Paghukom -- Unsa may kahulogan niini? Husto ba ang paghukom? Nakahunahuna ka na ba niining mga pangutanaha? "Ayaw kamo paghukom, aron kamo dili pagahukman" (Mateo 7:1), nagtukmod sa daghang Kristohanon sa paghinapos nga sila walay katungod ni responsibilidad sa paghukom sa ilang nakita ug nadungog. Apan kining maong konklusyon nagpabilin kanila nga wala mahibalo kon unsaon pagsagubang sa kinabuhi sa ilang palibot.
Ang pagtuon sa Pulong sa Diyos magpakita nga ang iyang mga anak adunay responsabilidad sa paghukom.
Personal nga Responsibilidad sa Paghukom
Si Jesus miingon, "Ayaw na kamo paghukom sumala sa panagway, apan paghukom kamo sa matarung nga paghukom" (Juan 7:24). Sukad sa sinugdan sa panahon ang Pulong sa Diyos nagbarog ug sukdanan sa matarong nga pagkinabuhi.
Ang Bibliya tin-awng nagtudlo nga ang pagpamakak, pagpangawat, kahakog, ug tanang imoralidad dili makapahimuot sa Diyos. Kini nag-ingon nga ang kasuko, kabuang, ug kahakog dili tugotan diha sa mga kinabuhi sa mga anak sa Diyos. Kon kining mga buhat ug mga tinamdan anaa sa akong kinabuhi, dili ba kinahanglang hukman ko kini ingong makasasala ug mangita ug kaluwasan gikan niini? Kon ako mamatikdan sa maong mga buhat ug mga tinamdan diha sa kinabuhi sa usa ka higala, ako magpakusganon sa pag-ingon “Maayo, ako dili maghukom niini nga husto o sayop,” sa diha nga ang Dios nag-ingon nga “ang mga nagabuhat sa maong mga butang dili makapanunod sa gingharian sa Dios “(Galacia 5:21)?
Ang matag adlaw maghatag sa matag tawo ug mga kahigayonan alang sa maayo ug sa daotan. Sa unsang paagi mahibaloan sa usa ka tawo kon unsay dawaton ug kon unsay isalikway? Ang 1 Tesalonica 5:21 nag-ingon kanato “Susiha ang tanang butang; hupti pag-ayo ang maayo.” Pinaagi sa unsang sukdanan atong masulayan ang tanang butang? Ang bugtong tinuod nga sukdanan nga atong sundon mao ang Pulong sa Diyos.
Pagsabot sa Mateo 7:1
Unsay gitudlo ni Jesus sa dihang Siya miingon, "Ayaw kamo paghukom aron dili kamo pagahukman"? Atong tan-awon ang tibuok teksto nga naglakip niining mga pulonga.
"Ayaw kamo paghukom, aron dili kamo paghukman. Kay ang paagi sa paghukom nga inyong gamiton sa paghukom, mao usab ang paagi sa paghukom nga inyong gamiton sa paghukom kaninyo. Ug nganong tan-awon mo ang puling sa mata sa imong igsoon, apan dili nimo tagdon ang troso nga anaa sa imong kaugalingong mata? O unsaon man nimo pag-ingon sa imong igsoon, 'Tugoti ako sa pagkuha sa puling gikan sa imong mata,' samtang, tan-awa! may troso diha sa imong kaugalingong mata? Ikaw nga salingkapaw, una nga kuhaa ang troso gikan sa imong kaugalingong mata; ug unya ikaw makakita pag-ayo sa pagkuha sa puling gikan sa mata sa imong igsoon" (Mateo 7:1-5).
Kining bahina sa kasulatan, nga giingon sa kadaghanan nga nagdili sa paghukom, sa pagkatinuod nagtudlo kanato sa paghukom sa duha ka paagi. Una, kinahanglang hukman nato ang sala diha sa atong kaugalingong kinabuhi. Dayon, uban ang putli nga tinamdan, tabangan nato ang atong higala o igsoon sa paghukom sa sayop nga tingali anaa sa iyang kinabuhi.
Ang Husto nga Tinamdan sa Paghukom
Kinahanglang mag-amping kita sa paghukom sa matarong nga paghukom uban ang malumong kasingkasing ngadto sa usa nga nakasala. Tingali ang usa ka katarongan nga ang paghukom dili-maayo nga gihisgotan sa kalibotan karon mao nga daghan kaayo niini ang ginahimo nga salingkapaw ug mapintas.
Ang Kristohanong paghukom mao ang usa nga nagtinguha sa pagbutyag sa sayop, nagpunting sa tambal, ug nagdala ngadto sa pagkaayo ug pagpahiuli. Kini nga bahin gitugyan sa Diyos ngadto sa mga kamot sa matuod nga mga magtutuo.
