Ang Kahayag sa Kalibutan
Ang Bibliya mao ang pulong sa Diyos, ang walay-kataposang kamatuoran. Naglangkob kini sa asoy sa paglalang, sa pagsupak sa tawo sa Diyos, ug sa kasakit nga nahitabo sa tawo tungod sa sala. Kini nagsulti usab kanato sa gugma sa Diyos alang sa tawo sa paghimog plano sa pagluwas kaniya. Kini naghisgot sa usa ka Manluluwas nga natawo, namatay tungod sa sala sa tawo, ug nabanhaw gikan sa kamatayon alang sa kaluwasan sa tawo. Bisan kinsa nga motuo sa mensahe niini makabaton og kapasayloan sa mga sala, kalinaw sa hunahuna, gugma alang sa tanang tawo, gahom ibabaw sa sala, ug buhi nga paglaom sa kinabuhing walay kataposan.
Ang Kahibulongang hinimo sa Diyos
Ang Diyos, ang magbubuhat sa uniberso, kanunayng nagalungtad. Siya anaa sa tanang dapit; Siya mao ang Labing Gamhanan, ug ang Labing Maalamon. Pinaagi sa Iyang dakong gahom, ang tanang butang iyang gihimo. Gihimo sa Diyos kining yutaa nga napuno sa tubig, unya Siya miingon, "Mapakita ang mamala nga yuta", ug kini nahitabo. Iyang gilalang ang kabukiran ug mga walog ug gitabonan kini sa sagbot, matahom nga mga bulak, ug sa tanang matang sa mga kahoy. Siya naghimo sa mga langgam nga nagakanta og daghang lainlaing mga awit. Ang Diyos nagbuhat sa tanang mananap, dagko ug gagmay, nga naglibotlibot sa kapatagan ug lasang, maingon man sa gagmayng mga insekto ug mga reptilya nga nagpuyo sa yuta. Iyang gibuhat ang mga lanaw ug kadagatan ug ang tanang linalang nga nagpuyo niini. Iyang gihimo ang mga kontinente diin ang mga tawo sa matag kaliwatan mopuyo. Gihimo sa Diyos ang adlaw aron mohatag og kahayag ug kainit ug ang bulan aron mohatag og kahayag sa gabii. Iyang gidayandayanan ang langit sa libolibong matahom, naggilak-gilak nga mga bituon. Sa kataposan, giumol sa Diyos ang tawo gikan sa abog sa yuta. Siya mihuyop sa iyang mga ilong og gininhawa sa kinabuhi, ug ang tawo nahimong buhing kalag. Gitawag siya sa Diyos og Adan.
Nakita sa Diyos nga si Adan nagkinahanglan og katabang, busa Iyang gipahinabo nga si Adan mahulog sa lalom nga pagkatulog. Dayon gikuha sa Diyos ang usa ka gusok gikan kang Adan ug naghimo'g babaye. Gihigugma ni Adan si Eva ug gihigugma usab siya ni Eva. Sila may matam-is nga panag-uban sa usag usa. Kini mao ang plano sa Diyos alang sa pamilya.
Gibuhat sa Dios ang tanang butang sulod sa unom ka adlaw, ug sa ikapito ka adlaw siya mipahulay. Iyang gitan-aw ang tanang butang nga iyang gibuhat ug nakita nga kini maayo kaayo. Busa gipanalanginan sa Diyos ang ikapitong adlaw ug gibalaan kini ingong adlaw sa pagpahulay alang sa tawo.
Ang Bibliya naghisgot bahin sa usa ka napukan nga manulonda nga gitawag og Satanas, o Yawa. Siya gihinginlan gikan sa langit ug mao ang hinungdan sa tanang pagkadaotan. Tungod kaniya, ang kasubo, pag-antos, sakit, ug kamatayon misulod sa kalibotan.
