Ebanghelyo ni Juan 10:1-18
Nabatian mo na ba an usa nga nagtawag han imo ngaran ngan diri ka maaram kon diin tikang an tingog? O bangin diri ka nakakabati han tingog, tungod kay damu hinduro an aringasa ha palibot.
Pamati, may-ada tingog nga nagsasangpit ha imo. Ikaw!
Hin-o ka? Ano an imo ngaran? Diin ka tikang? Hain ka naukoy? Hain ka makadto?
Maaram ka han ngaran han imo baryo. Bangin waray ka pa gud makakadto ha iba nga lugar. Pero maaram ka gud nga an imo baryo parte han daku nga nasud, ngan an ngatanan nga nasud parte han daku nga kalibotan.
An Biblia
Haros 6,000 ka tuig na an naglabay han ginhimo an kalibotan. Ginhimo ito han Dios. An Dios may-ada libro nga tinatawag nga Biblia, nga nagsusumat kon paonan-o Niya ginhimo an kalibotan ngan kon paonan-o Niya ginhimo an siyahan nga lalaki ngan babaye. Ginhimo han Dios an tawo nga lalaki ha Iya kalugaringon nga dagway.
Tikang hito nga panahon natawo na an mga anak. Tikang hito nga panahon nagkamatay na an mga tawo. Yinukot ngan yinukot ha ira an natawo ngan namatay.
Natawo ka ha imo tatay ngan nanay. Pero an Dios gud an naghimo ha imo. Hiya an naghimo han ngatanan. Nakahunahuna ka na ba kon mationan-o ka urusahon an paghimo han Dios han ngatanan nga butang ngan kon paonan-o ka niya ginhimo?
Gintagan ka han imo mga kag-anak hin ngaran. Maaram an Dios han imo ngaran. Maaram hiya han kada tagsa nga ngaran, bisan ano man an yinaknan o lingwahe hiton. Maaram hiya han ngatanan.
Tungod kay ginlarang kita han Dios, maaram hiya han ngatanan mahitungod ha aton. Hinigugma kita niya tungod kay Iya kita. Hiya an aton langitnon nga Amay, ngan mas napapaid hiya ha aton kay han aton kalugaringon nga mga amay ngan mga iroy.
Dios
An Dios pirme may-ada. Buhi hiya ha kadayonan. Salit han iginbutang niya an iya gininhawa ha aton, ginhimo liwat ito nga mabuhi kita ha kadayonan. Diri, diri an aton mga lawas, kay namamatay ito, kondi an kalag ha sulod naton amo an nabubuhi ha kadayonan.
Kilala mo ba an Dios? Bangin magpakiana ka, "Hin-o an Dios? Hain hiya?"
Karuyag mo gud ba mahibaro? Oo, karuyag mo gud. Ha imo sakob karuyag mo gud mahibaro.
Waray ka pa gud makakita han Dios, diri ba? Waray pa, pero diri ito nangangahulogan nga waray Hiya ngada.
May-ada usa la nga Dios. Waray na lugar para ha iba, tungod kay an usa nga tinuod gud nga Dios nagsusulod han langit ngan han tuna. Aada hiya ha bisan diin ha pariho nga panahon.
An urukyan han Dios amo an langit, ito nga makaruruyag nga lugar ha kahitas-an, kondi naukoy liwat hiya ha mga kasingkasing han mga tawo nga nasugot ha iya tingog.
Paonan-o ko makikilala an Dios? Ito ba an pakiana nga imo ginpapakiana? An Dios may-ada urusahon nga plano ha pagpakita ha aton kon paonan-o.
An Dios nagsugo han iya bugtong nga Anak, hi Jesus, tikang ha langit basi ipakita ha mga tawo kon hin-o hiya ngan kon ano an iya hitsura. An Dios ngan hi Jesus uusa la.
Pinaagi hin milagro, an Anak han Dios natawo sugad nga bata ngan nagdaku nga lalaki nga tawo. Katapos, ha sulod hin tulo ka tuig, iginsumat ni Jesus ha mga tawo an gugma han Dios, an iya Amay. Ginsidngan niya hira nga baraan an Dios ngan diri Niya mapapasibay-an an pagkita hin sala.
