John N. Reynolds
Usa han pinakamakaruruyag nga mga kaso han pagbuhi han namatay o nakaturog nga pasyente nga akon hinbaroan amo an kan George Lennox, usa nga kilala nga kawatan hin kabayo ha Jefferson County. Nagseserbisyo hiya han iya ikaduha nga termino. Ginpadara hiya han kondado han Sedgwick ngadto ha prisohan ha siyahan nga higayon para han pariho nga sala - nga pagpangawat hin mga kabayo.
Han panahon han han kathagkot han 1887 ngan 1888 nagtrabaho hiya ha mga minahan han karbon. An lugar nga iya gintatrabahoan baga hin peligroso ha iya. Iginsumat niya an kamatuoran ha opisyal nga nagdudumara, nga naghimo hin pag-eksamin, ngan ha pagdesisyon nga talwas an kwarto, nagsugo hi Lennox nga bumalik ha iya trabaho. An konbikto, nga nasugot, waray pa nakatrabaho hin sobra usa ka oras, han nahulog an atop ngan bug-os nga iginlubong hiya. Nagpabilin hiya hini nga kahimtang hin bug-os nga duha ka oras.
Nasabtan nga waray hiya ha oras han pangaon, gintikangan an pagbiling han nawara nga konbikto, ngan hin-agian hiya ha ilarom hini nga tambak han basura. Bagan waray na kinabuhi. Gindara hiya ha igbaw, ngan han gin-eksamin han doktor han prisohan, iginpahayag nga patay na hiya. Gindara an iya patay nga lawas ngadto ha ospital kun diin hiya ginhugasan ngan ginsul-otan, pinangandaman para han paglubong. Ginhimo an iya lungon ngan gindara ha hospital. Inabot na an chaplain basi buhaton an ultimo nga masurub-on nga mga rituwal ha pag-andam ha paglubong. Duha nga mga priso an ginsugo han tinaporan han ospital nga alsahon an patay nga lawas tikang ha mga tabla ngan dad-on ito ha tabok han kwarto ngan ibutang ito ha lungon. Nagsugot hira, an usa ha ulohan, an usa ha tiilan ngan mga katunga na han tabok han kwarto an usa nga aada ha ulohan aksidente nga nahipakdol ha usa nga cuspidor, nawarayan hin balanse, ngan nahulog an patay nga lawas. An ulo han patay nga tawo naigo ha salog, ngan ha bug-os niya nga kahipausa ngan han kahipausa han ngatanan nga nakadto, may nabatian nga hilarom nga pag-agulo. Ha waray pag-iha, nag-abri han mga mata, ngan nakitaan nga may hitsura han kinabuhi. Ginpatawag dayon an doktor, ngan han pag-abot niya, mga traynta minutos an naglabay, an patay nga lalaki nag-aro hin usa ka tasa nga tubig, ngan nainom hiya han umabot an doktor.
Ginkuha dayon an lungon ngan ha waray kaiha gin-gamit ha paglubong hin usa pa nga konbikto. Ginkuha liwat ha iya an iya mga bado ha paglubong, ngan ginsaliwanan han bado han prisohan. Ha pag-eksamin nakit-an nga mayda niya bari nga usa nga bitiis ha duha nga parte, ngan mayda iba nga mga samad. Nagpabilin hiya ha ospital hin mga unom ka bulan, ngan nagtrabaho utro.
