An seguridad han ngatanan nga mga Kristohanon aada kan Kristo. Namatay hiya para ha aton, ginpasaylo kita, ngan nagsaad hin urukyan ha langit ha mga matinumanon. Didto, magpapabilin kita nga may seguridad ha iya presensya. Bisan yana nga panahon, an mga Kristiano makakalaom nga matatalwas tubtob nga magmatinumanon hira, tungod kay samtang buhi pa hira, may-ada hira giya han Baraan nga Espiritu, ngan kon mamatay na hira, may-ada iginsaad ha ira nga usa nga urukyan ha langit.
An Paglukat Magagamitan han Ngatanan
Ginhimo han Ginoo an katawhan basi pasidunggan ngan himayaon Hiya. Tungod kay maaram Hiya nga an tawo mahuhulog ha sala, an Dios nagplano tikang han paghimo nga talwason hiya (Mateo 25:34). “Kay an Dios naghigugma gud han kalibutan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi ma may kinabuhi nga waray katapusan. Kay waray magsugo an Dyos han iya Anak nganhi hin paghukom han kalibutan, kundi hin pagtalwas han kalibutan pinaagi ha iya”(John 3:16-17). Ini nga pagtubos para han ngatanan nga katawhan, sugad han iginpahayag ni Jesus dida han Dako nga Imbitasyon: "Kadi kamo ha akon, ngatanan kamo nga ginugul-an hin mabug-at nga mga darad-on, ngan tatagan ko kamo hin pagpahuway" (Mateo 11:28).
Predestinasyon (Igintadhana) o Pagpili?
An iba nagtututdo nga gindesisyonan na han Ginoo an ngatanan nga nahitatabo ha aton. Sumala hini nga doktrina, an iba nga mga tawo gindesisyonan na nga daan para ha kinabuhi nga waray kataposan ngan an iba para ha waray kataposan nga kamatayon. An ira waray kataposan nga kapalaran diri nadepende ha ira kalugaringon nga pagtoo o personal nga mga pagpili, kondi ha pagpili han Ginoo para ha ira. An iba natoo pa ngani nga kon an usa nga makasasala natawo hin utro, imposible na nga maimpluwensyahan pa hiya ni Satanas nga bumalik utro ha sala. Igintututdo liwat nira nga an natawo hin utro nagpapamatuod nga an usa ginpili na nga makadto ha langit ngan diri-kabalyoan ngan waray-kataposan na nga seguridad.
Igintututdo han Biblia nga may klaro nga sugo nga iginhatag kan Adan ngan Eva. Nagdesisyon hira nga magtalapas, ngan tungod hito ginsirotan hira. Ha bug-os nga teksto, gintututdoan an tawo nga may responsabilidad hiya ha pagpili han tama ngan sayop, han kinabuhi ngan kamatayon. Hi Moises nagsagdon han mga Hebreohanon,”Busa pili-a an kinabuhi” (Deuteronomio 30:19). Hi Josue nagsiring, "Pagpili kamo yana nga adlaw kon hin-o an iyo pag-aalagdon" (Josue 24:15). Syempre, mahimo unta magdesisyon nira Adan ngan Eva nga sumugot, ngan hi ikaw ngan ako makakahimo liwat magpili. Kon pipilion naton an kaburut-on han Dios para ha aton kinabuhi, tatalwason ngan bibendisyonan kita niya. Kon magpili kita han dalan han sala, sisirotan kita (Roma 6:23).
Karuyag han Dios nga Matalwas an Ngatanan
Usa nga nangunguna nga prinsipyo nga igintututdo ha Pulong han Dios amo ini: Kaburut-on han Ginoo nga matalwas an ngatanan nga mga tawo. “Hin-o an karuyag nga an ngatanan nga mga tawo maluwas, ngan nga makadangat ha pagkilala han kamatuuran” (1 Timoteo 2:4). ”Kondi mapailubon ha aton, nga diri karuyag nga may mawara, kundi nga karuyag niya nga an ngatanan kamo magbasol ngan bumaya han sala”(2 Pedro 3:9). Kinahanglan kita maghinapos nga adton mawawara ha impyerno diri ginpili nga daan para ha impyerno, kondi nagpili nga diri magbasol ngan tumoo.
