Naino mibu mibandi te, Nzambe azalaka. Akelaki mokili na nyonso kati na yango. Na bolingo na ye, nzambe akelaki moto na elilingi na ye mpe atiaki ye na elanga moko kitoko. Moto aboyaki kotosa mitindo na Nzambe. Na sima Nzambe alobaki na bato ’te bapesa mbeka ya bana ya nyama oyo izangi libebi po ’te masumu na bango malimbisama. Mbeka yango ekokaki kofuta nyongo ya masumu na bango te, nzoka nde ezalaki elembo ya mbeka ya motuya oyo Nzambe ako kaba mokolo moko. Mokolo moko Nzambe akotinda mwana na ye Yesu na mokili oyo po azala mbeka se moko mpo na masumu ya bato nyonso.
Malia na mwanze
Mibu koto minei na sima, na mboka Nazarete, ezalaki na elenge mwasi kombo na ye Malia. Azalaki mobandami na Yozefu. Mokolo moko Anzelu abimelaki Malia pe ayebisaki ye ’te akobota mwana moko oyo akeseni na basusu. Akopesa ye kombo Yesu. Mwana akozala na tata awa na mokili te. Akozala mwana ya Nzambe.
Kobotama na Yesu
Tango mwanze azongi, Yozefu na Malia bakendeki na Beteleme kokomisa kombo. Kuna bazwaki esika ya kolala te. Balalaki na ndako ya banyama mpo ’te esika ezalaki te na ndako ya bapaya. Kuna nde Yesu abotamaki. Mama na ye azingaki ye na bilamba mpe alalisaki ye esika ba nyama balielaka bilei.
Babateli na mpate
Kaka na butu yango, babateli bazalaki kokengela ba mpate. Mwanze moko abimelaki bango mpe kembo na Nzambe engengelaki bango. Mwanze alobi : « bobanga te, nayeli bino sango malamu ya esengo mpona bato nyonso ; na butu ya lelo, Mobikisi abotameli bino. Ye Yesu- Klisto, Nkolo. Bokokuta mwana moke bazingi ye na bilamba mpe balalisi ye na elielo ya bibwele ». Banze ebele babimaki na esika yango, bakumisaki Nzambe balobi : « Kembo na Nzambe na bisika bileki likolo, kimia na se mpe boboto epai na bato ». Esilaki banze kokende, babateli bakendeki noki na Beteleme. Kuna bakutaki kaka ndenge anzelu alobaki
Bato na mayele
Sima na kobotama na Yesu, bato na mayele bakomi na Beteleme, batuni : « Wapi Mokonzi na Bayuda abotami ? Tomonaki monzoto na ye epai moi ebimaka mpe toyei kogumbamela ye ». Eyokaki
Elode, asepelaki te. Atuni banganga Nzambe na bakomeli. Balobelaki ye ’te akobotama na Beteleme. Elode atindaki bato na Beteleme koluka Mokonzi yango. Tango bato na mayele balongwi na Yelusaleme, monzoto ekambaki bango kino na ndako wapi bakutaki mwana Yesu. Bagumbamelaki ye mpo na kokumisa ye, bapesaki ye makabo : wolo, malasi mpe palata. Nzambe akebisaki bato na mayele na ndoto ’te bazonga epai na Elode te. Bazongaki na nzela mosusu.
Tina na likabo ya Nzambe
Yesu azalaki mwana ya Nzambe. Asalaki lisumu te mpe azalaki sembo na banzela nyonso. Ekokisaki ’te mibu tuku misato, abandaki koteya na tina na Nzambe Tata na ye. Asalaki makamwisi mingi lokola kofungola miso ya bato ya lolanda, kosekwisa bakufi, kobikisa bakoni. Koleka nyonso alakisaki lolenge ya kozwa bomoi ya seko na lola. Na sima apesaki bomoi naye lokola mbeka mpo na masumu ya mokili mobimba.
Biblia elobi : « mpo ’te Nzambe alingi bato ya mokili mingi penza yango wana apesaki Mwana na ye se moko mpo’te moto nyonso oyo akondimela ye akufa te, kasi azwa bomoi ya seko ». Yesu ayaki na mokili kokufa na ekulusu lokola mbeka ya masumu oyo eleki likolo. Na nzela ya liwa na ye afutaki nyongo ya masumu nyonso. Tina ya kopesa mbeka ya masumu ezali lisusu te. Yango ezalaki ekokiseli ya elaka na Nzambe ya kotinda Mobikisi.
Ata lokola Yesu abomamaki na bato mabe, liwa ezalaki na bokonzi na likolo na ye te. Na mokolo na misato, asekwaki. Na sima na lisekwa na ye, bato ebele bamonaki ye mokolo moko apambolaki bayekoli na ye mpe amataki na likolo.
Tango toponi kondima mpe kotika bomoi na biso na Yesu, makila na ye mapetoli biso na masumu nyonso. Ekoyamba biso nyoso. Ekoyamba biso lokabo yango ya lobiko ya ofele, tosangani na Nzambe. Yesu akomi mobikisi na biso mei mpe tokobi kozwa bolamu ya kozala mwana na ye. Mokolo moko Yesu akoya akomema bandimi ya solo nyonso na lola. Bakobika seko na Nzambe.