Hinbaroan ko an iya kakaiba nga eksperyensya nga daw patay na hiya ha haligot nga panahon, tikang ha igkasi katrabaho ha minahan. Tungod han pag-usisa, naghingyap ako nga makita ko hi Lennox basi makuha an iya eksperyensya tikang ha iya nga mga im-im. Waray ighatag ini nga higayon ha akon sulod hin pipira ka bulan. Ha kataposan inabot ito. Katapos kuhaa tikang ha minahan igindetalye ako ha usa han mga opisina han prisohan basi maghimo hin pipira nga tinuig nga report. Usa ka adlaw, ginhihisgutan an topiko han pagbalik hini nga tawo ha kinabuhi, ngan natungnan nga lumabay hiya ha purtahan han opisina ngan igintudlok ha akon. Waray adto pag-iha nga mayda ko surat ha iya kamot, ngan ginhangyo hiya nga kumadto kun hain ako natrabaho. Ginbuhat niya ito, ngan dinhi nakilala ko hiya hin maopay, ngan tikang ha iya nga mga im-im nakarawat ko an iya urusahon nga istorya. Usa hiya nga batan-on nga lalaki, bangin diri pa sobra hin traynta anyos an edad. Usa hiya nga matig-a an ulo nga kriminal hadto; may-ada maupay nga edukasyon, ngan natural nga baltok.
An pinakaurusahon nga bahin han iya istorya nahitabo ha panahon nga patay na hiya. Tungod kay shorthand reporter ako, ginkuha ko an iya istorya tikang ha dikta.
Hiya nagsiring: “May-ada ako paghunahuna ha bug-os nga aga nga may-ada makangingirhat nga mahitatabo. Waray ako komportable nga abat ngan tungod han akon mga pagbati kinadto ako ha akon agaron ha pagmina nga hi Mr. Grason nga nasiring nga waray peligro, ngan nga naghunahuna hiya nga ‘nagigin iritabli’ la ako. Binmalik ako ha akon trabaho, ngan nag-iinuukab ako sugad hin usa ka oras, han tigda la, nagsirom hin duro. Katapos, baga hin nag-abri an daku nga puthaw nga purtahan ngan umagi ako hito. Katapos, inabot ha akon hunahuna nga patay na ako ngan aadto na ako ha iba nga kalibotan. Waray ako nakikita nga tawo, o nababatian nga tunog hin bisan ano nga klase. Tikang hin pipira nga hinungdan nga diri ko hinbabaroan, nagtikang ako pagpaharayo tikang ha purtahan, ngan nakaglakat na ako hin hirayo han umabot ako ha pangpang hin haluag nga salog. Diri ito masirom, diri liwat ito mapawa. Haros pariho it kalamrag ha malamragon ngan may mga bitoon nga gab-i. Waray pa ako magpabilin hin maiha ha ligid hini nga salog tubtob nga nabatian ko an tunog han mga bugsay ha tubig, ngan ha waray pag-iha may-ada tawo nga nasakay hin baluto nga nagbugsay tikadto ha akon gintitindogan.
"Waray ako makayakan. Ginkinita niya ako hin madaliay, ngan katapos nagsiring nga kinadto hiya para ha akon, ngan ginsidngan ako nga sumakay ha baluto ngan magbugsay ha tabok ngadto ha luyo nga bahin. Sumugot ako. Waray ko bisan usa nga pulong nga iginyakan. Ginhingyap ko nga pakianhan hiya kon hin-o hiya, ngan kon hain ako. An akon dila baga hin nadukot ha atop han akon baba. Ha atbang nga baybayon, gumawas ako ha baluto, ngan nawara an paradara han baluto.
"Sugad nga ginbayaan nga nag-uusahan, waray ako mahibaro kun ano an akon bubuhaton. Pagkita ha akon atubangan, nakita ko an duha nga aragian nga nag-aagi hin masirom nga walog. An usa hini usa nga haluag nga aragian ngan baga hin gin-inagian na gud hin damo nga mga tawo. An usa usa nga haligot nga dalan ngan nagtutugway ngadto hin iba nga direksyon. Kinaiya ko nga ginsunod an dalan nga gin-agian hin maupay. Waray pa ako makahirayo han baga hin nagtitikasirom na. Bisan pa man, usa nga kapawa an nagkikidlap tikang ha hirayo, ngan hini nga paagi ako in nalamragan ha akon pagbiyahe.
