An patukuranan o pundasyon han Singbahan amo hi Hesukristu. Ini klaro nga igintutdo han Biblia. Hi Pedro han pagyakan kon hin-o hi Jesus sumiring. "Ikaw amo hi Kristo, an anak han buhi nga Dios". Hi Jesus sumiring, "Ha bawbaw hini nga bato itutukod ko an akon singbahan; ngan an ganghaan han impyierno diri makadaog kontra hito" (Mateo 16:16, 18).
Han harapit na hi Hesus bumaya ha kalibutan, gintugon niya an Iya mga disipulo ha paghulat ha Herusalem tubtub nga mabubo an Espiritu Santo. Ha kahanabu hini, gintagan hira hin espesyal nga gahum ngan inspirasyon pagwali mahatungod kan Kristo ngan han Iya pagkaraysang ha krus. Iginwali nira an pagbasol ngan kapasayloan han sala pinaagi han dugo ni Hesus, "May-ada kinmarawat ngan tinmoo ha iya sanglit hinatag ha ira an katungod hin pagkaanak han Dios" (Juan 1:12). "Damo ha ira an tinmoo han iya ngan ginbunyagan hira. Mga tulo ka libo nga mga tawo an nahidugang han hugpo hito nga adlaw" (Mag Buhat 2:41).
An plano han Dios amo nga an nga tanan nga mga tawo kinahanglan magbasol, matuo ha iya, ngan maginkaparte hini nga pagkaurusa. Damo it namamakiana, "Hain an Singbahan han Dios? Anhon namon paghibaro? "Kundi diri mababay-og an marig-on nga patukoranan nga iginpahamutang han Dios; ngan dida hini nahisurat ini nga mga pulong: nakilala an Dios han Iya mga sakop ngan kinahanglan magpahirayo ngan bumaya han maraot nga buhat an bisan hin-o nga nasiring nga sakop na hiya han Ginoo" (2 Timoteo 2:19). An mga pulong ni Apostol Pablo nagpapadayon nga matuod, "Kinahanglan kamo bumaya ha ira, ngan lumain ha ira. Ayaw kamo paghilabot han mahugaw, ngan kakarawaton Ko kamo. Magigin amay ako niyo, ngan magigin anak ko kamo nga kalalaken-an ngan kababayen-an, nasiring an Ginoo nga Labi ka Kamakagarahum (2 Cor. 6:17 & 18). Waray bisan usa nga diri kinahanglan bumaya hit nga tanan ngan magpas-an hit iya krus ngan sumunod ha Iya. Para hit kadam-an baga makuri ini hin duro (Mateo 19:16-22). Diri hira andam pagbaya hit kalibutan ngan hit nga tanan nga kairiphon hito para pagsunod ha Ginoo (Mateo 10:37-38). Kondi, amo ini an paagi han Dios. Karuyag niya nga an iya mga anak gawasnon hit bisan ano nga mga higot nga makaulang hit bug-os nga pagserbe ha Iya.
Ini nga mga tumuruo nagporma han lawas ni Cristo. Mayda nira hugot nga pakigkausa dida kan Cristo. Hadto nga panahon malipayon hira hit Ira bag-o nga natad-an nga pagtoo, "Ngan gin-gamit nira an panahon hin pag-aram han mga gintutdo han mga apostoles, dida hin minagburugto nga pakig-urusa ug dida hin pakig-angbitay ha sasaro ngan ha mga pag-ampo."(Mga Buhat 2:42). Amo la gihap ini nga pakig-usa an naeksperyensyahan han mga natawo hin utro yana nga mga panahon. Pareho la gihap nga Baraan nga Espiritu an iginhatag ha ira. An panutduan ni Cristo naghatag ha ira hin inspirasyon ngan ira nakita nga nakakaintende hira hit naeksperyensyahan han iba nga mga tumuruo sugad nga pareho hit ira naeksperyensyahan ha ira kinabuhi. Nakaabat hira hin pagkausa han pagpasalamat ngan pagdayaw han langitnon nga Amay nga pagbiling hin direksyon tikang ha Iya.
An tumuruo han Dios magtatalinguha ha pagtipig han mga sugo ni Hesus. Hiya nagsiring, "Kamo akon mga sangkay, kon iyo bubuhaton an bis ano nga akon iginsugo ha iyo" (Juan 15:14). Na siring liwat Hiya, "kun kamo nahigugma ha akon, tipigi niyo an akon mga sugo" (Juan 17:15) ngan, "kay-ano nga natawag kamo ha akon, Ginoo, Ginoo ngan diri Kamo nagbubuhat han mga butang nga ginsisiring ko ha iyo?" (Lukas 6:46). An Singbahan nga gintukod han Dios magpapadayon pagbuhat hit nga tanan nga Iya ginsugo. (Mateo 28:20). Usisahon naton it kasuratan para mahibaro kita han mga prinsipyo ngan mga doktrina nga kinahanglanon hit katalwasan.
