Maaram ka ba nga may-ada Usa nga maaram han ngatanan mahitungod ha imo? An Dios an naghimo han kalibotan ngan han ngatanan nga aada hito. Hi Jesus, an Anak han Dios, maaram liwat han ngatanan nga imo nabuhat. Maaram Hiya han naglabay, yana, ngan tiarabot. Hinigugma ka Niya ngan kinanhi ha kalibotan basi talwason ka tikang ha sala. May plano Hiya para ha imo kinabuhi basi magin malipayon ka.

May panahon nga waray gud bisan ano dinhi nga kalibutan. Waray isda. Waray mga bitoon ha langit. Waray kadagatan ngan maghusay nga mga bukad. An ngatanan waray sulod ngan masirom. Kondi may-ada Dios. An Dios may-ada urusahon nga plano. Naghunahuna Hiya hin usa nga makaruruyag nga kalibutan, ngan samtang naghuhunahuna Hiya, ginhimo Niya ito. Ginhimo Niya ini ngatanan tikang ha waray. Han paghimoa han Dyos an bisan ano, nagsiring la Hiya, “Tumana na”, ngan natuman ini! Naghimo Hiya hin kapawa. Iya ginhimo an mga salog ngan kadagatan, an banwa ha tuna, an mga hayop, mga tamsi, ngan mga kahoy.

May-ada ako sangkay. Hiya an gimaopayi nga sangkay nga akon nakarawat. Maopay gud Hiya ngan tangkod ngan karuyag ko nga makilala mo liwat Hiya. An iya ngaran hi Jesus. An urusahon nga butang amo nga karuyag Niya magin imo sangkay. Tugoti ako hin pagsumat ha imo mahitungod ha Iya. Nabasa naton ini nga istorya ha Biblia. Tuod an Biblia. Pulong ito han Dios. An Dios an naglarang han kalibotan ngan han ngatanan nga aada hito. Hiya an Ginoo han langit ngan han tuna. Hiya an naghahatag hin kinabuhi ngan gininhawa ha ngatanan nga butang.

An ngatanan nagsisingba hin usa nga butang. An iba nagsisingba ha mga butang nga nakikit-an, an iba ha tawo, an iba ha imahen, ngan an iba ha ira kalugaringon. Iginpapakita nira an ira debosyon ha ira dios ha magkalainlain nga paagi. Samtang an damu nga mga tawo naghahatag han ira debosyon hini nga mga dios, nagpapabilin pa gihapon an hingyap ngan pagtangis ha ira mga kasingkasing. Ini nga mga tawo nakakakarawat la hin temporaryo nga kaliawan para ha ira mga kalag ngan gutiay la an ira kaisog ha pag-atubang ha tiumarabot nga adlaw. Nakakaupay ha ira nga an tidaraon pirme pareho han naglabay. An dios nga ira ginsisingba diri makakahimo pagpuno han kawad-on han ira kinabuhi.

May-ada ba Dios? May-ada ba labaw nga persona o magmarando han uniberso? Paonan-o ako makakasiguro? Importante gud an baton hini nga pakiana tungod kay, kon may-ada Dios ngan diri ko Hiya gintatagad, ano an magigin mga resulta? May-ada makuri nga mga pakiana nga nagkikinahanglan hin baton. Kay ano nga aanhi ako? Diin ako tikang? Ano an mahitatabo katapos han kamatayon? Ano an katuyoan han akon kinabuhi? Sigurado nga may-ada hinungdan han akon pag-eksister.

Ugsa magtikang an panahon, may-ada na Dios. Iya ginhimo an kalibotan ngan an ngatanan nga aada hito. Tungod han iya gugma, ginhimo han Dios an tawo ha iya kalugaringon nga dagway ngan iginbutang hiya ha makaruruyag nga hardin. Waray sumugot an tawo ha mga instruksyon han Dios. Ini nga pagtalapas amo an sala ngan nagbulag han tawo tikang ha Dios. Ginsidngan Niya hira nga kinahanglan maghalad hin perpekto nga bata nga hayop para ha ira mga sala. Ini nga mga halad waray magbayad para han ira sala kondi nagtutodlok la han pangkataposan nga halad nga ighahatag han Dios. Usa ka adlaw ipapadara han Dios an iya Anak nga hi Jesus nganhi ha tuna basi magin pinakaimportante nga katapusan nga halad para ha mga sala han ngatanan nga mga tawo.

Malipayon ka ba? An kahadlok ngan pag-abat hin sala makakakuha han imo kalipay. Bangin magpakiana ka, ‘Paonan-o ako magigin malipayon? May-ada ako maopay nga sumat para ha imo! May-ada usa nga makakabulig ha imo. Mapapasaylo niya an imo mga sala ngan tatagan ka hin waray kataposan nga kalipay. Jesus an iya ngaran. Tugoti ako hin pagsumat ha imo mahitungod ha Iya. An iya Amay, an Dios, amo an naghimo han kalibotan. Hiya an naghimo han ngatanan nga butang ha kalibotan. Iya kita ginhimo.