“Учир нь нүглийн төлөөх төлөөс бол үхэл бөгөөд…” (Ромчуудад 6:23)
Ингээд бүгдээрээ бодит үнэнтэй нүүр тулан ярилцацгаая. Бурханы бүтээсэн сурвалжит, ариун, сайхан сэтгэлтэй хүн төрөлхтнийг аймшигт мангасууд болох хар тамхи, архи, ёс журамгүй байдал заналхийлэн устгаж байна. Энэ нь яг л агуу биет наймаалжны тэмтрүүл адил өөрийн тэвэртээ хөгшин, залуу хэнийг ч болов огт ялгахгүй атган сорж буй аймшигт тэмтрүүлтэй мангас шиг аажим аажмаар хумхин тэднийг залгиж идсээр байна.
Өнөөдрийн нийгэмд эдгээр нь хамгийн их хувиар тахал болон тархаж байгаа билээ. Архидалт, хар тамхи, ёс журамгүй байдал нь олон хүний тэргүүн дээр, зангуугүй хөвж буй хөлөг онгоц мэт мөнх хөнөөлийг үлдээж байна. Ихэнх хүмүүс өөрсдийн найз нөхөд, үе тэнгийнхнээсээ энэ буруу нөлөөлөлд амархан автдаг бол мөн үүний талаар сонин, сэтгүүл, зурагт, интернэт, фэйсбүүк (Facebook) зэрэг зар сурталчилгааны хэрэгслээр дамжуулан муу муухай мэдээллийг асар ихээр олж авдаг. Ялангуяа хүний бие махбодь болоод сэтгэл санаа доройтон унасан үед эсвэл бүтгэлгүйдсэн, эргэлзэж тээнгэлзсэн байх тэр агшинд дээрхи сурталчилгаа нь хүний оюун ухаан бодлын цэг рүү дайран довтолдог байна.
Монголчууд ярьдаг: тамхи 5 насаар, архи 10 насаар хүнийг хороодог гэдэг. Гэтэл хар тамхичдын үхлийн насыг тогтоож болдоггүй. Энэ аймшигтай хар сүүдэр манай улсыг аль хэдийн бүрхэж аваад байна. Хэдхэн жилийн өмнө манай ганзгын гэх наймаачид Орос, Хятад улсын хооронд хар тамхи тээвэрлэдэг, манай улс дамжин өнгөрүүлдэг бааз нь байв. Харин өнөөдөр тээвэрлэдэг биш хэрэглэгч улс болжээ. Хар тамхийг анх удаа хэрэглэж үзсэн 100 хүний зөвхөн хорь нь л хар тамхины тухай бодлоо бүр мөсөн орхиж чаддаг бол харин үлдсэн 80% нь хар тамхичин болдог байна. Гэтэл энэ хүмүүсийн дийлэнх нь 12-18 насны өсвөр насныхан байдаг нь хамгийн харамсалтай баримт юм. Үүнтэй холбогдоод хар тамхинаас үүдэлтэй гэмт хэрэгт ял шийтгүүлэгчдийн 99 хувийг 18-19 насныхан эзэлж байна. 2 200 орчим залуучуудын дунд судалгаа хийхэд 2,7% нь бензин цавуу үнэрлэж үзсэн, 2,9% нь мансууруулах бодис хэрэглэж үзсэн гэсэн судалгаа гарчээ. Тэд хар тамхины хор хөнөөлийг мэдэхгүй гэхээсээ илүү бусдын нөлөөнд автаж, хар тамхинд орох нь элбэг байдаг байна.
Өнөөдөр манай улсад 64 000 -аас 75 000 хүн хар тамхи тогтмол хэрэглэдэг гэсэн судалгааг гарчээ. Энэ тоо жилээс жилд өссөөр байна. Ядуурал хоосрол хаана зонхилж байна тэнд хар тамхи эрч хүчээ авсаар байна. Манай улсад хар тамхи хэрэглэгчдийн 20% нь эмэгтэйчүүд, 80% нь эрэгтэйчүүд байна, хар тамхи нь: архинаас 60% -иар илүү хүчтэй. Хар тамхинаас салгах эм, тариа, ерөндөг гэдэг зүйлс манай улсад байхгүй, үүнийг таслан зогсоох талаар тусгайлан гаргасан хууль журам ч байхгүй бөгөөд хөөрхийлэлтэй төөрсөн эдгээр хүмүүсийг ядуурал хоосрол, үхэл хүлээж байна.