"Ha pagkayana gintapo ako hin usa nga nilalang nga diri ko gud maihuhulagway. Makakahatag la ako ha iyo hin gutiay nga ideya han iya makaharadlok nga hitsura. Medyo sugad hiya hin tawo, pero mas dako hin duro kaysa hin bisan hin-o nga tawo nga akon nakita. Sigurado nga diri maminos hin 10 feet an kahitaas. May-ada hiya dagko nga mga pako ha iya likod. Itom hiya sugad han karbon nga akon gin-uukab, ngan hingpit nga hubo an kahimtang. Mayda niya bangkaw ha iya kamot, nga an karaptan hini sigurado nga bug-os nga 15 ft. an kahilaba. An iya mga mata nga iginpapakita sugad hin mga bola hin kalayo. An iya mga ngipon, nga busag sugad hin perlas, baga hin bug-os nga usa ka pulgada an kahilaba. An iya irong, kun matatawag nga irong, dako hin duro, haluag, ngan pingak. Matig-a hinduro an iya buhok, mabug-at ngan hilaba. Nabitay ito ha iya dagku nga mga abaga. An iya tingog mas baga hin mga pagngurob han leon ha butnga han mga kahayopan kay han bisan ano nga akon nahinunumdoman.
"Ha sulod han usa han kapawa han mga kidlat nga una ko hiya nga nakit-an. Nangurog ako han pagkita sugad hin dahon ha kahoy nga gin-hihinuyop. Gin-alsa niya an iya bangkaw nga baga hin ihahapil ini ha akon. Tigda ako nga inundang. Hiton makaharadlok nga tingog nga baga hin nababatian ko pa, ginsugo niya ako nga sundon hiya; nga iginpadara kono hiya paggiya ha akon. Simnunod ako ha iya. Ano pa an akon mahihimo? Katapos niya maglakat hin hirayo, may-ada ako nakit-an nga daku nga bukid nga nagtipaigbaw ha amon atubangan. An bahin nga naatubang ha amon baga hin patindog, nga baga hin gin-utod hin duha an bukid ngan ginkuha an usa nga bahin. Hinin patindog nga bungbong nakikita ko hin matin-aw ini nga mga pulong, ‘Ini an Impyerno.’ An akon giya dinaop hinin patindog nga bungbong, ngan gamit an iya karaptan han bangkaw naghatag hin tulo nga makusog nga pusdak. Usa nga daku nga daku hinduro nga purtahan an nag-uyog tipaatras ngan inagi kami tipasulod. Katapos, gindara ako ha baga hin aragian hini nga bukid.
"Ha sulod hin pipira ka panahon nagbiyahe kami ha daw kasisidman han Ehipto. Nababatian ko an mabug-at nga mga tiil han akon giya ngan salit nasusundan ko hiya. Ha bug-os nga dalan nababatian ko an hilarom nga mga pag-agulo sugad hin may-ada namamatay. Dugang pa, ini nga mga pag-agulo nagtikaduro, ngan klaro nga nababatian ko an singgit nga tubig, tubig, tubig. Pag-abot yana ha iba nga ganghaan, ngan pag-agi, nababatian ko, baga hin, usa ka milyon nga tingog ha hirayo, ngan an singgit para hin tubig, tubig. Ha pagkayana usa pa nga daku nga purtahan an nag-abri ha pagtuktok han akon giya, ngan akon hin-agian nga umagi kami ha bukid, ngan yana usa nga haluag nga kapatagan an aada ha akon atubangan.