Katapos, naghatag an Dios hin paagi basi matalwas kita tikang ha aton mga sala. Iya gintugotan an Iya Anak nga hi Jesus nga iparaysang ha krus han magraot nga mga tawo. Iginhatag niya an iya kinabuhi - kadaku gud an iya gugma!
Hiya an halad nga makakagbayad han mga sala han bug-os nga kalibotan - an kada usa nga sala nga imo nabuhat, an kada usa nga sala han kada tagsa nga bata nga lalaki o babaye, o magurang man nga lalaki, o babaye.
Nagpabilin ba hi Jesus ha krus? Nagpabilin ba hi Jesus ha lubnganan? Waray, katapos han tulo ka adlaw hiya bimnangon nga madaogon. Katapos bimnalik hiya ha langit ngan naghuhulat tubtob nga an Dios masiring nga matatapos na an kalibotan. Katapos, magigin matadong hiya nga Paraghukom han ngatanan nga tawo.
May-ada ka ba han Libro han Ebanghelyo ni Juan? Basaha an kapitulo 10. Iginsurat ni Juan an ginsiring ni Jesus ha mga tawo. An iya ginsiring para pa gihapon ha aton yana. Hi Jesus nagsiring nga hiya an Maopay nga Magbarantay ngan naghatag han iya kinabuhi para ha mga karnero. Kita an mga karnero. An Iya mga karnero nakilala han Iya tingog. Hiya nagtatawag ha ira pinaagi han ira ngaran. Ha diri nira kilala diri hira nasunod.
An Diri-Kilala, Ito nga Iba nga Tingog
Hin-o ito nga estranghero (stranger), an usa nga aton kakalagiwan? Hala, usa hiya nga kawatan! Waray niya kabaraka han mga karnero. Usa hiya nga buwaon. Waray kamatuoran dida ha iya. Hiya an yawa. Hiya an aton kaaway, hi Satanas.
Kondi siyahan, kaaway hiya han Dios. Usa ka panahon maopay hiya nga anghel nga kaupod han Dios ha langit. Pero nagin mapahitas-on hiya ngan nagpahitaas han iya kalugaringon kontra ha Dios. Nakig-away hiya kontra ha Dios ngan inupod ha iya an damu nga anghel. Nagdaog an Dios, tungod kay Hiya an may gahum ha ngatanan. Salit iya iginlabog hi Satanas ngan an ngatanan niya nga sumurunod tikang ha langit. Tungod hini, nangangalas hi Satanas ha Dios.
Tungod kay diri na gud hiya makakahirani ha Dios, iginhuwad niya an iya kasina ha mga linarang han Dios, ha mga tawo ha kalibotan. Tungod kay nakasala hiya, nangangalimbasog hiya ha pag-aghat ha ngatanan nga makasala. Diri na gud makakasulod ha langit an sala.
May-ada iba nga lugar, an lugar nga ginhimo han Dios para ha Yawa ngan han iya mga anghel. Ini an impyerno. An impyerno usa nga lugar han pagsakit. Ini naglalaga nga kalayo nga diri pa gud napaparong. Ito an lugar diin an Yawa ngan an iya mga sumurunod sisirotan ha kadayonan. Makaharadlok ito nga lugar ngan ikakadto kita han Dios kon pipilion naton nga mamati ha tingog ni Satanas.
Diri karuyag ni Satanas nga hunahunaon naton an impyerno. Diri niya karuyag nga maghunahuna kita mahitungod ha Dios. Ito an hinungdan kon kay ano nga nangangalimbasog hiya nga kuhaon an aton atensyon tikang ha Dios. Gin-aaghat kita ni Satanas nga mamati ha iya tingog.
Hinbatian mo na ba ito nga iba nga tingog ha sulod mo, an tingog han diri mo kakilala?
Usahay ginpapatoo kita niya nga may-ada hiya maopay nga mga butang nga igintatanyag. Usahay ginpapahunahuna kita niya: "Mas maopay ako kay ha iba. Importante ako. Ako anay. Mabulos ako. Makigpatasay ako. Kinahanglan ko makig-away para han akon mga katungod. Maopay an pangawat, basi la diri ako madakpan. An ngatanan nagbubuwa man, salit ako gihap magbubuwa. Diri man gud maraot an maghugaw nga mga hunahuna--- Waray man gud maaram kon ano an akon ginhuhunahuna. Malaw-ay nga pulong--- maupay man iton para ha pantawa o karisyohan”.
