May panahon nga waray gud bisan ano dinhi nga kalibutan.
Waray isda.
Waray mga bitoon ha langit.
Waray kadagatan ngan maghusay nga mga bukad.
An ngatanan waray sulod ngan masirom.
Kondi may-ada Dios.
An Dios may-ada urusahon nga plano. Naghunahuna Hiya hin usa nga makaruruyag nga kalibutan, ngan samtang naghuhunahuna Hiya, ginhimo Niya ito. Ginhimo Niya ini ngatanan tikang ha waray. Han paghimoa han Dyos an bisan ano, nagsiring la Hiya, "Tumana na", ngan natuman ini!
Naghimo Hiya hin kapawa. Iya ginhimo an mga salog ngan kadagatan, an banwa ha tuna, an mga hayop, mga tamsi, ngan mga kahoy.
Ha kataposan, ginhimo Niya an lalaki, ngan katapos ginhimo Niya an babaye para ha lalaki. An ira mga ngaran amo hi Adan ngan Eva.
Hinigugma gud hira han Dios. Kada gab-i ginbibisita Niya hira ha makaruruyag nga hardin nga ira inuukyan.
Para ha ira an bug-os nga hardin, gawas han usa nga kahoy nga igindidiri han Dios.
Malipayon hira Adan ngan Eva tubtob nga usa ka adlaw ginsulay hira ni Satanas, an kaaway han Dios. Nagdesisyon hira nga kumaon han bunga han igindidiri nga kahoy han Dios. Nakasala hira. Ha siyahan nga higayon, naawod ngan nasusubo hira.
Diri na hira nakakagistorya ha Dios. Yana mauululan na hira ngan mag-aantos. Ngan kinahanglan hira mamatay. Makasurubo gud hira!
Nagsaad an Dios nga bubuligan hira. Kon umabot na an husto nga panahon, susugoon Niya ha kalibotan an Iya Anak nga hi Jesus. Hi Jesus makanhi tikang ha langit ngan maghihimo hin paagi basi mapasaylo an sala. Basi mahimo ini, mag-aantos ngan mamamatay Hiya para ha katawohan. Nalipay gud hira nga magsusugo an Dios hin Manluluwas!
Hi Adan ngan hi Eva nagkaada mga anak ngan mga apo. Waray pag-iha damu na an mga tawo nga nag-uukoy ha kalibotan.
Karuyag han Dios nga magin malipayon an ngatanan. Ginsidngan Niya hira kon ano an ira bubuhaton. Ini an lista han mga balaud nga iginhatag ha ira han Dios (Eksodo 20:3-17)
1. Diri ka magalagad hin lain nga mga diosdios ha atubangan ko.
2. Diri ka maghimo para ha imo hin bisan ano nga ginohitan nga ladawan.
3. Diri mo pagngaranan an ngaran han Ginoo nga imo Dios hin waray kapulsanan.
4. Hinumdumi an adlaw nga iparahuway ha pagbaraan hito.
5. Tahora an imo amay ngan an imo iroy.
6. Diri ka magpatay.
7. Diri ka manlibog.
8. Diri ka mangawat.
9. Diri ka magsaksi hin buwa patok ha imo igkasitawo.
10. Diri ka maipa han balay han imo igkasitawo; diri ka maipa han asawa han imo igkasitawo, bisan han iya sorogoon nga lalaki, bisan han iya sorogoon nga babaye, bisan han iya baka, bisan han iya asno, bisan han bisan ano nga kanan imo igkasitawo.
Iginsurat ini ha Biblia basi mabasa liwat naton ito. Kon masugot kita ha ira, magigin malipayon kita.
Diri karuyag ni Satanas nga sugton naton hira. Usahay ginsusugo kita niya nga mangawat hin mga butang kon waray nagkikita. Kondi maaram ito an Dios. Nakikita han Dios an ngatanan.
Usahay ginsusulay kita ni Satanas nga magbuwa ngan hunahunaon nga waray makakasabot hito. An Dios an maaram hito. Hinbabatian Niya an ngatanan.
Kon ginbubuhat naton ini nga mga butang, maraot an aton inaabat. Hinigugma kita han Dios ngan karuyag Niya nga buligan kita nga magin maopay. Amo ito an hinungdan nga Iya ginsugo hi Jesus nganhi ha kalibotan. Ngan an Dios nahanumdum han Iya saad. Paglabay hin damu ka tuig, natawo hi Jesus sugad nga bata. Nagdaku Hiya ngan nagin lalaki.
Damu nga urusahon nga mga butang an Iya ginbuhat. Iya gintambal an mga magsakit. Gintambal Niya an mga buta. Iya ginbendisyonan an kabataan.
Waray gud magbuhat hin sayop hi Jesus. Ginsumatan Niya an mga tawo mahitungod ha Dios ngan kon paonan-o Hiya susugton.
Paglabay hin pipira ka panahon, iginraysang Hiya han Iya mga kaaway ha krus. Namatay Hiya.
Nag-antos ngan namatay Hiya para han mga sala han ngatanan nga mga tawo, bisan adton nagraysangan ha Iya ha krus.
Iginlubong hi Jesus. Kondi may-ada urusahon nga nahitabo. Waray Hiya magpabilin ha lubnganan. Nabanhaw Hiya!
Waray pag-iha gindara Hiya han Dios ngadto ha langit pinaagi hin dampog. Samtang nagkikita an Iya kasangkayan han Iya paglakat, ginsidngan hira han usa nga anghel nga mabalik hi Jesus.
Namatay liwat hi Jesus para ha aton mga sala. Karuyag Niya nga magbasol kita ngan isumat an aton mga sala. Andam Hiya magpasaylo ha aton.
Makag-ampo kita ha Dios ha bisan ano nga panahon. Namamati Hiya ha tagsa nga pulong ngan maaram han tagsa nga hunahuna. Nalilipay kita kon ginpapasaylo an aton mga sala. Katapos karuyag naton buhaton an matadong. Salit karuyag naton magin buotan.
Puyde naton pilion nga supakon an Dios ngan sundon hi Satanas. Kondi an pulong han Dios nasiring nga kon igsalikway naton Hiya dinhi hini nga kinabuhi, Iya kita igsasulod ha impyerno. An impyerno usa nga lugar han kalayo nga naglalaga ha kadayonan.
Kondi kon nahigugma ngan nasugot kita kan Jesus, kakarawaton kita Niya ha langit kon bumalik na Hiya. An langit amo an makaruruyag nga urukyan han Dios ngan han Iya Anak nga hi Jesus. Usa ito nga urukyan han gugma ngan kalamrag. Didto magigin malipayon kita ha kadayonan.