Ang mga tawo may kinaiyanhong kiling nga mahimong kritikal ug mapasipalaon niadtong lahi sa ilang mga opinyon ug estilo sa kinabuhi. Sayon ang paghukom sa mga pulong o mga lihok sa uban nga walay bug-os nga kahibalo sa tanan nga nalangkit sa kahimtang. Ang usa ka lalaki tingali nagtuo nga ang iyang higala nakahimog grabeng sayop ug bug-os nga naghukom kaniya tungod niana. Bisan pa niana, kon siya maggahin ug panahon sa pagduaw sa iyang higala ug mahibalo sa kamatuoran sa maong butang, siya tingali mosulti nga siya usab molihok unta sa samang paagi.
Tingali ang atong mga pagbati nasakitan tungod sa komento sa usa ka silingan. “Siya daotan!” kaita mosigarbo, “gusto niyang masakitan ako.” Sa pagkatinuod adunay dakong posibilidad nga ang atong silingan walay bisan unsang daotang tuyo. Basin nasayop siya sa pagsulti, o basin wala nato masabti ang iyang mga pulong. Tingali atong makita nga ang usa ka Kristohanong igsoon napakyas sa usa ka paagi. “Tan-awa siya,”siya nag usik “ wala siya magpakabana kon unsaon niya pagkinabuhi!” Sa pagkatinuod siya tingali nag-atiman pag-ayo, ug bisan nianang higayona tingali siya nag-antos tungod sa iyang kapakyasan. Dili kini atong responsibilidad nga hukman ang usa nga napakyas. Angay natong tabangan siya sa pag-ila sa iyang sayop ug sa pagdala kaniya ngadto sa paghinulsol ug pagpasaylo.
Ang tawo, tungod sa iyang depravadong kinaiyahan, nalingaw sa pagpamatuod nga ang uban sayop ug ang iyang kaugalingon husto. Usahay mobati kita nga atong responsibilidad nga makombinsir ang laing tawo sa iyang sayop nga buhat. Kon ang indibiduwal nga atong gipaningkamotan nga makombinsir dili dali nga makombinsir, tingali kita magpakiglalis. Tingali mosulti kita nga kusog ug mapugos. Kita tingali mosugod sa paglista sa daghang kasaypanan ug mga kapakyasan sa usa nga atong gipakigsultihan o makig-atubang kaniya sa paagi nga ang akusado walay paagi sa pagpatin-aw sa iyang baroganan. Dili kini ang paagi sa Ginoo sa pagpamatuod ug paghukom sa sala. Sa dihang ang usa ka tawo gustong modaog sa panaglalis o mopamatuod sa usa nga sila sayop, siya mihunong na sa pagkahimong usa ka embahador alang kang Kristo. Siya anaa sa iyang kaugalingong misyon ug wala na magpakigdait sa iyang igsoon kang Kristo. "Karon kami mga embahador alang kang Kristo" (2 Corinto 5:20).
Samtang kita naningkamot sa paghukom sa sayop sa kinabuhi sa atong igsoon o sa atong silingan, dili gayod nato tugotan kining maong paghukom nga magpahinabo kanato sa pagbati ug dili-maluloy-on o masuko kaniya. Kinahanglang makig-estorya kita kaniya nga malumo ug mapailobon. "Mga igsoon, kon ang usa ka tawo hikaplagan sa usa ka kasaypanan, kamo nga mga espirituhanon, pabalikon ninyo ang maong tawo diha sa espiritu sa kalumo; magbantay ka sa imong kaugalingon, tingali unya ikaw usab matintal" (Galacia 6:1).
Paghukom nga Gipahamtang sa Iglesya ni Kristo
Ang Bag-ong Tugon nagtudlo nga ang mga responsibilidad gihatag ngadto sa mga magtutuo nga nagporma sa simbahan ni Kristo sa yuta. Sila mahimong usa ka katawhan nga lahi sa dili-diyosnong kaliwatan nga naglibut kanila. Sila magpuyo sa panaghiusa, "nga may samang gugma, nga maghiusa sa hunahuna, sa usa ka hunahuna" (Filipos 2:2). Ang mga yawi sa Gingharian ni Kristo gihatag ngadto sa simbahan ni Kristo samtang kini nagsunod sa paggiya sa Balaang Espiritu, kon unsa ang iyang gihigot o gibuhian dinhi sa yuta pagahigoton usab o buhian sa langit. Kini maoy seryosong responsabilidad. "Ug ihatag ko kanimo ang mga yawi sa gingharian sa langit: ug bisan unsa nga imong igagapos sa yuta igagapos usab sa langit: ug bisan unsa nga imong pagabuhian sa yuta pagabuhian usab sa langit."(Mateo 16:19).