An Dios naghigugma gud han kalibutan, basi nga "an ngatanan nga natoo ha iya, diri mawara, kondi ma may kinabuhi nga waray katapusan" (Juan 3:16). Klaro nga an pagtabon han sala diri para la ha pipira nga pinili kondi para ha ngatanan. Sanglit malipayon kita, “Kay an grasya han Dios iginpahayag, nga amo an nagdara han kaluwasan ha ngatanan nga mga tawo" (Tito 2:11).
An Katalwasan May-ada Kondisyon
Katapos maghatag hin kakaiba nga pormula para ha espirituwal nga pag-uswag, gin-aaghat ni Pedro an mga tumuroo nga karawaton an "dagku ngan birilhon gud nga mga saad" ngan dugangan an ira kinabuhi hin magkalainlain nga Kristohanon nga mga kalidad. Katapos, ginsidngan niya an mga magtinuohon: "Padag-ona gud niyo an ngatanan nga mahihimo niyo basi magin marig-on an iyo pagtawag ngan pagpili: kay kon buhaton niyo ini nga mga butang, diri gud kamo masayop" (2 Pedro 1:10). Ito nga gutiay nga pulong nga kon, nga agsob nga ginagamit ha Kasuratan, nagpapasabot nga an kaluwasan nadepende ha pagkamatinumanon han usa. Nagsiring hi Jesus, "Tungod hini, makikilala niyo hira pinaagi han ira mga bunga" (Mateo 7:20).
Ano an karuyag sidngon ni Jesus han hiya nagsiring, "Waray bisan hin-o nga makakakuha ha ira [an akon mga karnero] tikang ha kamot han akon Amay"? Kitaa an Juan 10:27-29. Ha pag-usisa hini nga teksto, aton naobserbahan an duha nga kinahanglanon kon an mga karnero karuyag mag-angkon han pag-ataman han Amay. Kinahanglan 'pamatian nira an iya tingog,' ngan kinahanglan 'sundon nira hiya ha pagsugot. Waray iba nga tawo o gahum an tutugotan ha pag-agaw han tumuroo tikang ha panalipod ni Kristo. Kondi, kon an usa nga karnero, tungod han iya kalugaringon nga pagpili, diri namamati ngan nasugot ha Paraataman, diri mag-iiha mawawara hiya tikang ha Iya.
An makasasala nga namamati ha tawag ha katalwasan ngan naluwas, kinahanglan magsunod kan Kristo katapos hito. Gintugon ni Jesus an iya mga disipulo nga tutdoan an mga nabawtismohan nga mga magtinuohon nga 'pagbantay han ngatanan nga mga butang nga akon iginsugo ha iyo' (Mateo 28:20). Hiya napaid nga hira 'magsusunod han iya mga pitad' (1 Pedro 2:21) basi magpabilin nga maluwas. Kinahanglan ito basi matalwas kita.
An Pagkapalindas Posible
Ha Mateo 18:15-17 hi Jesus nagtututdo nga an usa nga tumuroo nga nakasala ngan diri nakarawat han pagtadong mawawara an iya kaluwasan. Ini nga teksto naghahatag hin mga direksyon ha singbahan ha pagtratar ha diri masinugtanon nga mga myembro. Ito liwat nga ideya gin-utro ha diskurso ni Jesus mahitungod han balagon ngan han mga sanga. “Kon an usa nga tawo diri mapabilin ha akon, iya ipipilak sugad han sanga, ngan mauuga: ngan ira pagtitirokon hira, ngan isungo ha kalayo, ngan hira magkakasunug” (Juan 15:6). Dinhi klaro nga iginsaysay ni Jesus an usa nga sanga (an tumuroo) ha balagon han ubas kondi waray magpadayon ha iya doktrina. Namatay hiya!
Ha 2 Pedro kapitulo 2, an apostol nagsurat mahitungod han mga tawo 'nga binaya ha sakto nga dalan, ngan nagkawawara' (bersikolo 15). Klaro gud nga an iya ginhihisgotan amo an nagsasayop nga mga tumuroo ngan an paghukom han Dios ha ira pag-ato. “Kon in mga tawo nakalikay na han nakakadaot nga mga gahom han kalibutan pinaagi han ira pagkilala han aton Ginoo ngan Magtaralwas nga hi Jesu-Kristo, ngan onina, madakop ngan madaog na liwat hira, labaw pa kamaraot an ira dadangatan kay han ira kahimtang hadto. Kay maoroopay pa ha ira kon waray hira pagkilala han dalan han katadungan, kay nga ha pagkilala hito, bumaya hira tikang ha baraan nga sogo nga iginhatag ha ira. (bersikolo 20-21).
