“Ug siya gidad-an nila ug mga gagmayng bata aron siya magahikap kanila; apan ang mga tinon-an nagbadlong kanila. Apan sa pagkakita ni Jesus niini, nasuko siya ug miingon kanila: Pasagdi ninyo ang mga bata nga moduol sila kanako, ug dili ninyo sila pagdid-an, kay ang gingharian sa Dios alang sa mga sama kanila. Sa pagkamatuod nagaingon ako kaninyo, bisan kinsa nga dili modawat sa gingharian sa Dios ingon sa usa ka bata, dili gayud siya makasulod niini. (Marcos 10:13-16).
Si Jesus nahigugma ug nag-atiman sa bisan asang mga batang lalaki ug babaye. Buot niyang magpuyo diha sa inyong mga kasingkasing. Siya adunay plano alang sa matag usa kaninyo ug buot niya nga magmando sa inyong mga kinabuhi.
Usa ka panahon, samtang siya nakigsulti sa iyang higala, si Jesus nagtudlo nga ang mga batang lalaki ug babaye mas bililhon pa sa Diyos kay sa mga bulak ug mga langgam.
Ang mga langgam wala magtanom og binhi ug magtipig og pagkaon. Ang Diyos nagpakaon kanila. Siya motabang kanila sa pagpangita og mga insekto ug mga liso nga kan-on. Ang mga bulak mabuhi lamang og pipila ka adlaw. Ang Diyos naghatag kanila og matahom nga mga porma ug mga kolor. Ikaw mas bililhon Kaniya kay kanila. Busa kon ang Diyos nag-atiman sa mga langgam ug mga bulak, siya sa walay duhaduha mag-atiman sa tanang lalaki ug babaye. Tan-awa ang Mateo 6:25-33.
Siya naghatag kanimo og pagkaon ug sinina ug motabang kanimo nga mahimong maayo ug malulot-on. Kinahanglang magsalig ka Kaniya, kay Siya nahibalo kon unsay labing maayo alang kanimo. Siya usa ka mahigugmaong Diyos nga buot motabang sa tanan nga nanginahanglan. Sa imong mga suliran, o sakit, o kasubo, Siya motabang kanimo. Ang Bibliya nag-ingon, "Kon mangayo kita ug bisan unsa sumala sa iyang kabubut-on, siya magpatalinghug kanato" (1 Juan 5:14).
Ang usa ka amahan may duha ka anak nga lalaki. Ang manghod nga anak miingon, "Ihatag kanako ang akong bahin sa salapi." Gikuha niya kini ug mibiya sa balay. Siya ug ang iyang mga higala nag-usik-usik sa kuwarta, ug naglingaw-lingaw. Sa wala madugay nahurot na ang tanan. Dayon ang iyang mga higala mibiya kaniya. Ang usa ka tawo naghatag kaniya'g trabaho sa pagpakaon sa mga baboy, apan siya walay makaon. Siya gigutom kaayo!
Siya naghunahuna, "Ang mga sulugoon sa akong amahan daghan og pagkaon. Mobalik ako sa balay, ug moingon sa akong amahan, "Nakasala ako. Dili na ako mahimong sama sa usa ka anak. Himoa ako sama sa usa nimo ka sulugoon lamang?" ug ang manghud nga anak mipauli.
Ang amahan naglinantawon ug naghulat sa iyang anak. Nahigawad gayod siya kaniya! Sa dihang iyang nakita ang iyang anak nga nagpadulong, midagan siya ug gigakus ug gihalokan niya!
Ang anak miingon, "Amahan, nakasala ako. Dili na ako takos nga tawgon nga imong anak. Himoa lang ako nga usa sa imong sinuholan nga mga sulugoon."
Apan gipasaylo na siya sa amahan. Miingon siya sa iyang mga sulugoon, "Isul-ob ninyo ang usa ka sinina ug isul-ob ang iyang mga sapin. Ihawa ang usa ka nati nga baka, ug mangaon kita og malipayon nga panihapon. Kay kining akong anak namatay, ug nabuhi pag-usab; siya nawala, ug hingkaplagan.” Gikan sa Lucas 15:11-24.
