An pipira han pinakadaku nga mga pakig-away ha kinabuhi gin-aatubang ha sulod han kasingkasing.
Damu nga lider ha bug-os nga kasaysayan an determinado ha pagsakop ha iba nga mga nasud. An iba nga makikalugaringon nga mga magmarando ngan mga lider naghuhunahuna pa ngani nga magmando ha bug-os nga kalibotan. Ini nga mga lider nag-aaghat hin yinukot nga mga sundalo nga makig-away tungod han ira personal nga hingyap nga magkaada hin gahum, karikohan, ngan dungog.
An pisikal nga mga gira nga gin-aatubang han mga kasundalohan nagriresulta hin kaduro nga kasakit ngan kamatayon. Damu nga mga sundalo an grabe nga nasamdan, ngan damu nga mga kinabuhi an diri unta kinahanglanon nga mawara, nawara tungod han makikalugaringon la nga mga tumong han pipira nga mga lider. Nagresulta ini hin duro nga kasakit ha kasingkasing para han mga hinigugma hadton namatay. An kapakyasan liwat nagriresulta hin duro nga kasakit ngan kabidoan para hadton mga diri malampuson nga mga lider.
An Espirituwal nga Pakig-away
An kada usa nga responsable nga kalag nakakaeksperyensya hin dagku nga espirituwal nga mga pakig-away ha kinabuhi. An mga resulta hini nga mga pakig-away dagku hinduro nga kabug-aton ngan pagkaimportante. An kapakyasan ha pisikal nga pakig-away magreresulta hin kaarawdan ha usa nga lider ha sulod han iya kinabuhi. An pagkaperdi ha away han imo kalag magdadara hin kasakit ha kadayonan. Nakahunahuna ka na ba han diri-malilikyan nga mga resulta han makikalugaringon nga pagkinabuhi nga waray hi Kristo?
Mapiperde ka ba ha pakig-away han kinabuhi? An pakig-away han kinabuhi ngan kamatayon? An pakig-away han langit ngan han impyerno? An pakig-away han pagdumiri ha kalugaringon ngan paghigugma ha kalugaringon, han imo kalag ngan han kalibotan? Hi Jesus nagsiring: "Ano an kapulsanan han usa ka tawo kon maangkon niya an bug-os nga kalibotan pero mawara an iya kalag?" (Markos 8:36)
Madamu man o magutiay la an aton gintatag-iya hini nga natural nga kalibotan, kon mawawara an aton kalugaringon nga kalag, ano iton katrahedya! Masisilyohan na an aton waray kataposan nga kapalaran. Damu nga mga tawo an diri maaram nga may-ada daku nga espirituwal nga pakig-away nga gin-aatubang. An ira pansabot ginbutahan ni Satanas ngan han kalibotan, ngan napiyong o nakaturog hira ha mga kamatuoran han pakig-away kontra ha sala.
An Biblia nasiring, "Pagmata, ikaw nga nakaturog, ngan bangon tikang ha mga minatay, ngan hi Kristo masanag ha imo" (Efeso 5:14). Isalikway an mga kadena han sala ngan hi Satanas. Pakig-away tubtob ha kataposan! Diri ka makakalikay ha natural nga kamatayon (kamatayon han imo lawas), pero makakalikay ka ha waray kataposan nga kamatayon (pag-antus han imo kalag). Kon mawad-an ka han pakig-away para han katalwasan han imo kalag, mag-aantos ka hin waray kataposan ha impyerno ngan kasakitan. Kon maperde ka han pakig-away para han katalwasan han imo kalag, mag-aantos ka hin waray kataposan ha impyerno ngan pagpasakit.
An Pagpili
Naghunahuna ka na ba nga usa la ka pitad an nagbahin ha imo ngan ha kamatayon? Andam ka na ba nga makatalabok ha ganghaan han panahon ngadto ha waray kataposan? Basi magdaog ngan makaabot ha langit, kinahanglan kumadto ka kan Jesus. "An Dios... yana nagsosogo ha ngatanan nga mga tawo ha ngatanan nga lugar nga magbasol". (Buhat 17:30). YANA! Diri buwas o ha iba nga panahon nga masayon para ha imo. "Kitaa, yana amo an adlaw han kaluwasan" (2 Korinto 6:2). Kon waray pa hi Kristo ha imo kasingkasing, kon an imo nag-agi nga panahon nagruruba ha imo, kon waray ka pa makaeksperyensya han bag-o nga pagkatawo (Juan 3:3), ayaw pagkakomportable. Pagbasol! Pakadto kan Jesus sugad han imo kahimtang samtang natindog pa hiya nga nagtutuktok ha ganghaan han imo kasingkasing. Nagsiring hiya, "Kon may-ada makabati han akon tingog ngan mag-abre han porta, masulod ako ngadto ha iya" (Pahayag 3:20). Bangin magpakiana ka, "Matatalwas ba gud an makasasala?" Oo! Kumadto ka kan Kristo ha pagtoo ha bug-os mo nga kasingkasing ngan karawata Hiya sugad nga imo personal nga Manluluwas, pagbasul han imo mga sala ngan pagsugot han tingog han Espiritu Santo. Katapos, makakadaog ka ha pakig-away para ha imo kalag. Diri la kay maglilipay ka han kamurayawan ngan kalipay hini nga kinabuhi, kondi makarawat mo liwat an kalipayan ngan himaya upod han imo Manluluwas ha kadayonan. Mga yinukot ka tuig na an naglabay nga an manaragna nga hi Ezekiel nagsiring, "Kon an maraot bumaya han ngatanan niya nga mga sala nga iya nabuhat... ngan magbuhat hadton subay ha balaud ngan matadong, hiya ha pagkamatuud mabubuhi" (Eseki el 18:21).
Kon karuyag mo magmalipayon han mga kaupayan han unod la han makasasala nga kalibotan, ha kataposan mawawara ka sugad la han damu nga makikalugaringon nga mga lider ha bug-os nga kasaysayan. Masusugad ka hin nalulunod nga tawo nga waray nagluluwas, ngan mawawara ka. Himoa dayon nga hi Jesu-Kristo, an daku nga Paratagana (Preserver) han kinabuhi, an imo kabulig. Iya ka luluwason. Katapos, kalabutan han katapusan nga pakig-away, masiring ka sugad kan apostol Pablo, "Pasalamatan ta an Dios, nga naghahatag ha aton han kadaogan pinaagi han aton Ginoo nga hi JesuKristo". (1 Korinto 15:57)
Hi apostol Pablo nagsurat mahitungod hini nga pakig-away han kalag sugad nga maopay nga pakig-away. Nagsiring hiya, "Pakig-away han maopay nga pakig-away han pagtoo, ngan kapti hin marig-on an kinabuhi nga waray kataposan" (1 Timoteo 6:12). Interesado gud an Dios hini nga pakig-away han pagtoo ngan Hiya nalilipay ha pagbalos han pagtoo. Ini nga kadaogan makukuha han kada tagsa nga tawo.
Hinigugma nga kalag, may-ada ka pagpili han kadaogan ba o kapakyasan; langit ba o impyerno; an buhi nga Dios ba o an Yawa; an malipayon, mahimayaon nga waray kataposan ba o waray kataposan nga kabidoan ngan pag-antos. "Iginbutang ko ha imo atubangan an kinabuhi ngan an kamatayon, an bendision ngan an panhimaraut: busa pili-a an kinabuhi." (Deuteronomio 30:19).
Pilia hi Jesus yana!