nonga tõndo la Bãmb dat n sõnga tõnd tι d yi sõama. Yaa rẽ yĩnga n kιt tι B tυm a Zezi dũniyã zugu. Wẽnnaam tẽega B kãabgã.
Yυυm wusg kãabg loogr poorẽ, a Zezi wa dũni zugu n wa n bι n lebg raowa.
A Zezi tυυma tυυm-neeba. B maaga bãase, B kõta zoens nini, la B ningd kamb zut barka.
A Zezi pa tol n maan yelwẽnd ye. B gomda Wẽnnaam yelle la B zãmseda neba bũmb ninga sẽn na n maan n sak bãmba.
La baasgo, a Zezi bεεba kaa bãmb dapιk zugu, la b kiime. B namsame n ki dũniyã yelwẽn yĩnga, baa ne neb niis sẽn kυ yẽwã.
B muma a Zezi. La dẽ poorẽ, bõn neer n wa. B pa pa yaog pυg ye. B vυυgame. Wakat bilfu b kẽnga ne bãmb arzãna ne sawadgo. Wakat ning a zo-rãmb sẽn get yẽ, malεk a yemre yeela bãmb ta Zezi na leb n waame.
A Zezi me kiime tõnd yelwẽna yĩnga. A ratame tι tõnd paam sũ-sãongo d yelwẽna yĩnga n vẽneg n togs tõnd yelwẽna. Bãmb bee wakat fãa tι kõ sugri.
Tõnd sẽ be zĩig ninga fãa la wakat fãa tõnd tõe pυυsa Wẽnnaam. Bãmb wυmda ned fãa ne a koεεga, bãmb mii tõnd tagsego. Tõnd yelwẽna sã n paam sugri, Bãmb kõta tõnd sũ-noogo wusgo ed sũyã puse. Sẽn paase tõnd dat n maana neere la tõnd dat n yii neere.
Tõnd sã n yãk tι kιιs a Zezi n tι tũ sυtãana sẽ yaa wẽng soaba, tõnd sã n ki tõnd na kẽ bugtẽnga. Bugtẽnga yaa bug sẽn ka sεt zĩiga.
La tõnd sã n nong a Zezi la tõnd sãn sak bãmba, b waonga daar sẽ n ta, b na n dιk tõnd n kẽng arzãna. Arzãna yaa Wẽnnaam ne b biig a Zezi do-neere. Yaa roog sẽn yaa nonglem la vẽenem. Tõnd na n paama sũ-noog wakat fãa.