"Paghidait, hain an kalinaw- para han aton mga nasud, han aton mga panimalay, ngan labaw ha ngatanan para han aton mga kasingkasing ngan mga hunahuna?" Ini nga masurub-on nga pagsangpit nabatian ha bug-os nga kalibotan. Amo ba liwat ito an pagtangis han imo kasingkasing?
Nanluluya ngan nababaraka an mga tawo. Ha waray ruhaduha ginkikinahanglan gud an giya ngan sagdon, seguridad ngan pagsarig. Karuyag naton an kamurayawan ha hunahuna.
Kalinaw ha hunahuna - bahandi gud ito! Mabibilngan ba ini nga bahandi ha kalibotan nga puno hin panagsamok ngan kasubo, ngan problema?
Nagtitikang an daku nga pamiling! Damu nga mga tawo an namimiling hin kamurayawan ha kabantogan ngan bahandi, ha kalipayan ngan gahum, ha edukasyon ngan kahibaro, ha tawhanon nga mga relasyon ngan pag-asawa. Karuyag nira pun-on an ira mga ulo hin kahibaro ngan an ira mga bursa hin bahandi, kondi an ira mga kalag nagpapabilin nga waray sulod. An iba nangangalimbasog nga makalikay ha mga problema han kinabuhi pinaagi han droga o de-alkohol nga irimnon, pero diri nira nakakarawat an kamurayawan nga ira ginbibiling. An ira mga hunahuna waray na pulos ngan nag-uusahan pa gihapon, aada pa gihapon ha masamok nga kalibotan upod an masamok nga hunahuna.
Tawo nga ada Ha Kasamok
Ginhimo han Dios an tawo ngan iginbutang hiya ha makaruruyag nga hardin basi magpahimulos hin hingpit nga kamurayawan, ngan kalipay. Kondi han nagsupak hi Adan ngan hi Eva, nakaabat dayon hira hin pagbasol. Hadto naghihingyap hira han presensya han Dios, pero yana nag-alirong na hira hin kaalo. An kamurayawan ngan kalipay nga ira naeksperyensyahan ginbalyoan han pagbatok ngan kahadlok. An sala han tawo amo an tinikangan han masamok nga kalibotan ngan masamok nga hunahuna.
Bisan kon an aton kalag naghihingyap ha Dios, an aton makasasala nga kinaiya nagrebelde ha Iya mga paagi. Ini nga pakig-away ha sulod nagriresulta hin tensyon ngan kasakit. Kon kita, pariho kan Adan ngan Eva, nag-aaghat han aton kalugaringon nga mga hingyap ngan mga ambisyon, magigin nababaraka ngan masulob-on kita. Kon mas nagpu-pukos kita ha aton kalugaringon, mas nagigin masamok kita. An mga kawaray-kasigurohan han kinabuhi ngan an nagbabag-o, nagtitikaluya nga kalibotan nagpapaluya han aton seguridad ngan nakakadaot han aton kamurayawan.
Bisan kon bangin waray mo ito hibaroi o karawata, an sala bangin amo an hinungdan han imo kasubo. Damu nga mga tawo an namimiling hin kamurayawan ha mga butang ha gawas ngan ha materyal. Ginbabasol nira an nagsasamok nga kalibotan tungod han ira nagsasamok nga hunahuna, kondi napakyas ha pag-usisa ha ira kalugaringon nga kasingkasing.
Hi Jesu-Kristo an Prinsipe Han Kamurayaw
Diri gud magkakaada hin kamurayawan tubtob nga an ngatanan nga mga bahin han kinabuhi magin uyon ha usa nga naghimo ngan nakakasabot ha aton. Posible la ini pinaagi han bug-os nga pagpasakop kan Kristo. Diri la Hiya an agaron han kalibotan kondi maaram liwat Hiya han aton kinabuhi tikang ha tinikangan tubtob ha kataposan. Naghuhunahuna Hiya ha aton han Iya pagkanhi ha kalibutan "ha paghatag hin kalamrag ha mga nalingkod ha kasisidman ngan ha lambong han kamatayon, ha pagtungway han aton mga tiil ngadto ha dalan han kamurayaw" (Lukas 1:79).