Pagpamatuod sa Bakak nga Pagtulon-an
Ang Kakristiyanohan anaa sa dakong kagubot karon. Usa ka grupo sa nag-angkong mga Kristohanon nagmantala, "Ania si Kristo." Ang laing denominasyon nag-ingon, "Dili, Siya ania dinhi." Ang mga doktrina gitudlo nga nagkasumpaki pag-ayo sa usag usa, apan ang tanan nangangkon nga may espirituhanong awtoridad. Unsa ang hinungdan niining kagubot? Wala ba kini mahitabo tungod sa kawalay-kabubut-on sa mga tawo sa paghukom tali sa kamatuoran ug bakak?
Si Jesus miingon, "Pagbantay kamo sa bakak nga mga propeta... kamo makaila kanila pinaagi sa ilang mga bunga" (Mateo 7:15-16). Gihatagan sa Anak sa Diyos ang mga magtutuo ug bug-at nga responsabilidad sa paghukom sa ilang mga magtutudlo pinaagi sa ilang kinabuhi. Siya nagpasidaan nga daghang minio gagmay nga mga manalagna motungha sa iyang ngalan, ug sa iyang ngalan magbuhat ug daghang katingalahang mga milagro. Apan, ikasubo, ang bunga sa kinabuhi niining maong mga magtutudlo magpadayag ug kahakog, garbo, kaibog, kadalo, pagkadili-matinud-anon, ug ubang dili-diyosnong mga kinaiya. Pinaagi niini nga pagpamatuod, ang sinserong anak sa Dios gitambagan sa pagkalagiw gikan niining mga magtutudlo, tingali siya usab mapahisalaag pinaagi kanila (1 Juan 4:1).
Ang kadaghanan sa bakak nga pagtulon-an nga mikaylap sa tibuok kalibotan may usa ka paagi nga makapadani sa kinaiyahan sa tawo. Morag makataronganon ug matarong. Kadtong mosunod niini naghatag ug dakong pamatuod sa gahom sa Diyos diha sa ilang mga kinabuhi. Ang maampingon ug bug-os nga pagpamatuod lamang niining maong mga pagtulon-an, nga itandi kini sa bug-os nga Pulong sa Diyos, ang magpadayag nga ang bakak gisagol sa kamatuoran. Samtang kining maong mga doktrina sundon hangtod sa ilang mga konklusyon, sagad makita nga kini dili mouyon sa mga doktrina sa Bibliya bahin sa pagdumili sa kaugalingon, pagkamapainubsanon, ug pagkamalumo. Sila morag naghatag ug luna sa pagkamapahamuot-sa-kaugalingon, garbo, ug unodnong pagkinabuhi.
Ang Diyos, ang Kataposang Maghuhukom
Moabot na ang adlaw sa kataposang paghukom sa dihang ang Diyos mohimog desisyon bahin sa kapalaran sa mga kalag sa mga tawo. Ang iyang paghukom maoy nahiuyon sa iyang sinulat nga Pulong. Ang Bibliya nagsulti kanato nga ang adlaw moabut sa dihang "ang Ginoong Jesus igapadayag gikan sa langit uban sa iyang gamhanang mga manulonda, diha sa nagdilaab nga kalayo nga magapanimalus kanila nga wala makaila sa Dios, ug wala magmasinugtanon sa ebanghelyo sa atong Ginoong Jesukristo" (2 Tesalonica 1:7-8).
Ang Diyos may katakos sa pagtan-aw sa sulod sa kasingkasing sa tawo. Siya lamang ang makahimo sa pagtimbangtimbang sa tanang kahimtang nga gipuy-an sa matag kalag. Siya makahimo sa pagtino sa mga motibo ug mga katuyoan nga nagalihok sa matag tawo. Ang Diyos makahimo sa paghukom kon ang usa ka kalag nagkinabuhi ba sumala sa pagtuo nga gitudlo diha sa iyang Pulong.
Ang indibiduwal nga naghukom sa sala diha sa iyang kinabuhi, nga nagkinabuhi sumala sa Pulong sa Diyos, makasiguro nga ang Diyos modawat kaniya sa kataposang adlaw sa paghukom. Ang tawo nga wala magpatalinghog sa pagtulon-an ni Jesus mag-atubang sa makalilisang nga adlaw sa paghukom. Si Jesus miingon, "Siya nga magasalikway kanako, ug dili modawat sa akong mga pulong, may usa nga magahukom kaniya: ang pulong nga akong gisulti, mao ang magahukom kaniya sa katapusan nga adlaw" (Juan 12:48).
Hinaot nga mangayo kita sa Diyos, ang dakong maghuhukom, nga hatagan kita ug hait nga pagsabot sa iyang kabubut-on alang sa atong mga kinabuhi, aron kita makahukom sa matarong nga paghukom ug sa kataposan makadawat sa atong walay-kataposang ganti!