Para matalwas an tawo, kinahanglan magbasol hiya hit iya mga sala. Para pag-andam hit kan Hesus pag-abot, hi Juan Bautista nagsiring "Magbasol ngan bayai an iyo mga sala kay harani na an Ginhadian han langit" (Mateo 3:2). Pagtikang ni Hesus han Iya minesteryo, pareho nga Pulong an Iya ginamit. "Bayai niyo an iyo mga sala, kay hirani na an Ginhadian han langit" (Mateo 4:17). Han adlaw han Pentecostal ginsidngan ni Pedro an mga tawo, "Pagbasoli ngan bayai an iyo mga sala, ngan magpabunyag an tagsatagsa ha iyo ha ngaran ni Jesu-Cristo, basi pasayloon an iyo mga sala, ngan kakarawaton niyo an Espiritu Santo nga hatag han Dyos." (Mga Buhat 2:38). Han pagwali ni Pedro, an mga tawo nakasantop hit ira mga sala ngan namakiana kon ano an ira angay buhaton. Amo gihapon an mahitabo yana, ngada ngan kahasta. An pagbasa han Bibliya ngan mga pagwali hit katalwasan magpapasantop hit makasasala. Tawag ini han Dios ngadto hit pagbasol. It pagbasol nagkinahanglan hin pag-abat hin kabug-aton hit sala, pagtalikod hini ngan pagbaya hit iya diri matadong nga kinabuhi ngan pagsaad nga maserbe ha Ginoo. An Dios maghatag han tawo hin testigo nga kamurayaw ha iya kasing kasing ngan pagpuno han Baraan nga Espiritu kon hiya magbasol. Amo ini an gintawag nga pagkatawo hin utro. Ha Singbahan han Dios, amo ini an kinahanglan basi mahimo hiya nga usa nga membro.
Hi Hesus simniring, "Ako amo an porta. Matatalwas an bisan hin-o nga masulod pinaagi ha akon, masulod-guwa hiya ngan makakaagi hin panibsiban."(Juan 10:9). Kon an usa ka tawo tuod gud nga natawo hin utro na sulod hiya pinaagi ha portahan. Ha hawa nga panahon, ginkompara ni Hesus an ginhadian han langit hin usa nga hadi nga naghimo hin usa nga bangkete hin kasal. Naghisgot hiya mahitungod hin usa ka tawo nga tinambong nga waray magsul-ot hin bado nga pangkasal. Ginpakianhan ini nga tawo kay ano nga tinambong hiya nga sugad. Ini nga tawo waray makabaton. "Ngan an hadi simniring han Iya mga suruguon, gapusa niyo an iya mga kamot ngan mga tiil ngan ilabog hiya ngadto han kasisidman ha gawas: didto nagtatangis hiya nga manliligot an iya mga ngipon." (Mateo 22:13). Pagkamabibido para ha usa ka tawo nga nadire pagsulod hini nga portahan.
An Singbahan han Dios nagbubuhat hin pagbautismo para ha usa ka magturuo. Para an usa ka tawo mabautismohan, kinahanglan may makit-an ha iya ebidensya han eksperiensya hin pagkatawo hin utro ngan kinahanglan matuod hiya han dugo ni Cristo nga makahugas han sala. "Matatalwas an bisan hin-o nga nagtoo ngan nabunyagan; kundi an diri natoo paghukman." (Mark 16:16). Nagsiring gihap hi Hesus nga, "Susumatan ko ikaw hin tinuod: waray tawo nga makakasulod han Ginhadian han Dyos labot kon matawo hiya pinaagi hin tubig ngan han Espiritu." (Juan 3:5). An pagbautismo usa nga pagpakita o tigaman ha gawas nga nagpakita nga mayda pagkalimpyo nga nahitabo sakob ha kasingkasing. Amo liwat ini an portahan ha Singbahan. Amo ini an paagi nga igintutdo ha Bibliya, sanglit an Singbahan nagpadayon pagtutdo ngan pagbuhat hini ha sugad nga paagi.
Hadton nakasulod ha Singbahan ha sugad hini nga kaagi amo an nagporma han kamagburugto dida han Kristo. Nalilipay hira han panagkaurusa (fellowship) ngan pagkaurusa (unity) han magtoroo. Para ini magpadayon, kinahanglan nga an ira relasyon kan Kristo magpabilin nga madig-on. Nagtutdo hi Hesus ha ira nga magkaada hira hin minagburugto nga pagpaid para ha usa kag usa. (Mateo 18:15-17). Nagtutdo Hiya nga kinahanglan an tagsa tagsa andam paghatag ngan pagkarawat hin pagsaway. Igintutdo ini ni Hesus basi mabuligan an nagsasayop. Iya ini ginbuhat para matalwas an ira mga kalag ngan pagtipig hit singbahan nga magpabilin ini nga putli. Pinaagi hini, mayda seguridad dida ha pagburubligay ha usa kag usa nga magpabilin nga matinumanon.
