Ugsa magtikang an panahon, may-ada na Dios. Iya ginhimo an kalibotan ngan an ngatanan nga aada hito. Tungod han iya gugma, ginhimo han Dios an tawo ha iya kalugaringon nga dagway ngan iginbutang hiya ha makaruruyag nga hardin. Waray sumugot an tawo ha mga instruksyon han Dios. Ini nga pagtalapas amo an sala ngan nagbulag han tawo tikang ha Dios. Ginsidngan Niya hira nga kinahanglan maghalad hin perpekto nga bata nga hayop para ha ira mga sala. Ini nga mga halad waray magbayad para han ira sala kondi nagtutodlok la han pangkataposan nga halad nga ighahatag han Dios. Usa ka adlaw ipapadara han Dios an iya Anak nga hi Jesus nganhi ha tuna basi magin pinakaimportante nga katapusan nga halad para ha mga sala han ngatanan nga mga tawo.
Hi Maria Ngan an Anghel
Paglabay hin upat ka yukot ka tuig, ha bungto han Nazaret, nag-uukoy an usa nga daraga nga hi Maria. Makig-asawa na hiya kan Jose. Usa ka adlaw, nagpakita kan Maria an usa nga anghel ngan nagsumat ha iya nga mag-aanak hiya hin espesyal nga bata. Kinahanglan tawgon hiya nga Jesus. Ini nga bata waray tunan-on nga amay. Hiya an magin Anak han Dios.
An Pagkatawo ni Jesus
Katapos han pagbisita han anghel, hi Jose ngan hi Maria nagbiyahe hin hirayo ngadto ha Betlehem basi magbayad han ira buhis. Han inabot hira ha Betlehem, an syudad puno hin mga tawo. Nagpalabay hira han gab-i didto han balay han hayopan kay waray na man lugar didto han balay o kwarto nga pwede pagrentahan. Didto natawo hi Jesus. Ginputos ni Maria an bata nga hi Jesus hin mga panapton ngan iginbutang hiya ha pasungan.
An mga Magbarantay Hin Karnero
Hito mismo nga gab-i, may mga paraataman ha bungtod ha gawas han syudad nga nagbabantay han ira mga karnero. Usa nga anghel an nagpakita ha ira, ngan an himaya han Dios naglamrag ha palibot han mga paraataman. Nagsiring ha ira an anghel, “Ayaw kamo kahadlok! Aanhi ako ngan may-ada ako dara nga maupay nga sumat para ha iyo, nga maghahatag hin dako nga kalipayan han ngatanan nga katawhan. Natawo yana nga adlaw didto han bungto ni David an iyo Magtaralwas nga amo an Cristo nga Ginoo. Amo ini an tigaman para ha iyo: hiaagian niyo in bata nga pinutos hin mga lampin ngan hinulid ha pasungan.” Ngan ha kadagmitan nagpakita hin damu nga panon han mga angel, nga naghihimaya, ngan nagdadayaw ha Dios, nga nasiring, “Himaya ha Dyos ha kahitas-an,ngan kalinaw dinhe ha tuna hadton mga tawo nga maupay an kaburot-on!” Han linakat na an mga anghel, ginbayaan han mga paraataman an ira mga karnero ngan nagdagmit hira ngadto ha Betlehem. Didto ira hin-again an bata nga sugad man han iginsumat ha ira han anghel.
An Maaramon nga mga Tawo
Katapos matawo hi Jesus, may mga maaramon nga tikang ha iba nga nasud nga kinmadto ha Jerusalem. Ngan nagpakiana hira, “Hain ba an natawo nga bata nga hadi han mga Judiyo? Kay kami nakakita han iya bitoon ha Sinirangan, ngan buot kami pagsingba ha iya.” Han hinbatian ini ni Hadi Herodes, nasina hiya. Gintirok niya an mga padi ngan mga magturutdo han balaod. Ginsumatan nira hiya nga an mga propeta nagsiring nga an magmarando matawo ha Betlehem. Ginsugo ni Hadi Herodes an mga mago ngadto ha Betlehem basi pamilngon ini nga hadi. Han binaya na an mga mago ha Jerusalem, an bitoon naggiya ha ira ngadto ha balay diin ira hin agian an bata nga hi Jesus. Hinapa hira ngan nagsingba, ngan iginhatag ha iya an mga regalo nga bulawan, insienso, ngan mira. Ginpahamangnoan han Dios an mga mago ha inop nga diri bumalik kan maraot nga Hadi Herodes, salit umuli hira ha iba nga dalan.
An Katuyoan han Regalo han Dios
Hi Jesus Anak han Dios. Nagkinabuhi hiya nga waray sala ngan hingpit ha ngatanan niya nga paagi. Han traynta anyos na hi Jesus, nagtikang hiya pagtutdo ha mga tawo mahitungod han Dios, an iya Amay. Nagbuhat hiya hin damu nga mga milagro sugad han pagpapakita han mga buta, pagtambal ha damu nga mga tawo han ira mga sakit, ngan bisan an pagbanhaw pa ngani han patay. Labaw ha ngatanan, nagtutdo hiya han paagi ha pagkaada hin kinabuhi nga waray kataposan ha langit. Katapos, iginhatag niya an iya kinabuhi sugad nga halad para ha mga sala han bug-os nga kalibotan.
An Biblia nasiring ha Juan 3:16, “Kay an Dios naghigugma gud han kalibutan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi ma may kinabuhi nga waray katapusan.” Hi Jesus kimnanhi hini nga tuna basi mamatay ha krus sugad nga gilalabawi nga halad. Pinaagi han iya kamatayon, an baraydan han ngatanan nga sala ginbaydan na. Waray na kinahanglan hin paghalad tungod han mga sala. Ini an katumanan han saad han Dios nga magpapadara hin Magtaralwas.
Bisan pa man kon ginpatay hi Jesus han magraot nga mga tawo, an kamatayon waray gahum ha iya. Han paglabay hin tulo ka adlaw hiya bimnuhat nga madaogon tikang ha lubnganan. Han sumunod nga mga adlaw katapos han iya pagkabanhaw, hingkit-an hi Hesus han damu nga mga tawo. Ngan usa ka adlaw, katapos niya bendisyoni an iya mga sumurunod, sinaka hiya ha langit.
Kon magdesisyon kita nga tumoo ngan ihatag an aton kinabuhi kan Jesus, an iya dugo maghuhugas ha aton han ngatanan naton nga sala. Samtang kinakarawat naton ini nga regalo han kaluwasan, nahiusa na liwat kita ha Dios. Hi Jesus nagin aton personal nga Manluluwas, ngan magin malipayon han mga bendisyon han pagigin iya anak! Usa ka adlaw mabalik hi Jesus. Dadad-on niya ha langit an ngatanan nga tuod nga mga tumuroo. Mabubuhi hira didto ha waray kataposan kaupod han Dios.