Pag-ila sa mga Taktika ni Satanas Pinaagi sa Kahayag sa Pulong sa Diyos
Ang tumong sa Balaang Bibliya dili ang pag-focus kang Satanas ug sa iyang buhat. Bisan pa niana, daghan kita' makita diha sa Bibliya nga nagpadayag sa iyang personalidad ug mga buhat.
Si Satanas kaniadto maoy usa ka manulonda, apan siya misukol batok sa Diyos, ang iyang magbubuhat, ug gusto nga mahisama Kaniya. Ang mga buhat sa mangitngit nga gingharian ni Satanas dili bag-o. Kini maoy tipikal sa iyang mga paningkamot sa daghang katuigan sa pagpakig-away sa gingharian sa Diyos. Siya nagtanyag og kapilian sa ginahimo sa Diyos, pinaagi sa gahom sa iyang Balaang Espiritu.
Atong mabasa diha sa Exodo ang gahom sa mga salamangkero sa Ehipto nga misulay sa pagsanay sa mga milagro nga gihimo sa Diyos pinaagi sa kamot ni Moises. Diha sa basahon ni Job, si Satanas nagbutyag nga nangabugho pag-ayo sa pagkamatinumanon ni Job ngadto sa Diyos. Siya migamit og kabangis aron sulayan si Job nga motalikod sa Diyos.
Ang mga paagi ni Satanas mao kini: kahadlok, mga hulga, mga saad sa kalipayan o gahom, pag-insulto, ug pagduda. Ang pipila sa unang mga butang nga iyang gipaila kanato daw makaiikag ug makapaikag. Siya misugyot, “Gusto ba nimong mahibaloan ang umaabot o makabaton og kahibalo nga dili mabatonan sa uban?” Siya mahimong mohatag og mga tambal nga dili masabtan sa siyensiya. Ang astrolohiya o panagna sa kapalaran tingali morag dili-makadaot, apan kini gisundan dayon sa pipila ka mahika nga mga pulong o mga pormula, ang pagtuman sa pipila ka adlaw ug ang kahadlok sa dili-maayong mga numero. Ang ideya nga dunay mga espiritu nga angayng tahoron ug kahadlokan tungod sa gahom nga ilang mabatonan kanato. Busa si Satanas nagbitik sa mga dili-mabinantayon ngadto sa mga dapit sa kahadlok kaniya ug sa iyang mga espiritu.
Daghan kaayong mga indibiduwal ang nahuptan sa pagkamausisaon sa mga butang nga, sa sinugdan, morag dili daotan. Pinaagi sa pag-eksperimento sa Ouija board, horoskopyo, pagbasa sa palad, ug daghan pang ubang mga buhat, sila nahimong daling maigo sa daotang mga espiritu sa dugang nga paghasol kanila.
Ang tumong ni Satanas mao ang pagguba ug sa kataposan paglaglag sa pagtuo sa mga Kristohanon sa Diyos. Ang Kristohanon makasinati og kadaogan pinaagi sa pagbaton og pagtuo kang Kristo ug Kaniya lamang. Ang tinguha sa pagkahibalo sa wala mailhi o ang kahakog sa gahom magtukmod sa usa usahay sa pag-eksperimento nianang anaa sa Satanikong gingharian. Ang yanong pagsalig sa Diyos magpahulay sa usa sa wala-maila ug magpalig-on sa usa sa bug-os nga pagsalig sa gahom ni Kristo.