Ugsa matapus an kinabuhi ni Hesus, kinuha Hiya hin tinapay, ginpinitpinit ngan ginhatag ha Iya mga disipulo basi kaunon, ngan nagyakan, "Amo ini an akon lawas nga iginhalad para ha iyo. Buhata ini nga hinumdoman ha akon." (1 Cor. 11:24). Kinuha gihap hiya hin kopa nga may sulod nga bino ngan pinainom ha ira. Hiya nagyakan. "Amo ini nga irimnan an kanan Dyos bag-o nga ginsabotan nga gintigamnan han akon dugo. Buhata ini nga hinumdoman ha akon ha kada pag-iinom niyo hini" (1 Korinto 11:25). Ini an pagpahinumdom ha mga magtoroo han presyo han ginbaydan ni Jesus ha pagtalwas ha ira. Kahuman hito nagbagkus liwat hi Hesus hin tuwalya. Nagbuhos hiya hin tubig ha planggana ngan ginpamunasan an mga tiil han disipulo. Nariwa hi Pedro hini nga iya ginbuhat kondi ginsidngan hiya ni Hesus, “Kon diri ako mamusa han imo mga tiil, diri ka na magigin tinun-an ko” (Juan 13:8). Hiya gihap nagyakan "Sanglit kon ako nga iyo Ginoo ngan Magturutdo namusa han iyo mga tiil, angay man liwat kamo maggiparupamusa han iyo mga tiil. Gintagan ko kamo hin susbaranan, basi sugaron niyo hin pagbuhat han ginbuhat ko ha iyo." (Juan 13:14-15). Ini nga paghugas han mga tiil ginpapadayon pagbuhat hit Singbahan ha panahon nga may Baraan nga Pangumunyon.
An Dios naghunahuna han kalipay han tawo sugad man an pagpadayon hit tulin hit katawohan. Para hini, Iya gintukod an baraan nga pag-asawa didto ha Garden ha Eden ha butnga han usa nga lalake ngan usa nga babaye. Ini nga butang iya ginkomperma ngan gin-aprobahan han dinhi pa Hiya ha kalibutan. An baraan na pag-asawa gin-iisip ha Singbahan nga kanan Dios plano para ha kaupayan han katulinan han katawhan. An mga instruksyon ni Hesus parti hini amo an "mabaya an lalaki ha iya Amay ngan Nanay, ngan makikigtampo han iya asawa " ngan "Kinahanglan diri han tawo pagbulagon an gin-usa han Dyos." (Mateo 19:5-9). An mga Paraseo nagsukmat ha Iya kay ano nga hi Moses nagtugot man hin deborsyo. Ginsumatan hira ni Hesus nga diri ito sugad hit tinikangan kondi tungod hit katig-a hit ira kasingkasing. Sanglit an Singbahan nagpapadayon pagtutdo supak ha deborsyo o pagbulag hit kamag-asawa.
Usa pa nga importente nga doktrina nga gintututdo ngan ginsusunod hit singbahan amo an diri pag-ato. Nagyakan hi Hesus, "Ayaw pagbulos han nagpapakaraot ha imo. Kon may nagtampalo han imo tuo nga bayhon, ipatampalo liwat ha iya an imo wala nga bayhon." (Mateo 5:39). Iya ini ginpakita dida han gindakop hiya ngan gindara ha hukmanan ha diri makatadungan nga paagi. Han dida nga hi Pedro ha pagpanalipod kan Hesus pinaagi han pagtigbas ha talinga han usa han mga suruguon han gihataasi nga padi, ginyaknan hiya ni Hesus, “Ibalik ha takob an imo espada, kay adton magamit hin espada, mapatay pinaagi hin espada.”(Mateo 26:52). Ha halaba nga mga katuigan, an mga apostoles nga mga iba pa nagtipig hini ha ka madig-on bisan pa man kon nagkahulugan hin kamatayon ha kadam-an ha ira.
Iginbilin ni Hesus an pag-organisar ngan pagtukod hin mga singbahan ha iya mga apostoles. Hi apostol Pablo duro ka madasigon labis na hini nga buruhaton. Gintagan niya hin daku nga kabug-aton an usa nga maupay ngan maabtik nga ministeryo nga magin magmarangno han panon. Naghatag hiya hin instruksyon mahatungod hit mga hiyas nga kinahanglanon hit usa nga epektibo nga ministeryo. An mga Ministro kinahanglan mga tinawag han Dios ngan pinili tikang han mga kabugtuan nga kalalakinhan. Kinahanglan puno hira han Baraan nga Espiritu ngan mga matuod nga doktrina ngan panutduan.
An singbahan nagtatalinguha pagtutdo ngan pagbuhat han mga doktrina ni Hesus ngan han mga apostoles. Hinaot nga usisahon niyo an kasuratan basi mahibaro kon ikaw nagpadayon ba “ha doktrina han mga apostol ngan ha pakig-urusa ha ira" (Buhat 2:42). An imo gugma kan Hesus mapamatud-an han imo pagsunod hit iya mga Pulong. Hingyap Niya pagtungway ha imo han "singbahan han buhi nga Dyos, an harigi ngan sinarigan han kamatuoran." (1 Timoteo 3:15). Didto makit-an nimo an espirituhanon nga puruy-anan.