Манай урд хөршид үйлдвэрийн аргаар гаргаж авсан хар тамхийг хэрэглэсэн хүн зомби болон хувирсан удаа гарчээ, өөрөөр хэлбэл тэр хүн энэ хар тамхийг татсаны дараа дэмийрч солиорох үедээ хажуудах хүнээ барьж идсэн юм. Энэ аюул манай улсад орж ирэхгүй гэх баталгаа алга, үхлийн энэ аймшигт заналхийлэл улам л ойртсоор байна.
Шийтгэлээ Бид Өөрсдөө Хүлээнэ
Нийгэмд үүссэн энэ гутамшигт зуршил, хүмүүсийн эвдэрсэн зан авир, буруу үйлдлүүдийн хариуцлагыг хэн хүлээх вэ? Бидний залуу үе үү? эсвэл төр засаг уу? эсвэл өмнөд, хойд хөршүүд үү? Үгүй, аль нь ч биш юм. Ялангуяа олон эцэг, эхчүүд өөрсдийн бурхангүй нүгэлт амьдралаа зөвтгөдөг учир бидний хойч үеийнхэн болон залуучуудыг дур зоргоороо амьдрах үндэсийг нь чөлөөтэй болгож өгдөгт байгаа юм. Аав, ээжүүд өөрсдийн эвдэрсэн сул тал, дутагдалуудаа анзаарч үзэлгүйгээр үр хүүхдүүдийнхээ дэргэд архи, тамхийг хэрэглэдэг нь муу зуршлуудын буруу нөлөөлөлд үр хүүхдүүд нь маань өртөж, тэдэнд халдварлаад байгааг өөрсдөө мэддэггүй. Цаашдаа энэ нь өөрсдийн ирээдүйд ямар муу үр дагавар дагуулж ирдэг вэ гэдгийг ч анзаардаггүй байна. Харин Бурханы тогтоосон ёс журам, зарчим, хуулиудыг хүмүүс огт мэддэггүй, энэ талаар сонссон нэгэн нь үл ойшоож анзаараагүй дүр эсгэн өнгөрч байна. Энэ үед асар их уй гашуу Тэнгэрт хүрч байдгийг анхаарч ухаарах хэрэгтэй.
Тэгвэл бид өөрсдийгөө болон ирээдүй хойч үе, үр хүүхдүүдээ үүнээс хэрхэн аварч чадах вэ?
Хэдхэн жилийн өмнө ёс суртахууны доголдолтой оюутнуудаа өрөвдөж, үргэлжлүүлэн суралцах зөвшөөрөл олгосон олон багш, профессорууд ажлаасаа ямар нэгэн шалтгаан, нөхцөлгүйгээр шууд халагдаж байсан түүх АНУ-д гарсан байдаг.
Яагаад ийм байдал гарсан бэ? Учир нь тухайн нийгэмд оршин суудаг үндэстэн ястнуудийн дунд тааруухан бодолтой эцэг эхчүүд, профессор, мөн сурган хүмүүжүүлэгчид архидах, хар тамхи хэрэглэх, багшийн гарт бэлэг сэлт өгөх зэргийг сэмхэн хөхүүлэн дэмжигчид амь бөхтэйгөөр оршин иржээ. Үүнээс нэг жишээг аваад үзье; анги, сургууль төгсөлтийн нийллэг дээр хар тамхи сэмхэн хэрэглэх, шалгалт шүүлэг өгөх үеийн гар цайлгалтууд, багш нарт өгөх гарын бэлэг гэх мэт муу зуршлууд нь улам л хүчээ авсан байна.
Тэгвэл бид ч ялгаагүй тэднийг дуурайгсад биш гэж үү? Бидний гэр орон, арван хоёр жилийн сургуулиуд, их дээд сургуулиудаас чанартай иргэд бэлтгэгдэн гарна гэсэн баталгаа ирээдүйд байхгүй байна. Энэ аймшигт хэрэглээг зуршил болгосон аль ч шатны сургуулиуд болон гэр бүлүүдэд ёс суртахууны хүмүүжлийн үндсэн суурь ганхан, цаашлаад нуран унаж, дампуурдаг байна.
Архичин байна гэдэг нь нийгмийн бүх давхаргуудад ёс журмыг засаршгүй завхруулагч болоод зогсохгүй шүүмжлэлийг үл ойшоосон, өөрийн зан төлөв болон бүх амьдралаа сүйтгэсэн нэгэн болдог. Энэ байдал нь Бурханаас хүн төрөлхтөнд өгсөн ерөөлүүдийн нэг болох ‘ариун өргөө’ хэмээх гэр бүлийн нандин тогтолцоог эвдэж, сүйрлийн зам руу хөтөлдөг.