An katutdoan mahitungod han waray-kinahanglan nga waray kataposan nga seguridad diri nauyon ha doktrina han disiplina han singbahan sugad han igintutdo ni Kristo ngan han mga apostol.
May mga Rason Para ha mga Pahamangno han Biblia
Hi Jesus agsob nga nagsagdon han iya mga tinun-an nga magbantay: "Pagbantay kamo ngan pag-ampo, basi diri kamo masulay" (Marcos 14:38). Kitaa an 1 Pedro 5:8, Mateo 24:24, Markos 13:35-37, Lukas 18:1, Efeso 6:11, 1 Korinto 10:12. “Pagbantay kamo nga diri kamo, nga ginpasimang han kasaypanan han mga magraot, mahulog tikang ha iyo kalugaringon nga pagrig-on” (2 Pedro 3:17). Hi Pablo nagsurat mahitungod han panginahanglan han pagdisiplina han iya kalugaringon nga kinabuhi ngan naghatag hini nga rason: "Basi nga ha bisan ano nga paagi, kon ako magwali ha iba, ako ngahaw diri unta karawaton" (1 Korinto 9:27).
Mga Susbaranan ha Kasuratan Mahitungod han Mga Nahapalindas
An Kasuratan nagsusumat hin mga ehemplo han mga tawo nga mga Kristohanon nga mga tumuroo kondi nagin diri-matinumanon.
Mahitungod kan Judas Iskariote, hi Jesus nagsiring: "Diri ba ako an nagpili ha iyo nga napulo kag duha? Ngan an usa ha iyo usa nga yawa". (Juan 6:70) An iba bangin sumiring nga waray gud hiya magin tinuod nga sumurunod. Iginhatag ba ni Jesus kan Judas an pagkaapostol kon waray hiya matalwas? Ipapadara ba niya hiya basi magsangyaw, mag-opay, ngan magpaiwas hin mga demonyo? Diri ini makatadunganon. Hi Pedro nagsiring mahitungod kan Judas: "Kay hiya ihap ha aton, ngan nakakarawat hin bahin hini nga katungdanan... nga iya nawara tungud han iya pagtalapas" (Buhat 1:17, 25). Mahimo ba hiya mahulog kon waray hiya maluwas?
An libro han Pahayag nagsusurat han mga mensahe han Ginoo ngadto han pito nga mga singbahan ha Asia ngan naghangyo ha mga nakasala nga magbasol. Kon diri hira magbasol, an Ginoo nagsiring nga an ira mga ngaran paparaon ha Libro han Kinabuhi. Pananglitan, an lider ha Efeso, nakakarawat hin damu nga kumendasyon, kondi binaya na niya an iya siyahan nga gugma. An mensahe nagpadayon: "Hinumdumi kon diin ka mahulog, ngan magbasol, ngan buhata an siyahan nga mga buhat; kon diri, makanhi ako ha imo hin kadagmitan, ngan kukuhaon ko an imo kandelero tikang ha iya lugar, kon diri ka magbasol" (Pahayag 2:5). An mensahe ha kada usa han pito nga kongregasyon natapos pinaagi han saad ha usa nga "magdaog". An mga taktika ni Satanas amo an kinahanglan padayon nga magbantay an mga tumuroo basi diri hira mapukan. Pinaagi la han grasya han Dios ngan han iya Espiritu nga aada ha aton magigin mga magdarag-an kita.
Hin-o an Ginpili Para ha Langit?