“Hini nga lugar ginbayaan ako han akon giya basi giyahan an iba nga nawara nga mga espiritu ngadto ha pariho nga destinasyon. Nagpabilin ako dinhi hinin mahawan nga kapatagan hin usa ka panahon, han inabot ha akon an usa nga linarang nga medyo pariho han siyahan; pero imbes nga bangkaw may-ada hiya daku nga espada. Kinadto hiya basi isumat ha akon an akon tidaraon nga kabungkagan. ‘Aadi ka ha impyerno,’ siring niya: ‘kay ha imo pinalagiw an ngatanan nga paglaom. Samtang naagi ka ha bukid ha imo pagtikadi, hinbatian mo an mga pag-agulo ngan mga guliat han mga nawara samtang nangangaro hira hin tubig basi matugnawan an ira uga nga mga dila. Ha ligid hito nga aragian may-ada purtahan nga nag-aabri ngadto ha linaw han kalayo. Ha diri mag-iiha ini an imo kataposan. Ugsa ka dad-on hini nga lugar han pagsakit nga waray na gud makakagawas - kay waray na paglaum para hadton mga masulod didto - tutugotan ka nga magpabilin hini nga mahawan nga kapatagan, diin igintutugot ha ngatanan nga nawara nga makita an ira bangin matagamtaman imbes nga an ira kinahanglan antuson.’
"Upod hini ako in nahibilin nga nag-uusahan. Resulta ba ini han makangingirhat nga kahadlok nga akon gin-agian diri ako maaram, pero yana nagin bagan lurong ako. Usa nga makapoy nga pag-ubos an bug-os nga nagsakop han akon lawas. An akon kusog binaya ha akon. An akon mga tiil nagdumiri na pagsuporta ha akon. Katunga nga nagmamata, katunga nga nakaturog, Baga hin nag-iinop ako. Ha hirayo ha igbaw ko, nakita ko an Matahom nga Syudad nga amon ginbabasa ha Biblia. Urusahon gud an kaanyag han mga pader hito nga jasper. Ha unhan ngan ha unhan pa, nakita ko an haluag nga kapatagan nga natatabonan hin mag-opay nga bukad. Ako liwat, nakakita han salog han kinabuhi ngan han dagat nga salamin. Damu hinduro nga mga anghel an maagi ngan magawas ha mga ganghaan han syudad, nga nagkakanta, oh, sugad kahusay nga mga kanta. Lakip han kadamu han akon nakita an akon hinigugma nga lagas nga nanay, nga namatay pipira ka tuig na an naglabay tungod han nasusubo nga kasingkasing tungod han akon karaotan. Ginkita niya ako ngan baga hin ginsinyasan ako nga kumadto ha iya, pero waray ako makakiwa. Baga hin may-ada daku nga kabug-at ha akon nga nagpupugong ha akon. Yana usa nga malumo nga hangin an nag-aawas han hamot hadton makaruruyag nga mga bukad tipakadto ha akon, ngan mas klaro ko yana kay han una, nababatian ko an matam-is nga melodiya han mga tingog han mga anghel, ngan nagsiring ako, ‘O, unta magin usa ako ha ira.’
"Samtang nag-iinom ako tikang hini nga kopa han kalipayan tigda ini nga nahulog tikang ha akon mga im-im. Napukaw ako tikang han akon mga katurog. Ginpabalik ako tikang ha malipayon nga tuna han inop han usa nga priso han akon masirom nga urukyan, nga nagsiring nga panahon na yana nga sumulod ha akon tidaraon nga karera. Ginsugo niya ako nga sumunod ha iya ngan ginsundan ko utro an akon pitad. Ha usa ka panahon, han umabot kami ha usa nga purtahan nga nag-aabri ha ligid han aragian, ngan paglakat hini, ha katapusan naabtan namon an amon kalugaringon nga naagi ha lain nga purtahan, ngan kitaa, nakita ko an danaw o lake han kalayo!
