May-ada ba Dios? May-ada ba labaw nga persona o magmarando han uniberso? Paonan-o ako makakasiguro? Importante gud an baton hini nga pakiana tungod kay, kon may-ada Dios ngan diri ko Hiya gintatagad, ano an magigin mga resulta?
May-ada makuri nga mga pakiana nga nagkikinahanglan hin baton. Kay ano nga aanhi ako? Diin ako tikang? Ano an mahitatabo katapos han kamatayon? Ano an katuyoan han akon kinabuhi? Sigurado nga may-ada hinungdan han akon pag-eksister.
Ha bug-os nga kasaysayan, an mga tawo inabat nga kinahanglan magsingba hin butang o ha usa nga labaw ha ira. An kadaan nga mga kultura may-ada mga dios han adlaw, mga dios han bulan, mga dios han dalugdog, ngan mga damu pa. An iba nga mga lumad nga Amerikano, han nadiskobrehan hira han mga Europeo, nagsisingba ha gintatawag nira nga Daku nga Espiritu. An kadaan nga nasud han mga Judio nagsisingba kan Yahweh, an maghirimo han Tuna. Klaro nga ha sulod han kadatagsa nga mga tawo may-ada butang nga naghihingyap nga magkaada hin relasyon ha mas hitaas nga gahum.
Paonan-o ig-eksplikar an pagkaurosa ngan pagkabalanse han kinaiyahan? Hunahunaa an baga hin waray kataposan nga kadena han pagkaon (Food Chain), ha tuna ngan ha tubig. An usa nga hayop amo an pagkaon para ha iba, nga ha baylo nagpakaon ha iba. Ini nga siklo nagpapadayon, ngan pirme may pagkaon pa para ha iba.
Hin-o an nagbutang han kalendaryo ha mga ulo han ihalas nga mga tamsi basi hibaroan nira kon san-o na an panahon ha pagbalhin ngadto ha mas mapaso nga klima? Paonan-o nira nahibabaroan nga nagtitikang na an katpaso ha tuna nga yinukot ka kilometro an kahirayo? Mahimo sidngon han usa nga ada na iton ha ira (instinct). Tuod ito, kondi hin-o an nagbutang han instinct dida?
Hunahunaa an usa han mga isda ha dagat. Hin-o an nagbutang han mapa ha utok han salmon nga nagsusumat ha iya kon paonan-o niya babayaan an iya balay ha dagat ngan pagbiling han salog ngan han sapa diin nagtikang mismo an iya kinabuhi? Ngadto ini magbubunay, ngan ha diri maiha mamatay, nga nagbubutang hin lugar ha siklo han kinabuhi para ha iya mga anak nga susubaron an eksakto nga susbaranan han ngatanan nga iya kaapoy-apoyan. Naghuhunahuna ka ba nga ini ngatanan nahitatabo ha higayon (coincidence) la?
Maaram kita nga an uniberso organisado hinduro salit an mga orasan igin-aandam pinaagi han pagbirik han tuna ngan han iba-iba nga bitoon ngan planeta. Determinado hinduro an paggahin hini nga mga butang salit an mga eklipse ngan paglabay han mga kometa husto nga mahihimo nga igtagna. Hin-o o ano an naghimo hini nga husto nga ritmo han kanan uniberso idog? Tsansa la ba nga ha magpintas nga kinaiyahan han mga langitnon nga mga butang ini nga Kalibutan (an aton Earth) may-ada sakto nga timpla para hadton mga tanom ngan mga kinabuhi han hayop? May-ada gud nagplano hini nga maaram.
An plano para ha uniberso, kinaiyahan, aton mga lawas, ngan ha aton personal nga mga panginahanglan iginbutang han daku nga Dios ha langit. Waray mortal nga tawo, ha naglabay o ha pagkayana, nga may-ada sugad hito nga gahum. An katadongan ngan detalye han iya plano nagpapakita ha aton nga interesado gud hiya ha tawo ngan hit iya kalipayan.
An pagtoo(faith) amo an pagtoo(believe) ha usa nga butang nga diri naton nakikita. Diri naton nakikita an Dios kondi nakikita naton an mga ebidensya nga nagpapasabot nga aada Hiya ha aton palibot. Karuyag han Dios nga diri naton Hiya makita kondi basi karawaton naton an Iya pag-eksister pinaagi han matin-aw nga mga ebidensya nga nagpapamatuod mahitungod ha Iya. An Dios nagpapadayag ha iya kalugaringon ha aton kon ginkakarawat naton an Iya pag-eksister.
An usa han pinakakombinsir nga ebidensya nga may-ada Dios amo an pagbag-o nga nahitatabo ha kinabuhi han usa ka tawo samtang nagigin duok hiya ha Iya. Adton may-ada kinaiya han leon nagin pariho hin karnero. Kon diin may kangalas, may-ada na yana gugma. Kon diin may-ada gira, may-ada na yana kamurayawan. Kon diin may-ada kasamok ha sulod, may-ada na yana mamingaw nga pagpahuway. Kon diin may-ada waray kataposan nga mga pakiana, may-ada na yana pagsarig. Ginbabag-o niya an hakog nga tawo basi magin mahunahunaon ha iba.
Minahal nga magbarasa, nakaabat ka ba hin kabaraka ha sulod o hingyap hin usa nga butang, kondi diri ka sigurado kon ano ito? Ayaw pag-alang hito nga pagbati o pagsuray nga tabunan ito. An imo iton kalag naruyag pagkab-ot ha Dios. An pareho nga Dios nga naghimo han kalibutan pwede magin imo Dios. Kun may-ada ka pagtoo ngan pagsarig ha Dios ha langit, an imo kinabuhi gihap mabag-o. Imbes nga atohan an kahimtang han masurayon nga kinabuhi, pwede ikaw makapahuway ha pagsabot nga an Dios nakakakita, nakakabati ngan nagtatagad.
An Dios nagpasabot han Iya Kalugaringon pinaagi han Pulong, an Biblia. An Biblia usa nga kasayasayan; ini usa ka propesiya; mando para ha kinabuhi. Pero, ini gihap an gugma han Dios ha aton, ngan naghatag hin giya para han ada ha sulod nga panginahanglan han kalag. Basaha an Biblia. Pagtikang ha Genesis 1:1. ngan John 1:15. Basaha an Psalms 23 ngan 51. Pag-ampo ha Ginoo. Hiya nagsaad nga mamati ha imo.