Damu han Roma kapitulo 8 an igintagad ha topiko nga "Kalipayan ha Espiritu". Nagin klaro dayon nga basi matalwas kinahanglan maglakat kita uyon ha Espiritu (b.1), magin espirituhanon an hunahuna (b.6), ngan diri magkinabuhi uyon ha unod (b.l3). Importante an sugad nga baraan nga pagkinabuhi basi matalwas. Gintatawag han Dios an ngatanan ha katalwasan. Salit, waray tawo nga igintanda nga mawara. Syempre, nakita han Dios an umarabot pero an paghibaro daan han Dios diri nakakaapekto ha gahum han tawo ha pagpili o ha iya panginahanglan ha pagpili hin sakto dinhi hini nga kinabuhi. Ini nga bahin han paghibaro-i nga daan han Dios amo an basihan han ginsurat ni Pablo ha Efeso 1:4-12. Usa pa nga makaruruyag nga kamatuoran an iginpapahayag hini nga mga bersikulo. Para hadton magpipili han Dios ngan han iya dalan, an Amay naghimo hin bug-os nga pag-andam para ha ira pagbiyahe ngadto ha langit. Ginkarawat niya hira sugad nga iya kalugaringon (v.6), ginpapasaylo an ira mga sala ngan gintubos hira (v.7), gintagan hira hin kinaadman ngan pag-aram (v.8), iginpahibaro ha ira an iya kaburut-on ngan katuyoan para han ira kinabuhi (v.9), nagsaad nga pagtitirokon hira (v.10), ngan ginhahatag ha ira an panurundon sugad nga mga anak han iya pamilya (v.11). An Amay naghimo han ngatanan nga ginkikinahanglan nga pag-andam, ngan hini nga kahulogan, iya hira 'ginpili' para ha himaya. Kon an tumuroo diri makaabot ha tumong, hiya an napakyas, diri an Amay.
Pananglitan, gin-imbitar ka han imo hinigugma nga sangkay nga hirayo an iya urukyan. Tungod kay maaram hiya nga waray kita kwarta ha pagbayad han biyahe, iya kita ginpadad-an hin damu nga kwarta nga aton magagamit ha pagbiyahe, ngan ginsumatan liwat kita han mga bangko ha aton dalan diin makakakuha kita hin dugang pa. Iya kita ginpadad-an hin detalyado nga mapa nga may-ada mga highlight han aton ruta. Upod hito an damu nga mga nota nga naghuhulagway han mga lugar ha ligid han dalan, mga paglikay, pagtukod hin dalan, mga lugar nga peligroso hinduro, ngan mga lugar nga espesyal an interes diin malilipay kita nga humunong para hin pag-inom.
Dugang pa, an mga instruksyon han aton sangkay magsusumat ha aton han mga lugar diin makakagpalit kita hin maopay nga pagkaon, ngan mga lugar nga puy-anan diin makakapahuway kita ha gab-i. Ini an igindugang ha imbitasyon: “Ini an akon numero han telepono. Kon mawara ka o may-ada problema ha imo awto, tawag la ha akon ngan ipadadara ko an bulig para ha imo. Alayon pag-abot dayon.”
Usa ini nga ehemplo han ginbuhat han Dios ngan ginbubuhat pa niya para ha aton. Talwas gud kita kon ginsusunod naton an iya mga mapa ngan gingamit an mga kahikayan nga Iya igintatagana. Waray gud hinungdan nga diri kita makadto ha balay han aton Amay. Kondi, pariho han ilustrasyon, mahimo kita magpili hin iba nga dalan, magdesisyon nga magbiyahe ha iba nga dapit, o magdesisyon nga gamiton an mga kahinguhaan nga Iya igintatagana ha pagbiling hin iba nga mga kalipayan o pagpalit hin iba nga mga butang. Hini nga paagi, mahimo kita magdesisyon nga mawara an tumong. An Dios naghimo hin paagi basi makakadto kita ha langit, ngan an mga prinsipyo han Biblia nagtututdo ha aton nga an pagtoo kan Kristo ngan an kinabuhi nga baraan amo an paagi basi mahimo ini. Ginbuhat han Dios an iya gimaopayi. Yana kinahanglan buhaton naton an aton bahin. Hiya an naghimo ha aton. Iya ginhimo an langit para ha aton. Makasurubo, nangangalimbasog hi Satanas nga bungkagon an plano han Dios. An aton obligasyon amo an pag-ato hini nga magraot nga mga pwersa, igtubyan an aton kinabuhi ha Iya, mamati ha mga pahamangno ha Pulong, ngan magkinabuhi nga baraan. Katapos, tungod kay nadaog na naton an kalibotan, makakaghulat kita ha iya ikaduha nga pag-abot nga may pagsarig.