Kining sugilanona nagpakita kon sa unsang paagi si Jesus nahigugma sa tanang makasasala. Ang Bibliya nag-ingon, "Adunay kalipay sa atubangan sa mga manulonda sa Dios tungod sa usa ka makasasala nga maghinulsol" (Lucas 15:10).
Ang Bibliya nagsulti kanato og laing estorya kon unsa ka dako ang gugma sa Diyos sa matag usa.
Usa ka adlaw, usa ka tawo milakaw sa usa ka dalan nga walay tawo. Sa dalan, iyang nahimamat ang mga tulisan. Sila miduol kaniya ug naghimog kadaot kaniya. Gikuha nila ang iyang mga sinina ug kuwarta. Dayon sila milayas. Grabe ang kadaot sa tawo. Dili siya makabangon.
Usa ka saserdote ang milugsong sa maong dalan, ug sa iyang pagkakita sa tawong nasamdan, wala siya motabang. Nagdali siya sa pag-agi sa pikas kilid sa dalan.
Usa ka Levihanon ang miagi sa dalan. Nakita usab niya ang tawo nga nasamdan ug mihunong aron motan-aw kaniya, apan wala usab siya motabang kaniya. Siya miagi usab sa pikas kilid.
Ang usa ka Samarianhon miabot nga nagsakay sa asno. Sa dihang iyang nakita ang tawong nasamdan, mihunong siya aron tan-awon kon makatabang pa ba siya kaniya. Iyang gihugasan ang iyang mga samad ug giputos kini. Iyang gipasakay ang maong tawo sa iyang asno ug gidala siya sa kinaduol nga balay abutanan.
Sa pagkabuntag ang maayong Samarianhon miingon sa tag-iya sa balay nga puy-anan, "Atimana ang tawo hangtod nga siya mamaayo. Ania ang kuwarta sa pagbayad kanimo. Ug kon dili pa kana igo, ako magbayad kanimo ug dugang sa akong pagbalik." Makita diha sa Lucas 10:30-35.
Buot ni Jesus nga kita mahigugmaon ug malulot-on niadtong nanginahanglan. Kon ang gugma ni Jesus anaa sa atong mga kasingkasing, dili kita mohimo og bisan unsa tungod sa garbo o kahakog. Apan sa pagkamapainubsanon, mas hunahunaon nato ang uban kay sa atong kaugalingon. Dili lamang kita magtan-aw sa atong kaugalingong mga interes, kondili maningkamot usab kita sa paghunahuna ug pagsabot sa pagbati sa uban. Ang Bibliya nag-ingon, "Pag-alagad sa usag usa pinaagi sa gugma" (Galacia 5:13).
Angay natong higugmaon ang atong mga kaaway ug pasayloon kadtong nakasala kanato. Dili gayod kita magbayad og daotan tungod sa daotan.
Kon kita adunay gugma ni Jesus diha sa atong mga kasingkasing, kita magmalulot-on sa atong mga higala, magmasinugtanon sa atong mga ginikanan, ug malipay sa pagsulti sa ubang mga batang lalaki ug babaye kon unsay gihimo sa Ginoo alang kanato.
Si Jesus nahigugma kaayo kanato nga Siya namatay sa mabangis nga krus alang sa atong mga sala. Karon angay natong higugmaon Siya pag-ayo nga atong ihatag ang atong mga kasingkasing ug mga kinabuhi ngadto Kaniya.
“Kita nahigugma kaniya, tungod kay siya una nga nahigugma kanato” (1 Juan 4:19).
Ang Diyos nga Mahigugmaong Amahan
By Mabel Niedermeyer and George F. Root
1. Ang Diyos maoy mahigugmaong Amahan
Sa bisan asang bata;
Dili igsapayan kon asa ang ilang mga balay,
Sila nagpuyo sa Iyang pag-atiman.
2. Gihigugma niya ang tanan nga anaa sa halayo nga kayutaan
Nga tingali dili nako makita;
Gihigugma usab niya ang mga bata
Nga nagpuyo tupad nako.
KORO:
Malipayon ako nga ang Diyos mao ang Amahan
Sa bisan asang mga bata,
Ug aron nga kitang tanan mahigugma Kaniya
Ug makig-estorya Kaniya diha sa pag-ampo.