“Ha atubangan ko gud nakikita ko, tubtob ha maabot han mata, iton literal nga danaw han kalayo ngan asupre. An dagku nga mga balud han kalayo magliligid ha kada tagsa, ngan an dagku nga mga balud han naglalaga nga laga mag-iinaringasa ha kada tagsa ngan malumpat ha kahanginan pariho han mga balud han ilarom han makusog nga bagyo. Ha pungkay han mga balud nakikita ko an mga tawo nga nasaka, pero ha diri mag-iiha dadad-on utro tipaubos ngadto ha pinakahamubo nga kahiladman hinin makangingirhat nga danaw han kalayo. Kon dadad-on ha pungkay hinin makangingirhat nga mga balud ha sulod hin usa ka panahon an ira mga sumpa kontra ha matadong nga Dios magigin makangingirhat, ngan an ira makalolooy nga mga pagsinggit para hin tubig magigin makangingirhat. Inin haluag nga rehiyon han kalayo nag-alingawngaw ngan nag-alingawngaw utro han mga pagnguyngoy hinin nawara nga mga espiritu.
“Ha pagkayana ginlingi ko an akon mga mata ngadto han purtahan nga gin-agian ko hin pipira ka gutlo antes ako sumulod, ngan ginbasa ko ini nga makangingirhat nga mga pulong, ‘Ini an imo kataposan; waray kataposan an kadayonan.’ Ha waray pag-iha nagtikang ako umabat nga an tuna nag-uubos ha ilarom han akon mga tiil, ngan naabtan ko an akon kalugaringon nga nalulunod ngadto ha danaw nga kalayo. Usa nga diri maisaysay nga uhaw ha tubig an nag-agaw yana ha akon. Ngan han pagtawag hin tubig nabuklad ko an akon mga mata ha prisohan han hospital.
"Waray ko pa gud igsumat ini nga akon eksperyensya hadto tungod han kahadlok nga an mga opisyal han prisohan makapot hini, hunahunaon ako nga lurong ngan trangkahan ako ha balay han manikol. Gin-agian ko ini ngatanan, ngan kontento ako sugad ha akon nga ako nabubuhi, nga may-ada Langit ngan may-ada Impyerno, ngan regular nga kadaan nga Impyerno, an klase nga iginsusumat han Biblia. Pero mayda usa nga butang nga sigurado, diri na gud ako makadto hito nga lugar.
"Pag-abri ko la han akon mga mata ha ospital ngan nakita ko nga buhi ako ngan aada ha tuna hin makausa pa, iginhatag ko dayon an akon kasingkasing ha Dios ngan mabubuhi ngan mamamatay ako nga Kristiano. Samtang an makangingirhat nga mga kiritaon han Impyerno diri gud mapaiwas tikang ha akon panumduman, diri liwat mapaiwas an mag-upay nga mga butang han Langit katapos ko makita. Makikigkita ako ha akon mahal nga lagas nga nanay katapos hin pira ka panahon. An pagtugot nga lumingkod ha pangpang hiton matahom nga salog, maglinakat-lakat upod hadton mga anghel ha tabok han kapatagan, ha mga walog ngan ha bawbaw han mga bungtod nga gin-alpombrahan hin mahamot nga mga bukad, nga an kaanyag hito labaw gud ha bisan ano nga mahahanduraw han mortal; ha pagpamati han mga kanta han mga natalwas - ini ngatanan labaw pa han pagbayad ha akon han pagkinabuhi han kinabuhi han usa nga Kristiano dinhi ha tuna, bisan kon kinahanglan ko isalikway an damu nga mga kalipayan ha lawas nga akon ginpatuyang antes ako umabot ha prisohan. Ginbayaan ko an akon mga kaupod ha krimen, ngan makikig-upod ako ha mag-opay nga mga tawo kon magin talwas na liwat ako nga tawo.”
Iginhahatag namon an sumat ha magbarasa sugad la han amon pagkarawat tikang kan Lennox. Hinaot unta nga bendisyunan han Dios ini nga eksperyensya ngadto han pagpukaw han damo nga nawara nga kalag.
