Ne Kjliene Nobaschoft en Sikj Selfst
De Bibel jeft ons dän Plon fa een Heim waut schmock jeplont un stoakj jebut es, un waut uk een frooet benämen haft.
Daut Heim kaun ne Städ sennen wua Eenichkjeit un Tofrädenheit es, ooda een Heim wua Zank un Striet es. Es jun Heim froo un stoakj; kaun daut derch de Storms em Läwen bestonen bliewen?
Daut Heim es een wichtja Vesaumlungsplauz. Daut es von Gott so bestemt, daut wie doa jeistlich waussen un toonämen, ennalichet scheengonen haben un kjarpaliche Volfellunk finjen. Gott sien Plon es emma jewast, daut dee Jlieda em Heim eena däm aundren froo moaken wudden un daut de Famieljes en Harmonie frädlich toop läwen sullen.
Wuawäajen Eenje Heima nich Freelich sent
Wuarom sent eenje Heime dan nich froo? Wuarom woaren dee derch Oneenichkjeit, Tranunk un Ehescheidunk tweijebroaken? Daut es wäajen nich opp Gott sien Plon jeacht worden es. Em Wuat Gottes finj wie daut needje Toobehia fa een frooet Heim. De Heime waut no siene Väaschreften jebut sent, sent Städen wua Leew un Vetruen sent, wua uk jemeensome Interessen sent un eena däm aundren selfstloos deent. Soone Heime woaren Freid en ons Läwen nenbrinjen, un onse Nobaschoft un de Nazionen bewoaren. Deist du Gott, dän haupt Bumeista, sien Plon, nobuen? „Wua de Har nich daut Hus but, oabeiden dee vejäfs dee doaraun buen“ (Psalmen 127,1).
Enne Jugentjoaren woat daut Fundament fa dee tookjinftje Heime jelajcht. Een reinet Läwen ver Gott es een sea needja Toorot om ons tom befrieen reed to moaken. Een sindlichet Läwen verem befrieen nemt moralische Bestendichkeit wajch un stalt daut tookjinftje Heim en Jefoa. Daut Ieejensennje, selfstjefellje Läwen enne Jugenttiet jeft eene Aunjewanheit waut lota daut befriede Läwen venicht. De huage Zol von Ehescheedungen es jenuach bewies doafäa. Äwa dise Sinden mott volstendich Busse jedonen, ver doa een nieet Läwen en Christus sennen kaun. Dan kaun dee Vegonenheit to Ru jelajcht woaren un Gott woat met sienen Säajen nenkomen.
Een Heim fangt aun wan een Maun un eene Fru sikj befrieen. Daut Wuat Gottes sajcht wie sellen ons bloos em Harn befrieen (1 Korinta 7,39; 2 Korinta 6,14). Dit bediet, daut de Maun un Fru beid äa Läwen un Wellen däm Harn äwajäft haben. Gott mott dän ieeschten Plauz haben. Wan de Maun un de Fru beid selfstloos sent, kjennen see beid een jemeensomet, un frooet Vejnieejen haben.
Em Harn Befrieen
Sikj em Harn befrieen meent nich bloos daut de Maun un de Fru beid Christen sent, oba daut de Har an toopjeleit haft. Bloos een kjarpalichet, deepet Jefeel von veleeft to sennen es mau een schwaka Aunfank fa de Ehe. Wan dit aules es waut ons toopbrinjt, dan kunn doa nom befrieen Ontofrädenheit un Striedarie sennen. Wie motten däm Harn vetruen ons tooptoleiden, wäajen siene jettliche Weisheit sitt em verut waut fa een Poatna ons fälen woat. Sien Plon es nich bloos fa vondoag oba uk fa de komende Joaren. De Har kaun veschiedne Perseenlichkjeiten wälen waut eena däm aundren halpen kjennen, daut et doaderch een bätret Ehepoa jäwen kaun. „Un dee twee woaren een Fleesch woaren” (Markus 10,8).
Eene Ehe saul fa Läwestiet väahoolen, un es nich blos een jesazlicha Kontrakt. Jesus jeef ons een kloaret Jeboot, „Un waut Gott vebungen haft, saul de Mensch nich von enaunda scheeden“ (Matäus 19,6).
Ne Jettliche Ordnunk
Een Heim es soo aus eene kjliene Nobaschoft en sikj selfst, un soo aus eene jesalschoftliche Grupp, wua aunjestalde Veauntwuatlichkjeiten needich sent. Gott haft ons daut en de Bibel jejäft wo dise bestemde Ordnunk es. Wan dise Ordnunk nojegonen woat, daut woat Ordnunk un Freid em Heim nenbrinjen. En dise Ordnunk haft de Ehemaun de jratste Veauntwuatunk, dan de Ehefru un dan de Kjinja. (Läs uk 1 Korinta 11,3; Efeesa 5,22-24). Wan Gott eene Ordnunk jrint un een Prinziep bestädicht, dan woat daut heilich. Onjehuarsom doatoo sennen brinjt jewesse Triebsaul met sikj. Un von de aundre Sied, de Jehuarsome säajent hee met Fromheit, Freid un Jnod.
