Ha kasingkasing han kada tagsa nga tawo aada an hingyap nga magin talwas ngan may seguridad. An gudtiay nga mga anak sukot nga nahahadlok nga bayaan nga nag-uusahan. Pwede liwar hira nahadlok ha kasisidman, o ha diri nababaroan. An mga anak naghihingyap han kasigurohan han mahigugmaon nga paghangkop han ira mga kag-anak. Dida nakakaabat hira hin kompyansa ngan prinotektahan. Samtang nagtitikadaku kita, an hingyap nga magin talwas ngan may seguridad diri gud nawawara ha aton. Ini nga nakinaiyahan nga hingyap iginhatag ha aton han aton Maglalarang. Kon an iba man nga kalalakin-an nagbubuhat nga daw waray kahadlok, ha ira kasingkasing bangin nahahadlok hira ha diri nababaroan, pag-antus, aksidente, o pagkasakit. Bangin nababaraka liwat hira ha kon ano an mahitatabo ha ira katapos mamatay.
An Dios amo an Maglalarang han langit ngan han tuna. An paghimo han tawo amo an pinakamakaruruyag nga buhat han Iya paglarang. Iya iginbutang hi Adan ngan an iya asawa nga hi Eva ha paraiso nga urukyan nga gintawag nga Tanaman han Eden. May seguridad hira, malipayon, ngan may kagawasan. Katapos, hi Satanas nagpakita ha ira sugad nga usa nga halas ngan ginlimbongan hira. Tungod han ira pagtalapas ha Dios, nawarayan na hira pakig-usa ha Iya ngan ginpaiwas hira ha Eden (Genesis 3).
Kamaano ka daku gud nga pagkabag-o! Han waray pa ito mahinabo, hi Adan ngan hi Eva nagin talwas ngan waray kahadlok. Mamurayawon hira ha ira Maglalarang, nga nalilipay ha iya presensya. Yana, imbes nga magkaada hin kamurayawan ha hunahuna, may-ada lugod kaguol, pagbasol, ngan kahadlok. Nahadlok pa ngani hira ha Dios ngan timnago tikang ha Iya! Naeksperyensyahan nira an espirituwal nga kamatayon, nga amo an pagbulag ha Dios. Han nawara an pakig-urusa ha Iya tungod han pagtalapas, nagkaada hira hin duro nga kasakit ha kasingkasing. An pakig-urusa la ha buhi nga Dios an makakatagbaw ha kalag.
An kasamok ha sulod han tawo nagriresulta liwat hin magkalainlain nga kasamok ha gawas, nga kaurog nga nagriresulta ha pagpatay o girra. Damu nga away an nahitatabo ha tuna ha ngatanan nga panahon; an usa nga tribo nakikig-away ha iba nga tribo, an usa nga nasud nangangalimbasog ha pagmando ha iba nga nasud. Hini nga mga kasamok, an usa nga nasud pirme nadaog, basi la magluya ha urhi ngan magin sakop han iba nga nasud. An manaragna nga hi Daniel nasiring, "Basi nga an mga buhi mahibaro nga an Gihataasi naghahadi ha ginhadian han mga tawo, ngan iya ini ihahatag ha bisan hin-o nga iya naruruyagan" (Daniel 4:17), ngan "Iya kukuhaon an mga hadi, ngan iya iginpapahamutang an mga hadi" (Daniel 2:21).
An damu ngan waray pagpaid nga mga terorismo ha bug-os nga kalibotan nakaaghat ha damu nga mga tawo nga magkaada hin kahadlok. Ini nga mga hitabo nagresulta hin kahadlok ha damu nga kasingkasing ngan hin kawaray kasigurohan mahitungod han umarabot.