Ang butang nga gisugdan tungod sa katingad-an o pag-eksperimento sa dili madugay magbitay sa usa diha sa usa ka talikala sa kahadlok; kahadlok sa kon unsay mahitabo, kahadlok sa mas dakong mga gahom, kahadlok sa ubang mga tawo, kahadlok kang Satanas mismo. Kining maong mga kahadlok nag-abot sa indibiduwal nga nagtugot sa iyang kaugalingon nga makaapil sa mga buhat nga dili-makataronganon. Sa pagtubag niining maong kahadlok, si Satanas nag-angkon nga dunay tambal. Siya nagtanyag og dugang gahom kon ang usa magpasakop sa iyang kaugalingon sa pipila ka rituwal o ubang mga pagsugot. Ang kahadlok sa ubang mga espiritu masulbad pinaagi sa pag-angkon o sa mas dakong gahom sa atong kaugalingon, matod niya. Sa ingon ang usa ka tawo gipailaila ngadto sa sunodsunod nga mga ang-ang sa gahom nga, inay magpahinabo sa indibiduwal sa pagkab-ot og mas dakong mga ang-ang sa kalinaw, hinungdan sa walay-kataposang pag-us-os ngadto sa kinahiladman sa satanikong dulumtanan. Ang kasegurohan nga gisaad ni Satanas napamatud-an nga dili-malamposon, nga gipulihan sa panginahanglan sa proteksiyon gikan sa mas hataas pa nga gahom niining daotang gingharian. Kini mao ang sistema sa Satanismo.
Ang plano ni Satanas mao ang pagpuli sa Diyos. Si Satanas gilalang aron musimba, dili aron simbahon. Siya dili usa ka labaw nga makagagahom; siya dili makabuntog sa Kordero sa Diyos; siya dili makahatag og kasegurohan; siya dili interesado sa atong kaayohan. Bisan pa niana siya padayong nagalihok sa paggamit og gahom ibabaw sa mga tawo aron sila ipailalom kaniya. Siya naningkamot sa pagpahinabo sa kawalay-pagsalig sa Diyos ug sa iyang gingharian. Siya naningkamot sa pagtukod og usa ka organisasyon nga ang iyang kaugalingon mao ang agalon. Kini maugmad pinaagi sa usa ka sistema sa kahadlok ug mga ilusyon sa gahom. Siya nagabuhat og mga katingalahang butang aron sa pagmugna ug kahadlok diha sa mga hunahuna sa mga tawo (2 Corinto 11:14-15). Ang epekto niining sistemaha mao ang paglaglag sa kalinaw ug kasegurohan diha sa mga indibiduwal, mga panimalay, ug mga kagamhanan. Kini magbihag sa mga tawo, nga magpahinabo kanila sa pagbati og grabeng hulga kon sila mosulay sa pagkalagiw.
Si Satanas mao ang labing mapait, labing malimbongon, labing mapintas, labing makalilisang nga kaaway nga inyong mabatonan. Siya wala gayoy dungog. Siya bakakon. Walay kamatuoran diha kaniya: "Siya usa ka bakakon, ug ang amahan niini" (Juan 8:44). Siya maoy usa ka mamumuno, usa ka tiglaglag. Siya mao ang mismong personipikasyon sa pagdumot ug sa pagkadaotan. Siya hingpit nga daotan, nga walay bisan unsang maayong butang.
Si Satanas mao ang tigpasiugda sa tanang daotan. Walay krimen o sala nga daotan kaayo o mahugaw kaayo alang kaniya. Siya mao ang hinungdan sa tanang pagdumot, sa tanang pagpatay, sa tanang pag-abuso sa bata o asawa, sa tanang pag-abuso sa droga, sa tanang imoralidad, sa tanang nabungkag nga mga panimalay, sa tanang panaglalis, sa tanang panghuwit, sa tanang pagkadili-matinud-anon. Siya nalipay sa pagpahinabo og mga krimen tungod sa kailibgon ug sa pagkadaotan, mga krimen nga gihimo batok sa inosenteng mga tawo nga nahulog sa mga kamot sa mga tawong daotan o mahugaw. Siya walay kaluoy ug dili magpasaylo. Ang pag-antos dili makapukaw ug kaluoy diha kaniya. Ang pag-ula og dugo ug kamatayon maoy mga himan nga iyang gigamit sa pagkab-ot sa iyang mga tumong. Siya mianhi aron sa pagpangawat, sa pagpatay, ug sa paglaglag (Juan 10:10).
