Ang tanan nagasimba og usa ka butang. Ang uban nagsimba og mga butang nga hinimo, ang uban nagsimba og usa ka tawo, ang uban nagsimba og usa ka larawan, ug ang uban nagsimba sa ilang kaugalingon. Gipakita nila ang ilang debosyon sa ilang dios sa lain-laing paagi. Samtang ang kadaghanan sa mga tawo nagahatag sa ilang debosyon niini nga mga dios, sa gihapon, adunay pagpangita ug pagtuaw sa sulod sa ilang kasingkasing. Kini nga mga tawo nakakaplag lamang og temporaryo nga kagawasan alang sa pagtuaw sa ilang kalag ug gamay ra ang kaisog nga atubangon ang ugma. Sa ilang kasubo, ang umaabot nagpabilin nga sama ra sa nangagi. Ang dios nga ilang gialagaran dili makahimo sa pagpuno sa kakulang sa ilang kinabuhi.
Kinsay imong gisimba? Asa nagpuyo ang imong Diyos? Buhi pa ba siya? Unsay iyang gihimo alang kanimo karong adlawa? Nakigsulti ka ba kaniya karong adlawa? Gitubag ba niya ang pagsinggit sa imong kasingkasing? Unsay imong gituohan?
Tugoti nga ipaila ko kanimo ang bugtong matuod nga Diyos nga nagdaog kang Satanas, ang atong kinadak-ang kaaway. Siya mao ang Diyos nga magbubuhat, kinsa misulti sa paglungtad sa tanang butang. Ang Balaang Bibliya mosulti kanimo bahin niining Diyos sa langit, kinsa nagbuhat sa tawo gikan sa abog sa yuta. Basaha ang Genesis kapitulo uno ug dos.
Siya mao ang walay-kataposang Diyos. Siya walay sinugdanan ug walay kataposan. Siya mao gihapon ang kagahapon, karon, ug hangtod sa kahangtoran. Siya mao ang magbubuhat, tigpreserbar, ug tigsuportar sa tanang butang ( Buhat 17:22-34).
Kining dakong Diyos nga nagpuyo sa mga langit interesado usab kanimo ingong usa ka tawo. Siya makakita kanimo taliwala sa mga tawo. Siya nahigugma ug nag-atiman kanimo. Buot niyang mahimong labaw pa kay sa imong higala. Iyang gipadala ang iyang Anak aron mahimong imong Manluluwas. Buot niyang magpuyo uban kanimo, ug labaw pa niana, Buot niyang magpuyo diha kanimo. Siya nag-ingon, "Magpabilin kamo kanako, ug ako diha kaninyo" (Juan 15:4).
Kon dili Siya ang nagpuyo sa imong kasingkasing, kinsa man? Pinaagi sa pagtan-aw sa atong palibot, atong makita nga si Satanas nagmando ug nagdaot sa mga kinabuhi sa kadaghanang tawo. Siya ang nagmando niining mga kasingkasing. Siya nagsugyot niining tanang pagkadaotan sama sa pagpamakak, pagpangawat, kaibog, paglimbong, pagpanimalos, ug pagpahitaas sa kaugalingon. Kon si Satanas nagpuyo sa imong kasingkasing ug nag-aghat kanimo sa pagbuhat sa bisan unsa niining mga sala ug daghan pa, nganong dili man kita mudool sa Dios sa mga diyos kinsa mihatag sa iyang bugtong Anak, si Jesu-Kristo, aron mamatay alang sa imong mga sala ug sa mga sala sa tibuok kalibutan (Juan 3:16)?
Pangutana, "Sa unsang paagi nga tinuod kini?" Sa unsang paagi ang usa, kinsa dako kaayo, gamhanan sa tanan, ug makagagahom sa tanan mopuyo sa akong kasingkasing? (Isaias 57:15)
Kon ikaw nasakit ug gikapoy sa sala, nganong dili mo tawgon ang Diyos ug maghinulsol? Pinaagi sa pagtuo sa Diyos ug pinaagi sa pag-ula sa dugo ni Kristo, ang imong mga sala mapasaylo ug ikaw makadawat ug bag-ong kinaiya. Dayon sa dihang si Satanas moabot sa pagsulay, mabati nimo ang presensiya sa Diyos nga labing gamhanan. Siya mohatag kanimo og giya ug magatudlo kanimo sa tanang butang (Juan 14:26).
Diha sa Juan 10:10, si Jesus nagsaad og abunda nga kinabuhi ug Siya makahimo sa paghatag niana kanimo. Kini nga gasa mahimong imo basta ikaw magpabilin nga matinumanon ug masinugtanon Kaniya. “Kon kamo andam ug masinugtanon, mokaon kamo sa maayo sa yuta” (Isaias 1:19). Walay laing diyos nga ingon niini ka gamhanan. Kon kini mosulti sa imong kasingkasing, tingali gusto nimong basahon ang tract: Kamo Kinahanglang Matawo Pag-usab. Kini nga tract, mao man gihapon sa uban, makaplagan diha sa atong website o makaorder gikan sa adress sa ubos.