Naglalaom kita nga tanan nga makakapadayon kita ha pagkinabuhi nga may seguridad ngan kasigurohan. An kalamposan han usa nga nasud nadepende ha mga bendisyon han Dios. Kon an mga tawo magbasul han ira makasasala nga mga kinabuhi ngan mahadlok ha Iya, bangin pilion Niya nga pahalawigon an mga adlaw han kamurayawan hito nga nasud (Daniel 4:27). Hi William Wilberforce, usa hadto nga membro han Parliamento han Britanya, nagsiring nga an iya paglaom para ha Britanya nadepende "diri gud ha iya mga barko ngan mga kasundalohan, o ha kinaadman han iya mga magmarando, kondi ha pagsarig nga may-ada pa gihapon dinhi damu nga nahigugma ngan nasugot ha ebanghelyo ni Kristo, basi an ira mga pag-ampo makab-ot." An seguridad han usa nga nasud diri gud nadepende ha gahum han militar hito kondi ha katadongan ngan kahadlok ha Dios han mga tawo hito.
An aton personal nga kaluwasan lain nga butang. Magkakamay-ada kita hin seguridad ha sulod han aton kasingkasing nga waray nasud dinhi ha tuna an makakahimo ha paghatag. Nagsiring hi Jesus, "An akon ginhadian diri kanan kalibutan; kon kanan kalibutan pa an akon ginhadian, makikig-away unta an akon mga surugoon basi diri ako mahulog ngadto han mga Judiyo. Diri, diri kanan dinhe nga kalibutan an akon ginhadian!" (Juan 18:36). An mga ginhadian hini nga kalibotan aada ha mga kamot han Dios ngan diri magpapadayon ha kadayonan. Iba an aton personal nga relasyon ha Dios. Kon aada kita ha ginhadian han Dios, aada kita ha ginhadian nga diri depende ha kalamposan o kapakyasan han bisan ano nga nasud ha tuna. An iya ginhadian mas marig-on kay han bisan ano nga superpower. Dida talwas kita, bisan ano man an mahitatabo ha bisan ano nga nasud. An mga ginhadian natindog ngan napukan, kondi hi Jesus nagsaad nga waray tawo nga makakahimo pag-agaw han iya mga anak tikang ha kamot han iya Amay (Juan 10:29).
Sumala ha tagna han Biblia, "an magraot nga mga tawo ngan an mga paralimbong magtitikaraot gud" (2 Timoteo 3:13) An umarabot diri naghahatag hin seguridad. An pakig-away ngan kasamok ha bug-os nga kalibotan bangin magtikagrabe samtang nagtitikahirani an waray kataposan. (Pahayag 10:6). Ha 2 Pedro 3:10 aton mababasa, "Kundi an adlaw han Ginoo maabot sugad hin kawatan ha gab-i; nga hito nga adlaw an mga langit mawawara upod in makusog nga aringasa, ngan masusunog an mga elemento tungod han mapintas nga kapaso, ngan masusunog liwat an tuna ngan an mga buhat dida hito." An Baraan nga Kasuratan nasiring nga an ngatanan nga tuhod magluluhod, ngan an ngatanan nga tawo magtitirok ha atubangan han trono han makagarahum-ha-ngatanan nga Hukom. Hito nga daku nga Adlaw han Paghukom, kon "magpapapas an langit ngan an tuna" (Mateo 24:35), waray tunan-on nga gahum an makakatalwas ha aton. An ngatanan nga mga tawo magsisingba ha atubangan han harangdon nga Hadi ngan paghuhukman. An mga lungib ngan mga kota diri makakapanalipod hadton namimiling hin arayopan. Maundang an ngatanan nga paagi han pagbiyahe. An hinimo-han-tawo nga mga hinganiban magigin waray kapulsanan. Waray na huni, emergency, o mga pulis nga magdadagmit ha pagbulig ha aton. Hi ikaw ngan hi ako mag-inusaan nga maatubang ha daku nga Hukom. Hito nga punto, an aton la seguridad amo kon an aton ngaran isurat ha Libro han mga Patay. (Lukas 10:20) An aton mga ngaran iginsusurat dinhi hini nga libro kon kita nagbabasol han aton mga sala ngan natoo kan Jesukristo. Katapos, ginpapasaylo niya kita ngan nalimpyo kita pinaagi han iya presyoso nga dugo, nga iginbubo ha krus nga an bug-os nga kalibutan matalwas. Katapos, ginkakarawat kita sugad nga mga anak han Dios.