Ang Makapasubo nga Sinugdanan sa Sala
Gihigugma sa Diyos si Adan ug Eva. Siya naghimog matahom nga tanaman alang kanila nga puy-an. Gitawag kini ug Tanaman sa Eden. Si Adan maoy moatiman niana. Niining hardina adunay daghang matang sa mga utanon ug mga prutas nga ilang kaonon. Adunay usa ka kahoy nga gitawag nga kahoy sa kahibalo sa maayo ug sa daotan. Gisultihan sa Diyos si Adan nga dili siya angayng mokaon sa bunga sa maong kahoy, kay sa adlaw nga mokaon siya niana, siya mamatay gayod. Usa ka adlaw si Satanas miduol kang Eva ug namakak kaniya. Siya miingon, "Dili gayod kamo mamatay . . . kamo mahisama sa mga diyos, nga makaila sa maayo ug sa daotan" (Genesis 3:4-5).
Samtang nagtan-aw siya sa bunga niining matahom nga kahoy, iyang nakita nga kini maayo alang sa pagkaon, ug nga ang pagkaon niini maghatag og kaalam. Iyang gikuha ang pipila ka bunga, ug iyang gihatag kang Adan, ug silang duha mikaon niini. Dihadiha dayun sila mibati nga sad-an kaayo sulud sa ilang mga kasingkasing. Wala pa sila gayod makabati niining pagbatia kaniadto. Sila nahibalo nga sila nakahimog butang nga daotan kaayo. Naulaw silang duha sa ilang kaugalingon sa dihang nahinumdom sa ilang pagkamasinupakon. Ang kahadlok misulod sa ilang mga kasingkasing sa dihang sila nagtuo nga sila makigkita sa Diyos. Busa sila nagtago taliwala sa mga kahoy sa tanaman.
Sa bugnaw nga adlaw, gitawag sa Diyos si Adan ug miingon, "Hain ka?" Sila dili makatago gikan sa Diyos, mao nga sila miduol ngadto Kaniya ug miangkon sa ilang pagkadaotan. Gipasabot sa Diyos kanila kon unsa ka dakong sala ang pagsupak sa Iyang sugo. Iyang gisultihan sila nga sila silotan tungod sa ilang pagkamasinupakon. Sila karon makasinati og kasakit ug kalisdanan sa ilang kinabuhi. Karon kinahanglang magtrabaho sila aron mabuhi. Ang ilang mga lawas mahimong tigulang ug madaot. Mamatay sila ug mobalik sa abog.
Human sila gipapahawa sa maong nindot nga tanaman, gibutang sa Diyos ang mga kerubin ug nagdilaab nga espada aron dili sila makaon sa bunga sa kahoy sa kinabuhi. Sila misugod sa pagsabot sa mga sangpotanan sa sala ug sa dakong kasubo nga gidala niini.
Ang Makapasubo nga Sangputanan sa Pagpakasala
Si Adan ug Eva nasubo pag-ayo sa ilang sala sa pagkadili-masinugtanon sa Diyos. Bisan pa sa ilang sala, gihigugma gihapon Niya sila. Siya nagsaad nga magpadala og Manunubos alang sa kaluwasan sa katawhan.
Si Cain ug Abel mao ang unang duha ka anak nga lalaki ni Adan ug Eva. Usa ka adlaw, sila naghalad ngadto sa Ginoo. Si Cain nagdala og pagkaon nga iyang giani. Si Abel nagdala og piniling karnero sa iyang panon ug naghalad niini, nga giula ang dugo niini. Ang halad ni Abel nakapahimuot sa Diyos, apan ang Diyos wala mahimuot kang Cain o sa iyang halad.
Sa dihang nakita ni Cain nga nahimuot ang Diyos kang Abel, siya nasina ug nagdumot kang Abel. Dayon usa ka adlaw samtang sila nag-uban sa kapatagan, si Cain mitindog ug gipatay ang iyang igsoon nga si Abel. Ang Diyos nangutana kang Cain, "Hain ba si Abel nga imong igsoon?" Si Cain dili gustong mosulti sa kamatuoran, busa siya miingon, "Wala ako mahibalo: magbalantay ba ako sa akong igsoon?" (Genesis 4:9) Si Cain wala magmasinugtanon sa pagsunod sa mga instruksiyon sa Ginoo. Ang Diyos nagpasidaan kaniya sa wala pa niya patya si Abel nga kon siya magbuhat og maayo siya pagadawaton. Kon nausab lang unta niya ang iyang tinamdan ug gihigugma ang iyang igsoon! Sa makausa pa, tungod sa sala ang tawo nahilayo gikan sa presensiya sa Diyos. Si Cain nahimong usa ka palagiw ug usa ka layaw.