Ngan ha iba nga mga panahon, nawad-an ka na ba hin paglaom salit nasarihan ka nga maghunahuna, “Waray ako pulos, kay ano nga padayon pa nga mabuhi?’
Ini ngatanan an tingog han yawa. Usa hiya nga buwaon - amo ito an hinungdan kon kay ano nga nangangalimbasog hiya nga magin buwaon kita. Usa hiya nga kawatan, ngan karuyag niya nga mangawat kita. Usa hiya nga parapamatay - amo nga gintitinguha niya nga dumtan naton an iba.
Kon namamati ka hito nga tingog, ano an imo inaabat? Nalilipay ka ba hito? Kitaa, diri, nagpapasubo ito ha imo. Nakakaaghat ito ha imo nga magtago. Pariho gud ito kan Satanas. Mahilig hiya magbuhat hin mga butang ha kasisidman.
Hi Jesus, an Tingog han Magbarantay hin Karnero
Kilala mo ba hi Jesus, an Maopay nga Magbarantay? Karuyag mo ba magin usa han iya mga karnero? Karuyag mo ba hibaroan an iya tingog?
Oo, mahihimo nimo; pero diri ka anay mamamati hito nga iba nga tingog.
Yana, kon ikaw maghilum, hibabatian mo an malumo nga tingog ni Jesus nga nagsasangpit ha imo nga ihatag an imo bug-os nga kinabuhi ha Iya. Hibabatian mo ha Iya nga nagyayakan ha imo nga magbasol ka ngan isumat mo ha iya an ngatanan mo nga mga sala.
Bangin, ha panahon nga diri ka na nag-aaringasa, nakahunahuna ka, “Ano an akon bubuhaton ha ngatanan ko nga mga problema ngan mga pinas-an? Karuyag ko unta magin maopay ako. Karuyag ko unta nga makaabot ako ha lugar kun diin diri na ako magugutom o magsasakit. Ano an mahitatabo ha akon kon mamatay ako?”
Ngan bangin damu pa an imo mga ginhuhunahuna. Amo ito an tingog ni Jesus nga nagtatawag ha imo.
Nakakaabat ka ba usahay hin kasubo bisan kon diri ka maaram kon kay ano? O nasusubo ka ba bisan kon diri ka gud nag-uusahan? Bangin tungod ito kay karuyag mo mag-upod ha Dios, an Usa nga naghimo ha imo ngan nahigugma ha imo. Hiya an Paraataman nga namimiling han iya nawawara nga karnero. Hiya nagsasangpit ngan nagsasangpit, ngan namimiling ngan namimiling ha imo!
Kon hibatian mo an tingog han Magbarantay, batona Hiya. Sumati hiya nga nagbabasol ka han imo mga sala. Isumat ha Iya kon ano gud an imo inaabat, ngan pangaro ha Iya nga talwason ka. Ito an pag-ampo.
Nag-ampo ka na ba ha Dios han langit? Buhata ito yana. Mamamati ngan makakasabot hiya ha imo. Iya ihahatag ha imo an kamurayawan nga imo ginhihingyap.
Diri ka ba naruyag magin iya karnero ngan makilala an iya tingog? Karuyag niya magin sangkay mo. Kukuhaon niya an kabug-at han imo sala. Magigin malipayon ka ha sulod. Magigin mahigugmaon ngan buotan ka sugad ha Iya. Bubuligan ka niya nga malamposan an imo mga kahadlok.
Bisan kon gintatamay ka han iba tungod kay Kristohanon ka, maaram ka nga hi Jesus magmamangno ha imo. Bisan kon masulay ka utro han estranghero, kinahanglan sumarig ka kan Jesus nga bubuligan ka nga malamposan ito.
Kon talwas ka ha mahigugmaon nga mga butkon han Magbarantay, maaram ka nga ha kataposan dad-on ka niya ha iya urusahon, malipayon nga balay upod han Dios nga magkinabuhi upod ha Iya ha kadayonan!