An mga anak han Dios diri exempted ha sakit o pag-antos. Bangin mawad-an pa ngani hira hin kinabuhi, kondi hira diri kinahanglan mahadlok kay talwas hira ha mga butkon ni Jesus. Anoman an mahitabo ha ira, hira makakasarig nga bisan an pag-antos para ha ira kaopayan (Roma 8:28).
Ginhihingyap mo ba an seguridad? May-ada ka ba hilarom nga mga hingyap ha sulod nga diri mo matatagbaw? Bisan kon an kalag naghihingyap ha Dios, an makasasala nga kinaiya han tawo naabot ha unudnon nga mga hingyap. Kon waray kamurayawan han Dios, usa nga makasasala “pariho han masamok nga dagat, kay ini diri makakapahuway, ngan an iya katubigan nagtatambak hin hanang ngan hin hugaw” (Isaias 57:20). Hini nga araway, damu hinduro nga tawo an nasunod ha dalan han pinakagutiay nga pag-ato ngan naghihimo hin desisyon ha kawaray paghunahuna. Ha kataposan, nalulusot hira tikang ha kinabuhi ngadto ha kamatayon ngan naatubang hin hilawig nga kawaray-kataposan.
Mabibilngan la an totoo ngan nagpapadayon nga kamurayawan kon itubyan naton an hunahuna, lawas, ngan espiritu ha Usa nga naghimo ha aton ngan nahigugma ha aton. Diri la Hiya an Agaron han kalibutan, kundi maaram Hiya han aton kinabuhi tikang han tinikangan tubtob ha kataposan. Kimnanhi hiya hini nga kalibotan “basi paglamrag ha mga nakakalingkod ha kasisidman ngan ha . lambong han kamatayon; Ha pagtugway han aton mga tiil ngadto ha dalan han kamurayawan” (Lucas 1:79) Nag-antos hiya ngan iginula an iya presyoso nga dugo basi magkaada kita kamurayawan ngan seguridad.
Inaabat mo ba an kabug-at han sala ha imo kasingkasing? Nababaraka ka ba ha tidaraon, o nangangalimbasog ka ba nga pugngan ito tikang ha imo hunahuna? Nabubug-atan ka ba hin labaw pa han imo maiilob? Karuyag mo ba nga magin talwas ngan ngan may seguridad? Nagsiring hi Jesus, “Pangaro, kamo, ngan ihahatag ha iyo, pamiling kamo, ngan iyo hiaagiian, pagtuktok kamo, ngan bubuksan ha iyo” (Mateo 7:7). An Ginoo may-ada tambal han iyo mga sala. Hiya an daku nga paradara han kabug-at, ngan waray makuri hinduro para ha Iya. An Buhat 3:19 nag-aaghat “Busa magbasol kamo, ngan magbalik, basi an iyo mga sala mahimo mapapara, basi umabot an mga panahon nga mahalayahay tikang ha atubangan han Ginoo.” An Dios, nga nagyayakan pinaagi kan manaragna Jeremias, nagsaad, “Kay maaram ako han mga hunahuna nga akon ginhuhunahuna mahitungod ha iyo, siring han Ginoo, mga hunahuna han kamurayawan, ngan diri han karaotan, basi tagan kamo hin ginlalaoman nga kataposan... Ngan kamo mamimiling ha akon, ngan mahiagian niyo ako, kon kamo mamiling ha akon ha bug-os niyo nga kasingkasing” (Jeremias 29:11, 13).