Bie däm Ehebunt fangen de Maun un Fru eene Veeenjunk aun, wua see beid Veauntwuatungen un Oppgowen haben. Äare veschiedne Oppgowen un Fäichkjeiten sent aula needich om daut Heim volstendich to moaken. Eena mott de Leida sennen, un doatoo haft Gott dän Maun aunjestalt. „Wiels de Maun steit äwa siene Fru, soo aus Christus äwa siene Jemeent steit… un sikj selfst fa ar hanjäwen deed“ (Efeesa 5,23-25). Soone Leew kjemt derch een selfst hanjejäwden Jeist. Daut es eene fläajende Leew, waut dän Maun bat doa brinjt, siene Fru so to behaundlen „aus sienen ieejnen Kjarpa“ (Efeesa 5,28). Een leeftolja Maun helt siene Fru nich fa weinja aus sikj selfst. Hee deelt met ar met, vetrut ar, sieekjt äa Rot un nemt ar ut Leew aus sien Poatna aun.
„Jrod soo uk jie Frues, siet june Mana unjadon“ (1 Petrus 3,1). Wan eene Fru äaren Maun siene Leidunk em Heim folcht, soo aus hee em Jehuarsom Christus nofolcht, dan woat daut Heim een frädlicha Ruplauz met Tofrädenheit sennen. Efeesa 5,33 sajcht, „Un de Frues sellen soo sorjen, daut see äare Mana achten.“ Jäajenaun sennen to dise Räajel haft aul väl Onheil un Truarichkjeiten en vondoagsche Heime nenn jebrocht. Dise Grunt-räajel nich beachten brinjt nich bloos Striedarie en de Famielje nenn, oba daut veuasoakt uk jeistliche Orru en de Fru äa Hoat.
De Kjinja äa Plauz
Wie jleichen to denkjen daut Kjinja rein un oschuldich sent. Oba doch sent dee aula met eene sintliche Natua jebuaren. Endäm daut Kjint waust, kjemt siene ieejensennje Natua emma dolla äwadäl. Soon Kjint woat väl Truarichkjeiten opp sikj selfst un aundre brinjen, wan de Elren dise sintliche Natua nich belieren.
Daut Kjint es veauntwuatlich de Elren jehuarsom to sennen. „Kjinja, june Christenpflicht es, june Elren to jehorchen, wiels daut es daut rajchte to doonen“ (Efeesa 6,1). Een volkomnet Biespel von Jehuarsom es aun Jesus to seenen, aus hee een Kjint wia. „Dan jinkj hee met an met, un see kjeemen no Nazaret, un hee jehorcht an un wia an unjadon“ (Lukas 2,51). Wan dit Prinziep ut Jewanheit em Heim jeeeft woat, woaren Elren un Kjinja frooa sennen un daut Heim woat dolla aunjenäm sennen.
Wan Gott siene Ordnunk soo biejehoolen woat, dan woaren de Elren fa de Kjinja un de Kjinja fa de Elren läwen, un aulatoop woaren see fa Gott läwen. Soon Heim woat een Säajen fa de Nobaschoft sennen un onse Nazion mea wieet moaken.
Väle Jugentliche jäwen sikj met Droggen, vejenkjliche Zooten, niee Mooden un weltliche Vejnieejungen auf. Dee sent gauns benomen von dee rietende Jesalschoft waut daut wieetvolle un de goode moralische Sitten wajch schmieten. To eene Tiet jeewen dise wieetvolle Sitten onse Nobaschoften eenen jewessen truhoatjen un bestendjen Karakta. Kunn daut sennen, daut de Mangel aun sechre un frooe Heime de deepste unjaligjende Uasoak es, woosoo wie vondoagschen Dach soo väl orruje un ontofrädne Jugent seenen? Waut kaust du doamet doonen? Es die daut aul emol em Senn jekomen, daut woo du dien Heim moakst, doavon auf henjich es, woo truhoatich du to Gott best?
Christus Daut Fundament
Wan wie een stoakjet, frooet Heim buen wellen, dan mott Jesus Christus daut Fundament sennen. De Räajen mucht kommen un de Storms doa jäajen schlonen, oba met Christus woat daut Heim bestonen bliewen (Matäus 7,24-27). Hee woat ons leiden, Moot un Krauft jäwen om ons Heim to een fruchtboaret un frooet Heim to moaken en dise ruchloose, onboarmherzje Welt. Jesus leeft daut Heim, un es reed en onse Heime nentotrakjen. Hee sacht, „Kjikj, ekj sto ver de Däa un klopp aun“ (Openboarunk 3,20). Ieeschtens klopt hee aun onse Hoatensdäa aun, un dan aun de Däa von ons Heim. Woa wie am nenn loten?
Een frooet Heim fangt en ons Hoat aun. Wie kjennen nich dän rajchten Fräd en ons Heim haben onen Fräd em Hoat to haben. Wan wie ons Vetruen opp Gott saten, kjenn wie perseenlichen däachlichen Siech äwa Oajaniss un Vedruss haben. „Wäa dän Gloowen aun die helt, un sikj gaunz opp die velat, däm jefst du Fräd, ennare Fräd” (Jesaja 26,3).
Eene gottesferchtje Famielje woat toop fa sikj selfst, äa Heim un fa de Nobaschoft bäden. Daut Jebäd binjt de Famielje toop. Soo aus jesajcht woat, „De Famielje waut toop bät, blift uk toop.“
Jleew, un nemm Gott sienen Plon fa dien Läwen un Heim aun. Moak diene Hoatensdäa fa Christus op. „Soo aus de Heilja Jeist sajcht: Vondoag, wan jie siene Stemm hieren woaren, vehoat june Hoaten nich“ (Hebräa 3,7-8). De Har es reed dien Hoat un Heim to säajnen. Go no am met dien gaunset Hoat un bliew am tru. Een Dach woat hee fa die de Däa en daut himlische Heim opmoaken, wua volkomende Freid un Fräd die fa emma bewelkomen woaren.