Gihigugma Pag-ayo sa Dios ang Kalibutan nga Gihatag Niya ang Iyang Anak
”Kay alang kaninyo natawo karong adlawa . . . ang usa ka Manluluwas, nga mao si Kristo nga Ginoo” (Lucas 2:11).
Human mamatay si Abel ug mibiya si Cain sa balay, si Adan ug Eva nanganak ug laing anak. Ang iyang ngalan mao si Seth. Si Seth maoy usa ka tawong mahadlokon sa Diyos. Gipanalanginan sa Diyos ang mga kaliwat ni Set. Sila nakadungog ug mituo sa kahibulongang mga saad sa Diyos bahin sa usa ka Manluluwas nga usa ka adlaw magluwas kanila. Si Abraham, ilabina, nagtuo sa Diyos ug busa gitawag nga higala sa Diyos. Si Abraham giingnan nga pinaagi sa iyang kaliwat ang tanang pamilya sa yuta pagapanalanginan.
Daghang gatosan ka tuig ang milabay, gituman sa Diyos ang Iyang saad nga magpadala ug Manluluwas sa kalibotan. Kini nahitabo sa milagrosong paagi, sa gamayng lungsod sa Betlehem sa Judea. Didto sa pasungan, usa ka bata ang natawo kang Maria, nga usa ka ulay. Ang usa ka manulonda miingon kang Maria nga ang ngalan sa bata Jesus (nga nagkahulogang Manluluwas). Siya mahimong dakong magtutudlo nga magtudlo sa mga tawo ug daghang butang bahin sa Diyos. Si Jesus nagdako sama sa ubang mga bata. Sa edad nga napulog-duha, Siya nakasabot sa pulong sa Diyos sa mas maayo kay sa daghang doktor ug mga abogado sa Jerusalem. Siya daw nahibalo sa tanang butang bahin sa kasugoan ug sa mga propeta. Ug wala na sila mangahas sa pagpangutana kaniya og usa ka pangutana nga dili niya matubag.
Si Jesus interesado kaayo sa mga panginahanglan sa Iyang katawhan. Sa dihang siya katloan ka tuig ang panuigon, siya misugod sa pagtudlo diha sa mga sinagoga. Usa ka adlaw Iyang gibasa ang usa ka tagna sa Daang Tugon mahitungod sa umaabot nga Mesiyas. Sa dihang nahuman na niya ang pagbasa, siya miingon sa mga tawo, "Karon natuman kini nga kasulatan sa inyong mga igdulungog" (Lucas 4:21). Siya nagtudlo sa katawhan uban ang awtoridad. Siya nagwali nga ang gingharian sa Diyos haduol na, ug nga ang paghinulsol gikinahanglan aron makasulod sa gingharian. Gitudloan niya ang mga tawo sa pagsimba sa Diyos uban ang pagkamapainubsanon ug pagkamatinud-anon. Iyang gibadlong ang mapahitas-on ug dili-magtutuo tungod sa ilang mga sala, ug nagwali sa ebanghelyo sa gugma ngadto sa mga kabos ug mga hangul.
Si Jesus Nagtanyag ug Kinabuhi nga Walay Kataposan
Si Jesus miingon, "Ako mao ang pagkabanhaw ug ang kinabuhi: Siya nga nagatoo kanako, bisan siya mamatay, mabuhi siya" (Juan 11:25).
Si Jesus naghimog daghang mga milagro, nga nagpamatuod sa mga tawo nga Siya mao ang gisaad nga Manluluwas nga gipadala gikan sa Diyos. Iyang giayo ang mga masakiton, gihatagan og panan-aw ang mga buta, gipatalinghog ang mga bungol, gipagawas ang mga demonyo, ug gibanhaw ang mga patay. Siya naglakaw sa ibabaw sa tubig ug nagpahilum sa unos sa dagat pinaagi sa Iyang mga pulong. Siya nakigsulti sa usa ka kahoyng igos, ug sa pagkasunod adlawbuotan kini nakaplagan nga nalaya gikan sa mga gamot. Iyang gipakaon ang kapin sa lima ka libo ka gigutom nga mga tawo pinaagi sa lima ka tinapay ug duha ka isda. Ug nangaon silang tanan ug nangabusog, ug ilang gitigum ang mga salin nga napundok pa og napulog-duha ka bukag. Ang mga mangingisda nakadakop og daghang isda sa dihang ilang gihulog ang mga pukot. Usa ka adlaw si Jesus nahimamat sa napulo ka sanlahon nga nakadungog sa iyang kabantog. Sila mihilak, "Ginoo, kaluy-i kami". Pinaagi sa iyang pulong sila naayo.
