Maaram ka ba nga may-ada Usa nga maaram han ngatanan mahitungod ha imo? An Dios an naghimo han kalibotan ngan han ngatanan nga aada hito. Hi Jesus, an Anak han Dios, maaram liwat han ngatanan nga imo nabuhat. Maaram Hiya han naglabay, yana, ngan tiarabot. Hinigugma ka Niya ngan kinanhi ha kalibotan basi talwason ka tikang ha sala. May plano Hiya para ha imo kinabuhi basi magin malipayon ka.
Usa ka adlaw nagbibiyahe hi Jesus upod an Iya kasangkayan. Imnabot Hiya ha usa nga baryo ha Samaria. Lumingkod hi Jesus ha ligid han atabay basi magpahuway samtang an Iya kasangkayan napakadto pagpalit hin pagkaon. Samtang nalingkod hi Jesus didto, may babaye nga inabot basi magkuha hin tubig ha atabay. Hi Jesus nasiring ha iya: “Pwede mo ako tagan hin mainom?”
Nahipausa an babaye. “Ginhahangyo mo ako hin maiinom? Diri ka ba maaram nga ako usa nga Samaritano ngan an imo mga tawo, an mga Judio, waray pa labot labot ha amon?”
Hi Jesus bimnaton ngan simniring ha iya, “Kon ikaw gud man nakakakilala han Dios ngan kon hin-o an kaestorya mo, ikaw mangangaro ha iya, ngan hiya mahatag ha imo hin buhi nga tubig. Malipayon ko unta nga buhaton ito.”
An babaye nahipausa nga kumita ha Iya. “Sir,” siring niya, “hilarom an atabay. Waray ka bisan ano nga gamit ha pagkuha hito. Paonan-o mo kukuhaon ini nga buhi nga tubig?”
Hi Jesus binaton, ngan siniring ha iya, “An ngatanan nga mainum hini nga tubig, uuhawon utro; Kondi kon uminom ka han tubig nga akon ihahatag, diri ka na gud uuhawon utro.”
Nagsiring ha Iya an babaye, “Sir, tagi gad ako hini nga tubig, basi diri na ako uhawon, ngan diri na ako magbinalikbalik nganhi hin pag-alog.”
“Kadtoa, sumati an imo bana ngan balik nganhi.” siring ni Jesus.
“Waray ako bana” bimnaton an babaye.
“Tuod ito,” siring ni Jesus. “Kay lima na an imo iginkaasawa, ngan diri mo bana iton iginkakalumon mo yana.”
Gin-ano, nakaghunahuna hiya, paghibaroi hini nga lalaki an mahitungod ha akon? “Sir, nakita ko nga usa ka nga manaragna. May-ada ako pakiana ha imo. An akon katawohan nagsisingba ha Dios dinhi hini nga lugar. Nasiring kamo nga an Jerusalem amo an lugar nga pagsisingbahon.”
Hi Jesus sumiring ha iya, “Diri importante kon diin kita nagsisingba; yana an tuod nga mga tumuroo makakagsingba ha Amay ha espiritu ngan ha kamatuoran bisan diin.”
“Maaram ako nga maabot an Mesiyas, nga gintatawag nga Kristo,” nasiring an babaye, “ngan kon umabot na Hiya, susumatan kita Niya han ngatanan nga mga butang.”
Katapos, simple la nga nagbaton hi Jesus, “Ako amo Hiya.”
Ginbayaan niya an iya tibod ngan binmalik ha syudad. Nagsiring hiya, “Tana, kitaa niyo an Tawo nga nagsumat ha akon han ngatanan nga akon nabuhat. Diri ba Hiya an Kristo?
Niyan nagkagawas an mga tawo han syudad ha pagtapo kan Jesus. Damu an natoo nga hiya an Kristo, an Manluluwas, tungod kay maaram Hiya han ngatanan mahitungod ha ira. Mahimo mo basahon ini nga sumat ha Biblia ha St. Juan 4:3-42.
Maaram hi Jesus han ngatanan mahitungod ha aton, ha maopay sugad man ha maraot. Karuyag naton itago an magraot nga mga butang nga aton nabuhat ha aton kinabuhi, kondi diri naton ito matatago kan Jesus. Kinmanhi Hiya basi talwason kita tikang ha sirot nga angay ha aton tungod ha pagbuhat hin sayop. Iya makuha ito nga mabug-at nga pagbati nga inaabat naton ha aton kasingkasing ngan ihatag ha aton an kamurayawan. Namatay Hiya basi kuhaon an aton mga sala ngan magkamay-ada hin balay ha langit kon mamatay kita.
Hi Jesus an baton han ngatanan niyo nga mga panginahanglan ngan mga pakiana. Karuyag Niya nga magin sangkay mo. Karuyag Niya pun-on an kawad-on o buho han imo kasingkasing. Iya maliliwanan an imo kahadlok ngan kaguol hin kamurayaw ngan kalinaw.