Ang walay-kataposang kapalaran ni Satanas gihukman na. Adunay usa ka dapit sa walay katapusan nga kalayo nga giandam alang kaniya ug sa iyang mga manulonda (Mateo 25:41). Interesado siya sa pagpahinabo nga daghang tawo kutob sa mahimo ang mag-antos nianang maong pagsakit uban kaniya. Siya nahibalo nga mahimo niya kini pinaagi sa pagkunhod ug sa kataposan sa paglaglag sa atong pagtuo sa Diyos. Buhaton niya kini pinaagi sa dayag nga paghagit sa Pulong sa Diyos o pinaagi sa malimbongong pagdasig sa dili-mainit, walay-pagtagad, malinawon nga Kristiyanidad.
Adunay kaluwasan pagawas gikan sa mga bitik ni Satanas. Buot niyang motuo ka nga wala nay laing paagi. Ang Bibliya nag-ingon kanato nga si Jesus mianhi aron sa pagluwas sa mga binilanggo. Siya mianhi aron sa paghatag og kinabuhi. Si Jesus mao ang dalan, ang kamatuoran, ug ang kinabuhi (Juan 14:6). Sa iyang kinabuhi dinhi sa yuta si Jesus nagpakita sa iyang gahom ibabaw ni Satanas pinaagi sa pagsukol sa mga pagsulay ni Satanas ug pinaagi sa pagpagula sa daotang mga espiritu pinaagi sa Pulong sa Dios (Mateo 4:1-11; Marcos 9:25-26). Gidaog ni Jesus ang gahom ni Satanas pinaagi sa iyang kamatayon sa krus ug sa iyang pagkabanhaw gikan sa mga patay.
Makabenepisyo ba kita niining kadaogan ug makabuntog sa dakong kaaway sa atong mga kalag? Una, angay natong ilhon nga kita nabihag ni Satanas ug nabugkos sa iyang kahadlok. Kinahanglang natong dawaton nga kini makasasala ug nga kita mawala kon magpabilin kita niining kahimtang. Sa dihang atong masabtan nga kita dili makagawas sa atong kaugalingon gikan sa pagdakop ni Satanas, kita kinahanglang magtuaw sa Diyos alang sa kaluwasan uban sa atong tibuok nga kasingkasing. Kinahanglang maghinulsol kita, ug mobiya sa atong mga sala. Kinahanglang dawaton nato pinaagi sa pagtuo ang halad-sa-pag-ula nga dugo ni Jesu-Kristo alang sa atong mga sala. Kita kinahanglang magpasakop sa atong kaugalingon sa Diyos, modawat sa iyang kapasayloan ug matinumanong magsunod sa iyang Pulong. Sa dihang atong matuman kining maong mga kondisyon Siya mohatag kanato og pakigdait uban Kaniya, magpahilum sa kaguol diha sa atong mga kasingkasing, magpasaylo sa atong mga sala, maghatag kanato ug bag-ong kinaiya ug maghimo kanato nga usa sa iyang mga anak. Mao kini ang kahulogan sa pagkatawo pag-usab. Bisan kinsa nga mosupak sa pagtawag sa Diyos anaa gihapon sa gingharian ni Satanas, ug ang tiglimbong sa ngadtongadto mokuha nianang tawhana uban kaniya ngadto sa walay-kataposang pagsakit.
Kon wala ka makasabot sa plano nga gihimo sa Diyos alang kanimo, tun-i ang Pulong sa Diyos, pag-ampo Kaniya uban ang tim-os nga kasingkasing, ug Siya mogiya kanimo sa dalan. Ang Diyos nagatawag kanimo ngadto sa Iyang kaugalingon ug gusto nga makaikyas ka gikan sa pagkaulipon ni Satanas. Hinaot nga panalanginan ka sa Diyos. Basaha ang Salmo 91.
Dugang nga basahonon:
Lucas 11:20-23 ....... Usa nga mas kusgan kay kang Satanas
Roma 6:20-23 .... Wala'y sala
Isaias 61:1 Kagawasan sa mga bihag
Roma 8:1-2 ........ Wala na mag-antos