Daghang panon sa katawhan ang misunod kang Jesus adlaw-adlaw, diha man siya sa mga siyudad o sa mga dalan. Ang mga tawo gipanalanginan sa iyang malulot-on nga mga pulong, kalulot, kaluoy, ug mga milagro nga Iyang gihimo.
Siya misugod sa pagsulti sa katawhan nga Siya ang Anak sa Diyos, ug nga ang Diyos mao ang iyang Amahan. Ang tanan nga mituo sa Iyang mga pulong gipanalanginan. Iyang gisultihan kadtong mituo nga sila mga anak sa Diyos.
Si Jesus miingon sa iyang mga tinun-an: "Ako moadto aron sa pag-andam ug dapit alang kaninyo. Ug kon ako moadto ug mag-andam ug dapit alang kaninyo, ako moanhi pag-usab ug modawat kaninyo ngadto sa akong kaugalingon, aron nga kon asa ako, adto usab kamo" (Juan 14:2-3). Kining maong dapit sa langit maoy alang sa tanang matuod nga mga Kristohanon.
“Umari kamo, kamong mga gipanalanginan sa akong Amahan, panunod sa gingharian nga giandam alang kaninyo sukad sa pagkatukod sa kalibotan”(Mateo 25:34).
Si Jesus Namatay Alang sa Atong mga Sala
"Sa ilang pag-abut... Kalbaryo, didto gilansang nila siya sa krus" (Lucas 23:33).
Ang mga eskriba ug mga Pariseo nasuko pag-ayo kang Jesus ug sa Iyang pagtulon-an. Siya subsob nga nagbadlong kanila tungod sa pagpangitag kadungganan ug sa ilang ilegal nga mga buhat sa pagpangitag salapi. Sila nangabugho kang Jesus, tungod kay daghan ang mituo kaniya, misunod kaniya, ug nagdayeg kaniya. Nahadlok sila nga himoon sa mga tawo si Jesus nga ilang hari.
Sila misulay sa paghimo kang Jesus sa pagbabuhat og mga butang nga makapahimo sa mga tawo nga mawad-ag pagtuo Kaniya, apan si Jesus maalamon kaayo. Ang ilang pagdumot ug kasuko misamot samtang misamot ang pagkapopular ni Jesus. Busa nakigsabot sila sa pagpatay kang Jesus.
Gidala nila si Jesus sa hukmanan ug giakusar Siya ingong usa ka malinapason ug tigpasipala. Ug ilang gisumbong siya sa daghang mga bakak. Dayon gidala nila siya ngadto kang Poncio Pilato, ang Romanong gobernador sa Judea. Si Pilato wala makakaplag og sala kang Jesus, busa nagtinguha siya sa pagbuhi kaniya. Apan ang mga magsusumbong kang Jesus nahimong masuko nga panon sa katawhan ug misinggit, "Ilansang siya! Ilansang Siya sa krus! Sa dihang nadungog ni Pilato ang ilang mabangis nga mga singgit ug mga hulga, siya misugot sa ilang gipangayo ug gitugyan si Jesus ngadto kanila. Gikuha nila si Jesus ug gisul-uban siyag purongpurong nga tunok ug gipanag-ingon nga siya maoy hari. Unya ilang gilud-an og laway ang iyang nawong ug gibunalan siya. Sa kataposan, ilang gilansang Siya sa krus ug gibiyaan Siya aron mamatay.
Si Jesus gipatay nga walay sala, sama sa nating karnero nga gihalad ni Abel sa halaran gatosan ka tuig ang milabay. Si Abel naghalad sa iyang nating karnero ingong simbolo sa Kordero sa Diyos nga mamatay alang sa mga sala sa kalibotan. Ang karaang mga manalagna nagtagna usab bahin sa pag-antos ug kamatayon ni Jesus. Si Juan Bawtista miingon, "Tan-awa, ang Kordero sa Dios nga nagakuha sa sala sa kalibutan" (Juan 1:29). “Kay ang Dios nahigugma kaayo sa kalibutan, nga iyang gihatag ang iyang bugtong nga Anak, aron ang tanan nga mosalig kaniya dili malaglag, kondili makabaton ug kinabuhi nga walay katapusan” (Juan 3:16).
