Ha tinikangan ginhimo han Dyos an kalibutan. Iya ginlarang an adlaw, bulan ngan mga bitoon, an mga hayop ngan mga tanom. Ha ikaunom ka adlaw ginhimo Niya an tawo uyon ha Iya kalugaringon nga dagway ngan ginhuyop ha iya an gininhawa han kinabuhi.
An siyahan nga lalaki amo hi Adan ngan an iya asawa hi Eva. Gintagan hira han Dios hin makaruruyag nga urukyan ha hardin. Hinigugma han Dios hira Adan ngan Eva ngan hinigugma nira an Dios. Ginsugo han Dios hi Adan nga atimanon an hardin. Ginsidngan hira han Dios nga makakaon hira han bisan ano nga karuyag nira, gawas la han kahoy han kahibaro han maopay ngan maraot, ngan nga mamamatay hira kon masupak hira hito.
Usa ka adlaw, usa nga makaharadlok nga butang an nahitabo! Nakasala hira Adan ngan Eva han nagtalapas hira ha Dios ngan kumaon han igindidiri nga bunga. Nahadlok hira ha Dios ngan timnago tikang ha Iya. Maaram an Dios kon hain hira natago. Kinmadto Hiya ngan gintawag hi Adan. Ginsidngan hiya han Dios nga tungod kay nagtalapas hira, kinahanglan bayaan nira an ira urukyan nga mahusay nga hardin.
Waray hingalimti han Dios hira Adan ngan Eva. Hinigugma pa gihapon Niya hira. Iya iginsaad nga ipapadara ha kalibotan an Iya bugtong nga Anak, hi Jesus. Hi Jesus mamatay tungod han ira mga sala basi hira mabuhi! “Kay an Dios naghigugma gud han kalibutan, nga Iya iginhatag an Iya bugtong nga Anak, basi nga an ngatanan nga natoo ha Iya, diri mawara, kondi ma may kinabuhi nga waray katapusan” (Juan 3:16).
Hi Jesus gud man imnabot! Igintutdo Niya nga an ngatanan nga tawo nakasala. An mga makasasala kinahanglan mamatay. Hinigugma gud kita ni Jesus salit ginsumatan Niya an Dios nga mamatay Hiya para han mga sala han ngatanan nga mga tawo. Namatay Hiya para ha kada usa nga tawo nga nakabuhat hin sayop.
Maopay nga sumat-- Buhi hi Jesus! Nabanhaw hiya! Hiya nagsiring, “Ako amo an dalan, an kamatuoran, ngan an kinabuhi” (Juan 14:6). Karuyag ni Jesus nga dad-on kita ngadto ha Iya langitnon nga Amay.
Usahay diri kita nakaabat nga hinigugma kita. An mga tawo ha aton palibot nasusubo, nagsasakit, o nasisina. Bangin nahadlok kita o may-ada kita hingyap ha sulod nga diri gud nawawara. Nagpapakiana kita kon hin-o an makakabulig ha aton, ngan kon kay ano nga naabat kita hin kamingaw. Iginbutang han Dios ito nga hingyap ha sulod gud han imo kasingkasing tungod kay hinigugma ka Niya. Usa ito nga espesyal nga butang nga nagdadani ha imo ngadto ha imo langitnon nga Amay. Karuyag han Dios nga maliwanan ito nga hingyap ha imo kasingkasing han Iya gugma.
Karuyag niya nga mag-ampo ka tikang ha imo kasingkasing ngan sumiring, “Jesus, kinahanglan ko ikaw. Guol na ako han akon mga sala. Alayon, Jesus, hugasi ako ngan matalikod ako tikang hini nga ngatanan nga mangil-ad nga mga butang”. Nabatian ni Jesus an imo sinsero nga pangamuyo. Ginhuhugasan ka niya basi magin malimpyo ngan magin andam ka para ha balay nga iya gin-aandam.
Ugsa bumaya hi Jesus hini nga tuna, hiya nagsiring: “Ayaw kabaraka an iyo mga kasingkasing: kamo natoo ha Dios, tumoo man kamo ha akon. Damo in mga kwarto didto han balay han akon Amay, ngan makadto ako hin pag-andam hin dapit para ha iyo. Makadto ako ha pag-andam hin lugar para ha iyo”. (Juan 14:1-2) Ito nga langitnon nga urukyan usa nga mamurayawon nga lugar diin may-ada waray kataposan nga kalipay ngan gugma.
Ginhimo ni Jesus ito nga urukyan nga makaruruyag hinduro salit diri gud niya tutugotan an bisan ano nga karat-an o sala ha sulod hito. Kon an aton kasingkasing mahugawan hin sala kon mamatay kita, diri kita tutugotan ni Jesus nga sumulod.
Maano daw in kahimtang han pag-ukoy kaupod ni Jesus? Diri na magkakaada hin kasakit, kahadlok o kagutom. Waray na an sakit, kamatayon, o masurub-on nga pagbulag. Didto magkakanta kita ngan magdadayaw ha Dios kaupod han mga linuwas ha bug-os nga tuna.
Ha kataposan nakauli na! Ha urukyan upod ni Jesus nga aton Manluluwas!