Архины аюул заналд уусч, согтуурч мансуурах нь улам нэмэгдсээр хориотой хар тамхи хэрэглэх явдал руу гулган орж үүнийгээ зуршил болгох нь улам ихэсдэг. Тэгээд хар тамхийг хэтрүүлэн хэрэглэж, түүнийгээ чухалд тооцож “ашиг тусаа өгч байна” гэсэн үзэл оюун ухааныг нь эзэмдэж эхлэх энэ үеэс хамгийн муу үр нөлөөллийн эхлэлийг үүсгэдэг. Хар тамхины хэрэглээнд аливааг эргэцүүлэн бодох чадваргүй болгож, ухаан мэдрэлийг солиоруулдаг аюултай хүч түүнд бий. Мөн хар тамхи хэрэглэгчид оюун ухаан, бие махбод болон сүнс сэтгэлээрээ үхлийн аялал руу нэвтрэн ордог. Аливаа зүйлд ташууран, дураараа авирлах байдлын үр дүнд засагдашгүй тархины гэмтэлтэй болж, аллага болон амиа хорлолт байнга гарч, эцэстээ амьдрал нь эмгэнэлт гашуугаар дүүрдэг.
Ёс Суртахуунгүй Байдал нь Хүлээс Болдог
Хүн төрөлхийн нүглээсээ болж сатаны буюу муу сүнсний төлөвлөгөө, уруу татлагад амархан өртөж түүнийг дагах хандлага, хүсэлтэй болдог байна. Яг энэ тохиолдолд махан бие сэтгэл ханамжийг хязгааргүйгээр эрэн хайдаг. Энэ буруу хандлагуудыг өдөөн, дэвэргэж өгдөг гол зэвсэг нь архи, хар тамхи, ёс бус байдлууд юм. Бэлгийн ёс бус байдал нь, дур тачаалын галыг асааж унтрашгүй байдалд оруулаад харин ч түүнийг улам дэвэргэн асаадаг. Архинаас гаргах эмчилгээнд виски ашигладаг бол, хориотой бэлгийн дур хүслийн үйлдэлийг дарах ямар ч эмчилгээ байдаггүй байна. Гэрлэлтээс гадуур бэлгийн харьцаа тогтоох, завхайрах, ижил хүйстэнтэйгээ явалдах, амьтантай хавьтах зэрэг ёс бус үйлдэлүүдийг Бурханы Үгэнд хориглосон байдаг (Левит 18:23, Галат 5:19-21). Ёс журамгүй байдлууд нь бидэнд асар их уй гашуу, хөөрхийлөлтэй байдал, гэм нүглүүд болон бэлгийн замаар халдварлах янз бүрийн өвчнүүдийг авчирдаг байна. Цорын ганц үнэн бол бид өөрсдөө дур хүслийн асуудлаа Бурханы Сүнсний хүч дотор зөвөөр шийдвэрлэдэг байх хэрэгтэй.
Бурханы авралд орох үед, бидний дотор мөнх амьдрах сүнс, зүрх сэтгэл өгөгддөг тул Түүний үг, хууль ёс журмыг хүн хүндлэн дээдлэхийг хичээж эхэлдэг.
Харин цэвэр ариун байдал нь өөрийгөө үнэ цэнэтэй, сүр жавхлантай байлгах ухаан юм. Зарим тохиолдолд хүмүүс хувьдаа өндөр зарчимтай амьдралыг төвөгтэй мэт үздэг бол харин зарим нь ёс суртахууны хомсдолтой байдлыг аз жаргалтай, сэтгэл хангалуун амьдрал хэмээн үздэг. Энэ нь Христчин зарчмыг байж боломгүйгээр гуйвуулан төсөөлж, дотоод ертөнцдөө үүнийг үгүйсгэж боддог байна.
Сүнсний харалган байдал, бурхангүй хүмүүсийн нүгэлт увайгүй үзэл бодол болон ёс журамгүй байдлын балчиг дунд амьдарч ирсэн бидний хувьд, Ариун Библийн ёс суртахууны зан төлөвийн хэм хэмжээг тогтоож авбал эдгээрүүдийн аль нь зөв, аль нь буруу болох талаар маргашгүй үнэн зөвийн баталгааг олж мэдэхийн зэрэгцээ, Библи нь үнэн ба мөнхийн эх сурвалж юм байна гэдгийг гүнзгий мэдрэх болно.