Naghahatag hi Jesus hin kalamrag para ha kasisidman, kamurayawan para han panag-away, kalipay para han kasubo, paglaom para han nawarayan paglaum, ngan kinabuhi para han kamatayon. Nagsiring hiya ha Juan 14:27, "An kalinaw iginbibilin ko ha iyo, an akon kamurayaw ihahatag ko ha iyo... Ayaw kamo kabaraka ngan kahadlok".
An Pagbasol Nagdadara Hin Kamurayawan Ha Hunahuna
Kon inaabat mo nga an imo sala nakabug-at ha imo, an solusyon amo an "Magbasol... ngan magpakombertido, basi paparaon an imo mga sala" (Buhat 3:19). Gin-iimbitar ka ni Jesus nga tumambong hini nga pinakaimportante, nagbabalyo-ha-kinabuhi nga eksperyensya. "Kadi kamo ha akon, ngatanan kamo nga ginugul-an hin mabug-at nga mga darad-on, ngan akon kamo tatagan hin pagpahuway" (Mateo 11:28). An 1 Juan 1:9 nagsasaad, "Kon igkumpisal ta an aton mga sala, Hiya matinumanon ngan matadung ha pagpasaylo ha aton han aton mga sala, ngan paglinisan kita ha ngatanan nga karat-an". Kakarawaton mo ba an Iya imbitasyon?
Kon kumadto ka kan Jesus, hibabaroan mo an pagpasaylo ngan kagawasan. Imbes nga magdumot ngan diri magpasaylo, an imo kasingkasing puno na hin gugma ngan kalooy. Kon hi Jesus nagmamando ha imo kasingkasing, hihigugmaon mo an imo mga kaaway. Posible ini pinaagi han gahum han nakakatalwas nga dugo ni Kristo.
Nagpapabilin nga Kamurayawan
Sugad nga Kristiano, an pagtoo ha Dios ngan pagsarig ha Iya pagmangno amo an tambal han kahadlok ngan kabaraka. Makalilipay gud an pagsarig ha diri nagbabag-o nga Dios nga tikang ha waray tinakangan ngadto ha waray kataposan. Hinigugma kita Niya ngan dayuday kita Niya ginmamangnoan. Salit kay ano nga mababaraka ngan mahahadlok? Hibaroi an pagbuhat sugad han aton mababasa ha 1 Pedro 5:7, 'Ipasa ha Iya an ngatanan niyo nga pangarit, kay napaid Hiya ha iyo.' May-ada liwat kita han saad, "Ikaw magbabantay ha Iya ha hingpit nga kamurayaw, nga an iya hunahuna aada ha imo: kay Hiya nasarig ha imo" (Isaias 26:3).
Kon hi Jesu-Kristo aada na ha imo kasingkasing, an imo pamiling hin kamurayawan matatapos na. Iya ihahatag an kamurayawan ngan kahimyangan nga nagtitikang la ha pagsarig ha Iya. Makakasiring ka sugad han magwarali:
Maaram ako hin kamurayaw, kon diin waray kamurayaw,
An kamalinaw, diin an magbangis nga hangin nahuyop,
Usa nga sekreto nga lugar diin personal ko nga ikakaatubang
ha Agaron ako makadto.
- Ralph Spaulding Cushman
Magkakaada ka kamurayawan ha hunahuna ha masamok nga kalibotan! Abrihi an ganghaan han imo kasingkasing ngadto kan Kristo - yana - ngan ha usa ka adlaw Iya aabrihan an ganghaan han langit para ha imo, diin an hingpit nga kamurayaw maghahadi ha kadayonan.