“Kon an Anak maghatag ha iyo hin kagawasan, magkakaada gud kamo hin kagawasan” (Juan 8:36)
Karuyag han ngatanan nga magin talwas. An kagawasan ha pagyakan, panhunahuna, relihiyon, ngan pag-imprinta amo an importante ha damu nga mga sosiedad ha kalibotan yana. An sosiedad nakakita nga kinahanglanon an pagpugong han kagawasan han mga nagtalapas han balaud, basi tugotan an iba nga pahimulsan an ira katungod nga kagawasan. Ito an hinungdan han pag-eksister han mga prisohan. An mga tawo nga nagtalapas ha mga balaud han tuna makakita gud hit ira kalugaringon ha literal nga prisohan.
May-ada ba tinuod nga kagawasan an mga tawo nga nagpapahimulos han mga kagawasan nga iginyakan, o damu ha ira an aada ha iba nga klase nga prisohan? An Biblia nagtututdo ha aton nga an mga tawo pwede nagin uripon bisan kon namimiling hira hin kagawasan. An tawo nga nagsumat hin usa nga buwa nakakadena hito nga buwa, ngan agsob nga gin-aaghat nga magbuwa utro basi takpan an siyahan nga diri kamatuoran. An mga tawo nga nagtitikang pagsigarilyo, pag-ininom, o pag-inom hin droga nahahabaro ha urhi, kon karuyag nira umundang, nga diri hira nakakahimo hito. Damu pa an nagbungkag han ira mga saad ha pag-asawa tungod la han kalipayan ngan nakakita ha ira kalugaringon an pagkawaray kalipayan ngan pagkawaray pamilya. Mga ehemplo ini han pagkauripon nga gindadara han sala.
An pagkauripon ha sala aada ha bug-os nga kalibotan ngan an ngatanan natawo nga makasasala. An Biblia nagsusumat ha aton, "Kay an ngatanan nagpakasala, ngan nawad-an hira han himaya han Dios", ngan "Diri ba kamo maaram, nga kon hin-o an iyo igtubyan ha iyo ngahaw nga mga uripon ha pagsugot, mga uripon kamo niya nga iyo ginsusugot; bisan han sala ngadto ha kamatayon, ó han pagsugot ngadto ha katadungan?" (Roma 3:23; 6:16) An Dios diri nag-aaghat ha mga tawo nga magbuhat hin sayop. Kitaa liwat an Roma 3:10. Samtang aada pa kita ha aton mga sala, aada kita ha espirituwal nga prisohan.
Paonan-o kita matatalwas? An tuod nga kagawasan, tuod nga kalipayan, kagawasan tikang ha kahadlok, ngan kagawasan tikang ha pagbasol ngan paghukom, maabot la kon may-ada kita kamurayawan ha Dios ngan an aton mga kinabuhi uyon ha iya kaburut-on. Ha luyo nga bahin, an pagkauripon amo an resulta han pagkab-ot han kan Satanas buwa nga saad han kagawasan. Kitaon ta an mga pulong han aton Manluluwas, hi Jesukristo, “Aadi ha akon an Espiritu han Ginoo, kay ginpili ako niya hin pagwali han Maupay nga Sumat ha mga kablas. Ginsugo ako niya pagpasangyaw han katalwasan ngadto ha mga binihag, ngan hin pagpabalik han pakakita han mga buta; hin pagtalwas han mga pinanlupig,” (Lukas 4:18)
Basi matalwas tikang ha sala, kinahanglan una naton karawaton nga makasasala kita ngan uripon. Kinahanglan magbasol kita han aton mga sala. An pagbasol nag-uupod hin kasubo tungod han aton sala ngan pagbaya ha sala. Para ha iba, baga hin makuri ini, o imposible gud. Kon maghihimo kita hin tangkod nga pangalimbasog, ngan magtawag ha Dios para hin bulig ngan pagpasaylo han sala, an Ginoo magmamando ha aton hin hinayhinay ngadto ha pag-iba han kasingkasing. Kinahanglan karawaton naton an katalwasan ngan pagpasaylo pinaagi han dugo ni Jesus pinaagi han pagtoo. Mababasa naton ha Biblia, "Ngan ha Iya [hi Jesus] aton an pagtubus, an pagpasaylo han mga sala" (Kolosas 1:14). Kitaa liwat an Roma 3:24-25; Roma 5:1; Roma 6:23; Buhat 3:19; ngan Juan 3:3
Ano an mga epekto hini nga espirituwal nga kagawasan? Kon an usa nga tawo tuod nga natawo utro sugad han iginyakan ha igbaw, an iya mga sala ginhuhugas, ngan may-ada hiya libre nga konsensya. Yana may-ada na hiya gahum kontra ha makasasala nga mga hingyap. Imbes nga magpadaog ha mga pagsulay, maaram na hiya nga atohan an mga hingyap han unod. Nagkikinabuhi na hiya hin bag-o nga kinabuhi dida kan Kristo ngan iba na an iya mga tumong. Imbes nga magkinabuhi para la ha iya kalugaringon, nangangalimbasog na hiya nga lipayon an Dios ngan buligan an iba. Iba an iya pagyakan ngan paggamit han panahon. Nalilipay hiya ha mga problema han kinabuhi nga puno na yana hin katuyoan ngan direksyon. Labaw ha ngatanan, ini nga kagawasan nagdadara hin pagsarig han kinabuhi nga waray kataposan ha langit. Bisan ha mga prisohan, ini nga kagawasan han espiritu ngan kasingkasing mahimo nga magin tuod. Mababasa naton, "Sanglit kon an usa ka tawo aada kan Kristo, bag-o hiya nga binuhat: an mga daan nga mga butang nag agi na; kitaa, an ngatanan nga mga butang ginhimo nga bag-o" (2 Korinto 5:17). Kitaa liwat an Galacia 5:13.
Jesus, Kimnanhi Ako
Tikang ha akon pagkauripon, kabidoan ngan gab-i,
Jesus, kimnanhi ako, Jesus, kimnanhi ako;
Ha imo kagawasan, kalipay ngan kapawa,
Jesus, ako kimnanhi ha Imo;
Tikang ha akon sakit ngadto ha Imo kahimsog,
Tikang ha akon kakulangan nganto ha Imo manggad,
Tikang ha akon sala ngan ngadto ha Imo ngahaw,
Jesus, kimnanhi ako ha imo.
Tungod han akon makaarawod nga kapakyasan ngan kawara,
Jesus, kimnanhi ako, Jesus, kimnanhi ako;
Ha mahimayaon nga pagdaug han Imo krus,
Jesus, kimnanhi ako ako ha imo;
Tikang ha mga kabidoan han tuna ngadto ha Imo balsamo,
Tikang ha mga bagyo han kinabuhi ngan ngadto ha Imo kamurayawan,.
Tikang ha kakurian ngadto ha malipayon nga salmo,
Jesus, kinmanhi ako ha Imo.
William T. Sleeper