Gin-aano pagruruhaduha han mga tawo ha totoo nga pag-eksister han literal nga naglalaga nga impyerno? May-ada kita Biblia, an Pulong han Dios, ngan mga kapahayagan pariho han kan Mr. Lennox nga nagtututdo han literal nga impyerno. Mga kalalakin-an ngan mga kababayin-an, undang na kamo! Atubanga an mga kamatuoran! An imo kinabuhi nagtitikang na pagrekord. Karuyag han Dios nga talwason ka ngan papasayloon ka niya kon andam ka na kumarawat nga makasasala ka. An dalan la ngadto han katalwasan amo an paglimpyo tikang han sala, pinaagi han pagkarawat han dugo ni Jesukristo sugad nga halad para han imo mga sala. Kon karawaton mo ini nga kapasayloan tikang ha Dios, tatagan ka Niya hin kamurayawan ngan kapahuwayan ha imo kasingkasing. Pwede ka magin talwas o malibre - makalibre hini nga kinabuhi ngan damo pa, libre nga maeksperyensyahan an kalipay han langit imbes nga an kamatuoran nga diri la kap-atan kag walo ka oras, kundi usa nga kadayonan ha impyerno.
An Riko nga Tawo Ngan Hi Lazaro
(Lukas 16:19-31)
“May-ada usa nga riko nga tawo, nga nakasul-ot hin purpura ngan maopay nga lino, ngan nagkikinabuhi hin magarbo ha adlaw-adlaw: Ngan may-ada usa nga makililimos nga an ngaran hi Lasaro, nga nahimumutang ha ganghaan han iya ganghaan, nga puno hin mga samad, ngan karuyag niya kumaon han mga mumho nga nahulog tikang ha lamesa han riko. Namatay, ngan gindara han mga anghel ngadto ha dughan ni Abraham: an riko nga tawo namatay man, ngan iginlubong;
“Ngan didto ha impyerno, hinangad niya an iya mga mata, nga nagsasakit, ngan hinkit-an niya hi Abraham ha hirayo, ngan hi Lasaro ha iya dughan. Ngan hiya nagsinggit ngan nagsiring Amay Abraham, kalooyi ako, ngan sugoa hi Lasaro basi itunlob niya an punta han iya tudlo ha tubig, ngan patugnawon an akon dila; tungod kay ako ginsasakit hini nga laga. Nagsiring hi Abraham, ‘Anak ko, hinumdumi nga han buhi ka pa, kinarawat mo an mag-opay nga mga butang, ngan hi Lazaro nakarawat han magraot nga mga butang: kondi yana hiya naliaw, ngan ikaw nagsasakit, ngan labot hini ngatanan, may-ada daku nga lungib ha butnga naton ngan ha iyo: sanglit an mga karuyag umagi tikang dinhi ngadto ha iyo diri makakaagi;
“Katapos, hiya siniring: Busa, nakikimalooy ako ha imo, amay, nga sugoon mo hiya ngadto ha balay han akon amay: Kay may-ada ako lima nga kabugtoan, basi hiya magpamatuod ha ira, basi diri hira umabot liwat hini nga lugar han kasakitan. Hi Abraham nagsiring ha iya: May-ada hira Moises ngan mga manaragna, papamatia hira ha ira. Binmaton an tawo, ‘Diri, amay Abraham, kondi kon kumadto ha ira in usa nga mabanhaw, magbabasol hira han ira mga sala. Ngan hiya siniring ha iya: Kon diri hira mamati kan Moises ngan ha mga manaragna, diri man hira makokombinse, bisan kon may mabanhaw tikang ha mga minatay.”
Dugang nga Pagbasa han Kasuratan: Pahayag 21:7-8; Pahayag 20:10, 12, 13; 2 Pedro 3:10-12.
Disclaimer
Iginhahatag namon an sumat ha magbarasa sugad la han amon pagkarawat tikang kan Lennox. Nakikilala naton an kawaray kapas han hunahuna han tawo ha paghulagway han langit o impyerno. Salit an sumat ni Mr. Lennox bangin diri husto nga paghulagway han impyerno kondi lugod pagsiplat la ha kadayonan. Hinaot unta nga bendisyonan han Dios ini nga eksperyensya ngadto han pagpukaw han damo nga nawawara nga kalag.