Эх Сурвалжийг Буруугаар Ашиглах Үед
Бурхан, хүнд бэлгийн харьцаан дахь дур хүслийн ханамжийг гэрлэлтээр дамжуулан зөвхөн эхнэр нөхрийн хооронд байхаар холбож өгсний зэрэгцээ хүн амын тоог өсөн нэмэгдүүлж, бэхжүүлэхийн тулд бүтээсэн билээ. Тэрбээр, дур хүслийн энэ сэтгэл хангалуун байдлыг зөвхөн зөвт байдлын дотор гэрлэгсдэд зөвшөөрдөг. Еврей 13:4-д “Бүгд гэрлэлтийг хүндлэгтүн. Ор дэр нь ч бузартаагүй байг. Учир нь Бурхан янхан эрчүүд болон завхайрагчдыг шүүнэ” гэжээ.
Элч Паул ижил хүйстэнтэйгээ нөхцөгчдийн дээр байх Бурханы шүүлтийн талаар Ром 1:26-28,32-д, “Тиймээс Бурхан тэднийг хүсэл тачаалынх нь ичгүүрт тушаасан учир тэдний эмэгтэйчүүд нь жам ёсны хэрэглээг зүйд нийцэхгүй байдлаар сольсонтой адил эрчүүд нь ч эмэгтэй хүнтэй жам ёсны харьцах харилцаагаа орхиж, бие биенийгээ хүсэн тачаадах болсноор, эрчүүд эрчүүдтэйгээ бузрыг үйлдэн, өөрөө өөрсөддөө буруу үйлдэлийнхээ төлөө зохих цээрлэлээ хүлээн авчээ. Мөн тэд оюун ухаандаа Бурханыг хүлээн зөвшөөрөх тухай санаа тавиагүй тул Бурхан тэдний ухааныг хэрэгцээгүй болгохоор эргүүлсэн учраас тэд бүхий л зөвт бусыг үйлдэгч ... хүмүүс болжээ. Тэд эдгээрийг үйлдэгчид нь үхэх нь зайлшгүй гэдэг Бурханы шударга шүүлтийг мэддэг; тэд ийм үйлсийг үйлдээд зогсохгүй, ийм зүйл үйлдэгчдийг ч сайшаадаг байна” хэмээн бичжээ. Үүний нэг жишээ бол Содом, Гоморра хотуудад ийм жигшүүрт нүгэл байсан бөгөөд Бурхан тэдний дээр Өөрийн шүүлтийг буулгасан юм (Эхлэл 19). Бичээст бичигдсэн шиг бид энэ ёс бус амьдралаар амьдарч, эдгээр нүглүүдийг үйлдсээр байвал өөрсдийн зүрх сэтгэлдээ Ариун Сүнсийг хадгалан, Христитгэлт хүмүүсийн адил амьдралаар амьдрах боломжгүй юм.
Бурхан Бүгдээс Цэвэрлэх Чадалтай
Хүндэт уншигч минь, амьдралдаа жинхэнэ аз жаргалтай байж, Бурхантай хамт өөрийгөө амар тайвнаар дүүрэн байлгая гэвэл та Түүнтэй нөхөрлөх нөхөрлөлд заавал ирээрэй. Өөрийгөө гэм нүгэлтэй гэдгээ ухааран гэмшиж, Есүс таны буруутгалыг үүрэн загалмай дээр үхсэн гэдэгт итгээрэй. Ялалт таныг хүлээж байна!
Таныг Бурханд зүрх сэтгэлээ нээж, гэм нүглээ улайн гэмших үед, Тэрбээр таныг уучлах болно. “Хэрэв бид нүглээ хүлээн зөвшөөрвөл, итгэмжит болох ТЭРБЭЭР зөвт бөгөөд бидний нүглийг уучилж, бүхий зөвт бус байдлаас биднийг цэвэрлэнэ” (1 Иохан 1:9).
Өөрийн амьдралаа Есүстэй холбон, Түүнийг Аврагчаа болгож, Түүний Үгэнд болон мөн Ариун Сүнсийг чин сэтгэлээсээ дуулагавартай дагахдаа та хэзээд бэлэн дуртайяа байгаарай. Өөрчлөгдсөн амьдралын ерөөл нь бидний үйл хэрэг, үйлдэл бүхэнд гайхамшигт өөрчлөлтийг авчрах цэвэр бодлуудыг өгдөг. Христ танд амьдралын асуудлуудтай нүүр тулахад урам зориг өгөөд зогсохгүй, тан руу дахин довтолж болох муу ёрын сүнсний уруу татлага, махан биеийн уруу татлага, архи, хар тамхи, ёс журамгүй байдлыг даван туулах хүчийг өгөх болно. Тэрбээр таныг дуудаж байна, яг одоо Есүс рүү ирээрэй.
“Түүнийг олдож болох үед нь ЭЗЭНийг хайгтун. Түүнийг ойр байхад нь ЭЗЭНийг дуудагтун” (Исаиа 55:6).