Si Jesus Mibangon Gikan sa mga Patay aron Pagluwas Kanato
“Wala siya dinhi; kay siya nabanhaw, ingon sa iyang giingon. Umari kamo, tan-awa ang dapit nga gihigdaan sa Ginoo” (Mateo 28:6).
Sa ikatulong adlaw human sa kamatayon ug paglubong ni Jesus, nga mao ang unang adlaw sa semana, ang pipila ka babaye miadto sa lubnganan aron sa pagdihog sa iyang lawas. Sanglit sayo pa kaayo sa buntag, sila nahibulong sa pagkakita ug usa ka walay sulod nga lubnganan. Wala na ang lawas ni Jesus! Nabalaka sila. Sa kalit, duha ka manulonda nga nagsul-ob ug masilaw nga mga besti mibarog tupad kanila, nga nag-ingon: "Nganong gipangita ninyo ang buhi taliwala sa mga patay? Wala siya dinhi, kondili nabanhaw (Lucas 24:5-6). Sila midali ug mibalik sa pagsugilon sa mga tinun-an sa ilang nakita ug nadungog. Ang mga tinun-an wala motuo sa ilang asoy, busa si Pedro ug Juan milakaw aron sa pagsusi alang sa ilang kaugalingon. Sila usab nakakaplag nga walay sulod ang lubnganan. Ug sa pagsulod nila, ilang nakita ang mga panapton nga lino ug ang panyo nga giputos sa ulo ni Jesus. Sa dihang ilang nakita kining mga butanga, sila mituo sa asoy sa mga babaye. Sa pagkagabii niadtong adlawa, ang mga tinun-an nagtigom sa usa ka dapit nga sirado ang mga pultahan tungod kay nahadlok sila sa mga Judio. Sa kalit si Jesus mitindog sa ilang taliwala ug miingon: "Ang kalinaw maanaa kaninyo". Gipakita niya kanila ang iyang mga kamot ug ang iyang kilid nga adunay samad. Ang mga tinun-an nalipay sa ilang pagkakita sa Ginoo ug mituo nga siya mao si Jesus nga gilansang sa krus ug nabanhaw gikan sa mga patay. Human niini si Jesus nagpakita sa daghang tawo ingong bug-os nga pamatuod sa Iyang pagkabanhaw.
Sa maong buntaga kung kanus-a nabanhaw si Jesus gikan sa mga patay mao gihapon ang labing mahimayaong adlaw sa kasaysayan. Niining adlawa, ang kahibulongang plano sa Diyos sa kaluwasan nahuman. Kini nga plano sa kaluwasan nagpahinabog kausaban sa mga kasingkasing ug mga kinabuhi sa mga tawo pinaagi sa grasya sa Diyos pinaagi sa pagtuo sa kamatayon ug pagkabanhaw ni Jesus. “Busa kon ang tawo anaa kang Cristo, siya bag-ong linalang: ang karaang mga butang nangagi na; tan-awa, ang tanang mga butang nahimong bag-o” (2 Corinto 5:17). Karon ang tanan nga modawat kang Jesus diha sa ilang kasingkasing ug masinugtanon nga mosunod Kaniya sa tibuok nilang kinabuhi pagabanhawon ug mabuhi sa walay kataposan sa langit. Si Jesus miingon, "Kay ako buhi, kamo usab mabuhi" (Juan 14:19).
Kini ba nga mensahe nakapatandog sa imong kasingkasing? Unsay imong tubag? Maghinulsol ka ba ug motuo sa ebanghelyo? “Ug diha sa lain walay kaluwasan gikan kang bisan kinsa, kay walay lain nga ngalan sa ilalum sa langit, nga nahatag sa taliwala sa mga tawo, nga diha kaniya mangaluwas kita. ”(Buhat 4:12). Ayaw paglangan. Dumool ka kang Jesus karong adlawa.